Diɛt 115 - JAM DE NHIALIC 2011

Nhialic Töŋ Yic

¹ Ee Yïn Yïtök, Yïn Bɛ̈nydït, ee Yïn tök, ku acie wook, bï gäm dhuëëŋ, në biäk de nhiëërduön agɔk kekë piɔ̈nduön adöt.

² Eeŋö ye juöör ke pinynɔm wook thiëëc an, “Nu Nhialicdu ë nou?”

³ Nhialicda anu paannhial, ee këdɛn kɔɔr looi.

⁴ Yiëthken acï keek cuëëc në ateek ku adhääp, thɛ̈ɛ̈th ë raan keek ë yecin.

⁵ Adekï kethook, ku acïkï ee jam, ku nyïïn, cie daai.

⁶ Adekï yïth, ku acïkï ee piŋ, ku dekkï wuum, ku acïkï ee ŋör.

⁷ Ku adekï cin, ku acïn kë yek yökic, ku cök, ku acïkï ee cath, ku acïn këdɛn ye piŋ.

⁸ Në raan ëbɛ̈n raan ee yiëth looi ku kɔc ee keek ŋɔ̈ɔ̈th abïk ciët ee yiëthkɛn cïn naamden.

⁹ Wek kɔc ke Yithriɛl, yak Bɛ̈nydït ŋɔ̈ɔ̈th! Ee konyden ku ye könden.

¹⁰ Wek bäny ke kake Nhialic yak Bɛ̈nydït ŋɔ̈ɔ̈th! Ee konyden ku ye könden.

¹¹ Yak Bɛ̈nydït ŋɔ̈ɔ̈th, wek kɔc ee Yen lam wedhie! Ee konyden ku ye könden.

¹² Bɛ̈nydït ee wook tak ku thieei wook, abï baai de Yithriɛl thieei, ku bäny de kake Nhialic kedhie.

¹³ Ku abï kɔc kedhie thieei kɔc ee Yen riëëu guöp, röördït ku mïth akït.

¹⁴ Bɛ̈nydït abï piɔ̈u kok ku gëm yïn mïth yïn wekë kuatdu!

¹⁵ Athiɛɛi de Bɛ̈nydït abï tɔ̈u ke yïn, raan ë cak paannhial kekë piny!

¹⁶ Paannhial ee këde Bɛ̈nydït yetök, ku acï piny gäm mɛnh ë raan bï cieŋ.

¹⁷ Bɛ̈nydït acie leec në kɔc cï thou, ayï raan cï lɔ piny paan ë thuɔɔu.

¹⁸ Ku wook, wok kɔc pïïr, abuk dhil gäm lɛc, ënɔɔnë aɣet athɛɛr. Thiɛikï Bɛ̈nydït!