Diɛt 109 - JAM DE NHIALIC 2011

Gööny de Raan cï Nuan

¹ Nhialic Yïn bä leec, du rɔt pɛ̈l piny ke Yï mim!

² Kɔc rac ku kɔc ee lueth töör acïk ya mak. Ayek lueth töör ë biäkdï,

³ ku ayek yɛn luɛ̈l guöp kërac, ayek ya mak ke cïn kë cä looi.

⁴ Ayek yɛn rɛɛc, cakaa nɔn nhiaar Yɛn keek ku yɛn cï lɔ̈ŋ ë biäkden.

⁵ Ayek këpiɛth cä looi cool nɔm në kërac, ku tɛ̈ɛ̈ukï män ë nyin ë nhiëëric.

⁶ Kuany bɛ̈ny ke luk rac bïk löŋ de kɔc ke aterdï guiir, ku tɔ raan töŋ de kɔc de kek ater gɛɛny en.

⁷ Të guiirë löŋde, tɔ yök ke de guöp awäc, ku tɔ lɔ̈ŋde ee kë cïn naamde!

⁸ Tem pïïrde kɔ̈u ku tɔ raandäŋ nɔ̈m luɔide!

⁹ Tɔ mïthke ee mïth abɛɛr, ku tɔ tiiŋde ee tiiŋ abaar!

¹⁰ Tɔ mïthke ee kɔc ee kuïïn lim cïn nïïm ɣööt, tɔ keek copë wei tëdɛn cï riääk cieŋkï!

¹¹ Tɔ kɔc käny yen nɔ̈m kake kedhie, ku tɔ alɛi nɔ̈m kake luɔiden kedhie.

¹² Në ë cïn raan kok piɔ̈u kekë yen ku nɔn kok piɔ̈u kekë mïthkɛn abɛɛr cï keek nyääŋ piny.

¹³ Ku kɔc ke dhiënde abïk aa thou, ago rinke määr ë kɔc nïïm, kɔc bï lɔ̈ɔ̈k bɛ̈n ë yecök ciëën.

¹⁴ Bɛ̈nydït acï nɔm bï määr në kërac cï kuarken keek looi, ku acïï man bï päl karɛc cï ke looi.

¹⁵ Bɛ̈nydït abï awɛ̈ɛ̈cken cïk looi aa tak aköölnyïïn kedhie, ku tɔ kɔc mär nïïm në keek liŋliŋ!

¹⁶ Ku raan acïï piɔ̈u ee kok, ee kɔc yɔŋ ku nɛ̈k kɔc kuanynyïïn, ku kɔc cïn käŋ, ku kɔc cïn kë lëukï.

¹⁷ Anhiaar aciɛɛn, ku tɔ aciɛɛn lööny ë yekɔ̈u! Aman bïï athiɛɛi gam, tɔ cïn raan gëm en athiɛɛi!

¹⁸ Yen ee kɔc cieen aköölnyïïn cït man yen lupɔ cieŋ, tɔ aciɛɛnde dëu ë yeguöp cït man ë pïïu ku lekï ë yomke yiic cït man ë miök.

¹⁹ Tɔ kumkï kɔ̈u cït man ë lupɔɔ, ku bïï duööt ë yekɔ̈u ë cieŋ cït thiööth!

²⁰ Bɛ̈nydït luöiyë kɔc de ater ë yɛn këtuc cït ee kënë, kɔc ee karɛc luɛɛl ë yaguöp!

²¹ Bɛ̈nydït Awärjäŋ, muk yɛn cït man cï yïn gutguut lueel, Ku kony yɛn në biäk de nhiëërduön agɔk.

²² Yɛn ee raan kuany nyin ku ciën nɔm käŋ, ku yɛn cï piɔ̈u riääk ë biäk thïn.

²³ Yɛn kɔɔr bä määr cït atïm athɛ̈i, yɛn ee biäk wei cït kɔ̈m.

²⁴ Yɛn cï miɔl kɔ̈c në baŋ de reec de cäm, ka yɛn cï döŋ ke ya ye dël ku yom.

²⁵ Të ye kɔc yɛn tïŋ, ayek yɛn bui guöp, ayek kenïïm bet ku dɔlkï yɛn guöp.

²⁶ Muk yɛn aril, Bɛ̈nydït Nhialicdï, kony yɛn, në biäk de nhiëërduön agɔk!

²⁷ Bɛ̈nydït tɔ ŋic ë kɔc ke ater nɔn ee Yïn ë kony yɛn.

²⁸ Abïk yɛn aa cieen, ku Yïn bï yɛn aa thieei. Tɔ ya tiaam kɔc ee yɛn yɔŋ, ku tɔ yɛn mit piɔ̈u yɛn awundu.

²⁹ Tɔ kɔc ke aterdï thiäŋ gup në ayäär, tɔ ke ceŋ ayärden cït aluluut,

³⁰ Bɛ̈nydït abä gäm lec në röldït, abä piɔɔny në amatnɔm de kɔcke yiic,

³¹ në biäk bï yen kɔc kuanynyïïn gël ku kony ke në kɔc ee ke nɔ̈k.