Diɛt 75 - JAM DE NHIALIC 2011

Nhialic Ee Bɛ̈ny de Luk

¹ Yïn yok leec Nhialic, Yïn yok leec! Wok ee dït dïït yïn luɛɛl, ku lueelku kadït ke gäi cï ke looi.

² Acï Nhialic lueel an, “Yɛn cï kööl de luk kiëët, ku Yɛn bï luk ŋiëc guiir.

³ Cakaa nɔn lɛthë këriëëc pïïr ëbɛ̈n, ku nieŋë piny guöpde, Yɛn bï këërkëërde muk aril.

⁴ Yɛn bï kɔc ee karɛc looi yɔ̈ɔ̈k cïkï röt bï leec,

⁵ acä keek yɔ̈ɔ̈k, bïk lɛcden dɔ̈m kɔ̈ɔ̈c.”

⁶ Guëër ë löŋ acïï bï bɛ̈n të lɔ aköl amiäk, ku nɔn ee të lɔ aköl athɛ̈i, ku acïï bï bɛ̈n të lɔ rut ku nɔn ee të lɔ wöuwic.

⁷ Ee Nhialic Yen ee Bɛ̈ny de luk, abï kɔ̈k mac, ku lony kɔ̈k.

⁸ Bɛ̈nydït amuk cup në Yeciin, acï thiäŋ kekë mɔ̈n ril de agönhde. Aye wäl wei, ku dek ë kɔc ee karɛc looi kedhie, ayek dek ëbɛ̈n abïk liil yic.

⁹ Ku yɛn cï bï mɔ̈l ë jam, në biäk de Nhialic ë Jakop, ayï luöi bän yen piɔɔny ë diɛt.

¹⁰ Yen abï tuŋ ke kɔc rac dhoŋ kɔ̈ɔ̈th, ku tuŋ ke kɔc piɛthpiɔ̈ɔ̈th abïï ke jat nhial.