Diɛt 31 - JAM DE NHIALIC 2011

Lɔ̈ŋ de Raan Ŋäth Nhialic

¹ Ee Yïn aŋääth Bɛ̈nydït, du ɛn bï yɔ̈ɔ̈r guöp. Yïn läŋ, luäk ɛn, në biäk de piathëpiɔ̈ndu!

² Piŋ këdï, ku dap ɛn luök! Tɔ rɔt ee kuur gël ɛn, tɔ rɔt ee kal ril kony yɛn.

³ Ee yïn aye kuurdï ku ee yïn ee yɛn gël, nyuöthë yɛn ku tit ɛn në biäk de rinku.

⁴ Tɔ ya bän në dɛ̈pden thok, në luɔi yïn gëlgëldï.

⁵ Yïn cä gam wëi kï. Kony ɛn Bɛ̈nydït, Nhialic de yith.

⁶ Yïn man kɔc ee yiëth aluɛth lam, ee Bɛ̈nydït Yetök yen aŋääth.

⁷ Yɛn mit piɔ̈u arëët wok ë nhiëërduön agɔk, në biäk cï Yïn nuandï tïŋ, ku tïŋ katuc cï ya yök.

⁸ Yïn kën ɛn päl kɔc ke aterdï bïk a peec, Yïn cï ya gäm nɔm lääu bän lɔ të kaar.

⁹ Kokëpiɔ̈u we yɛn Bɛ̈nydït, në luɔi cïï nuan a yök, Dhiëëu acïï nyïïnkï be tɔ lëu daai apiɛth, yɛn cïï dhiëëu tiaam guöp.

¹⁰ Pïïrdï ë thök ke ya dhiau piɔ̈u, ku runkï acïk thök në kiɛɛu nɔm. Katuc cï ya yök acïk riɛldï thöl, ka yomkï acïk nyïïn lääu.

¹¹ Ku kɔc de wok ater acïk ɛn maan në biäk de katuc juëc cï ya yök, ayï kɔc rëër wok acïk ɛn biɔɔn guöp. Ku määthkï ayek gup riɔ̈ɔ̈c në yɛn ku kɔtkï të cï kek a tïŋ.

¹² Kɔc acïk nïïm määr në yɛn cït raan cï thou yɛn ë ciët tööny cï thou.

¹³ Yɛn cï lɛ̈t juëc piŋ, yɛn ye guääk alɔ të cän a nɔm wɛl thïn. Ayek kiɛɛr rac luöi yɛn, kiɛɛr bïï kek a nɔ̈k.

¹⁴ Ee Yïn aŋääth Bɛ̈nydït, ee Yïn ee Nhialicdï.

¹⁵ Pïïrdï atɔ̈u në Yïciin, kony ɛn në kɔc de wok ater, ku në kɔc yɔŋ ɛn kedhie.

¹⁶ Kokëpiɔ̈u wekë yɛn, yɛn awundu, kony yɛn në biäk de nhiëërduön agɔk.

¹⁷ Yïn caal Bɛ̈nydït, du ɛn bï yɔ̈ɔ̈r guöp. Yäär kɔc rac gup, tɔ ke lɔ paan ë thuɔɔu ke ke lɔ lik.

¹⁸ Tɔ thoŋ ee käŋ töör mim, thook ee lɛ̈ɛ̈t luɛɛl në kɔc piɛthpiɔ̈ɔ̈th gup në lɛc ku män. Ka yïn, miɛɛmë kethook në ee luethken.

¹⁹ Piathdu adït, piathduön cï täu kɔc ee yïn riëëu! Ku cï gäm kɔc ee yïn ŋɔ̈ɔ̈th, ke bïï kɔc aa tïŋ.

²⁰ Aye ke gël në täuduön tɔ̈u yïn we keek, në biäk de kiɛɛr rɛɛc ye luöi keek, aye ke gël në jam rɛɛc de kɔc ke ater.

²¹ Lɛckï Bɛ̈nydït! Ee ya nyuöth nhiëërdɛn agɔk, ɣɔn cïï ya gɛɛu cil ku mɛkë yɛn!

²² Yɛn aa cï riɔ̈ɔ̈c guɔ tak an cï ya guɔ cuɔp wei në yelɔ̈ɔ̈m. Ku acï dhiëndiën kaar ɛn kuɔɔny bɛ̈n piŋ, wën caal ɛn kuɔɔny tëde Yen.

²³ Nhiaarkï Bɛ̈nydït wek kɔc ke Bɛ̈nydït wedhie. Bɛ̈nydït ee kɔc ee piɔ̈ɔ̈th adöt gël, ku ee kɔc leec röt luöi këtuc rɔ̈ŋ ke keek.

²⁴ Riɛtkï wepiɔ̈ɔ̈th ku takï röt ril, wek kɔc ee Bɛ̈nydït ŋɔ̈ɔ̈th wedhie.