Diɛt 60 - JAM DE NHIALIC 2011

Lɔ̈ŋ de Wɛ̈ɛ̈r

¹ Nhialic Yïn cï wo rɛɛc, ku tiam wook, Yïn aa cï piɔ̈u diu wekë wook, ku ënɔɔnë jɔ rɔt pɔ̈k wook.

² Yïn cï piny tɔ lɛthë ku tɔ retë yic, ënɔɔnë nuat ɣään cï dhuɔɔŋ, në baŋ kɔɔr en kuɛɛm.

³ Yïn cï kɔcku tɔ nuan aläldïïtë, wok ee tuëk cït kɔc cï miɔ̈l ë mɔ̈u.

⁴ Yïn ë kɔc ee Yï riëëu nyuööth, agokï poth ë riääk yic.

⁵ Luäk wook në riɛldu, bɛ̈ɛ̈rë lɔ̈ŋda, ago kɔckuön nhiaar keek kony wëi.

⁶ Acïï Nhialic lueel tëdɛn ɣeric an, “Yɛn bï Cekem tekic në tiëm, ku tɛ̈k Wak de Thukoth kɔckï.

⁷ Giliyad ee këdï, kekë Manatha ayadäŋ. Ku Eparaim yen aye akupdï, ku Juda ee thienydiën ë dhuëëŋ.

⁸ Ku Mowap abä tɔ ye thaŋ de wɛ̈k, ku cuat warkï në Edom kɔ̈u, ago ya kïn nyooth luɔi yen këdï. Ye ë Pilithiin tak nɔn bï kek diɛt ye kek A tiaam kiit?”

⁹ Nhialic, eeŋa bï yɛn lɛɛr në pänydït cï gël yic? Eeŋa bï yɛn lɛɛr Edom?

¹⁰ Cï wo rɛɛc ë yic Nhialic? Cïï be lɔ tɔŋ wekë remdan ë tɔŋ?

¹¹ Luäk wook të biök wok në kɔc ke ater. Kuɔɔny de mɛnh ë raan acïn naamde.

¹² Të tɔ̈u ë Nhialic në biäkda wok bï tiam, Yen abï kɔc ke aterda tiaam.