Diɛt 17 - JAM DE NHIALIC 2011

Lɔ̈ŋ de Raan Cïn kë cï wööc

¹ Piŋ lɔ̈ŋdï Bɛ̈nydït yɛn lip yic, gɔk lɔ̈ŋdï yic apiɛth yɛn läŋ kuɔɔny! Piŋ lɔ̈ŋdiën cïn yic ruëëny.

² Aa ŋic nɔn ciɛ̈n ɛn guöp awäc, në luɔi ŋic Yïn yic.

³ Yïn ŋic a piɔ̈u. Yïn ee ya neem wakɔ̈u, Yïn cï a them arëët, acïn rɛ̈ɛ̈c cï yök në ya guöp,

⁴ acïn awäny ya bɛ̈ɛ̈i bei në yathok, yɛn ë lööŋku döt, ka yɛn kën kueer de kɔc ke akuöörkuöör kuany yic.

⁵ Kë cï lɛ̈k ɛn acä looi ëbɛ̈n, ku yɛn kën rɔt wony në luɔidu yic.

⁶ Yïn läŋ Nhialic, në luɔi ŋiɛc ɛn en nɔn bï Yïn a piŋ thok, ka Yïn piŋ këdiën luɛɛl.

⁷ Nyuöthë ya nhiëërduön agɔk gɛ̈ɛ̈iyë ku kony ɛn, në luɔi Yïn kɔc cï gam kony në riɛldu në kɔc ke aterden.

⁸ Gël ɛn Bɛ̈nydït cït man ye raan yenyin gël, thian ɛn në atïm de Yïn wuök,

⁹ kony ɛn në mɛk de kɔc ee karɛc looi, kony ɛn në kɔc de ater në yɛn, kɔc cï ya geeu.

¹⁰ Acïkï piɔ̈ɔ̈th ee kok, ku ayek jam në lɛc.

¹¹ Acïk ɛn geeu ëbɛ̈n agut të cän a nɔm wɛl, akɔɔrkï kë bï kek a wit.

¹² Acïtkï kɔ̈ɔ̈r cï wäth akɔɔrkï nääk abuthkï ya cït kɔ̈ɔ̈r.

¹³ Bä Bɛ̈nydït, bä göth we kɔc ke aterdï ku tiam ke! Bä luäkë ya bei në kɔc rac cin në abätäudu,

¹⁴ luäkë ya bei në kɔc de nïïm këriëëc kɔɔrkï ëbɛ̈n ee pinyë nɔm. Luöiyë keek këtuc në nuɛɛn cï kueet ë biäkden, tɔ mïthken yök nuan rɔ̈ŋ ke keek ku dɔ̈ŋ biäk ke mïth ke mïthken.

¹⁵ Ku yïn bä tïŋ në luɔi ë piathëpiɔ̈u cä looi, na la lɔ pääc, yɛn bï piɔ̈u miɛt në dhuëëŋdu.