Diɛt 30 - JAM DE NHIALIC 2011

Lɔ̈ŋ de Miɛtëpiɔ̈u

¹ Yïn bä piɔɔny Bɛ̈nydït, në luöi cï Yïn ya luök. Yïn kën kɔc de wok ater tɔ thuɛ̈ɛ̈c në yɛn.

² Yïn cä lɔ̈ŋ bä ya kony, Bɛ̈nydït Nhialicdï, ago yɛn tɔ piɔl guöp,

³ Yïn ee ya bɛ̈ɛ̈i bei në raŋic piny, Yïn ë ya luäk bei piny paan ë thuɔɔu.

⁴ Pianykï Bɛ̈nydït, wek kɔc ke Bɛ̈nydït, pianykï rinkɛn ɣeriic.

⁵ Agönhde ee guɔ thök ëthiäu, ku piathëpiɔ̈nde ee tɔ̈u në pïïric ëbɛ̈n. Dhiëëu aduëër rɔt cuuth ë wɛ̈ɛ̈ric ëbɛ̈n, ku miɛtëpiɔ̈u ee bɛ̈n adurduur.

⁶ Të cän rɔt yök ke cïn kë riɔ̈ɔ̈c ɛn, aya lueel an, “Yɛn cï bï bɛ riɔ̈ɔ̈c anandï.

⁷ Bɛ̈nydït, yïn piɛth piɔ̈u we yɛn, yïn ee ya kony cï gëlgël de kuur. Ku të cï yïn yïnyin thiaan në yɛn, yɛn ee riɔ̈ɔ̈c.

⁸ Yïn cä cɔɔl Bɛ̈nydït, läŋ yïn bä a kony.

⁹ “Eeŋö piɛth bï yök në thondï yic, lɔdï rɛɛŋ bï yï yiɛ̈n ŋö? Bï kɔc cï thou yï leec? Bïk kake piɔ̈nduön adöt luɛɛl?

¹⁰ Piŋ këdï Bɛ̈nydït ku kokëpiɔ̈u we yɛn! Kony yɛn Bɛ̈nydït!”

¹¹ Yïn cï dhiënëpiɔ̈ndï puk ke ye cöŋ, yïn cï jiɛthëpiɔ̈ndï nyaai ku waar në miɛtëpiɔ̈u.

¹² Yɛn cïï thok bï mim, yïn bä leec. Bɛ̈nydït Nhialicdï, yïn bä leec aɣet athɛɛr.