Diɛt 107 - JAM DE NHIALIC 2011

Awerek de Dhïc ( Diɛt 107–150 ) Lɛc de Piath de Bɛ̈nydït

¹ “Gämkï Bɛ̈nydït lɛc, në biäk de piathde, ku nhiëërdɛn agɔk atɔ̈u athɛɛr!

² Yak wëlkë nyɔk yiic, ke we piɔny Bɛ̈nydït, wek kɔc cï keek kony wëi wedhie. Acï week luök tëde kɔc ke aterdun,

³ ku puk wenïïm ciëën në wuöt ke juöör yiic, në biäk të lɔ aköl amiäk ku biäk të lɔ aköl athɛ̈i, ku biäk të lɔ rut ku biäk të lɔ wöuwic.

⁴ Kɔc kɔ̈k aake ye tai ë jɔ̈ɔ̈r cïn yic kuɛɛr ku cïn kueer yökkï bï kek lɔ cieŋ në pɛ̈ɛ̈nydït yiic.

⁵ Aake ye cɔk keek nɔ̈k ku reu, ka cïn kë bekï ŋɔ̈ɔ̈th.

⁶ Na wën, aa cïk nuan ke ke cɔl Bɛ̈nydït, go keek kony në nuanden yic.

⁷ Acï keek tɔ kuany kueer lɔ cit yic lekï ë pänydït bïï kek lɔ rëër thïn.

⁸ Abïk Bɛ̈nydït dhil leec në biäk de nhiëërdɛn agɔk, në biäk de kagɛ̈iyë cï looi.

⁹ Bɛ̈nydït ee kɔc cï yal miɔɔc ë pïïu, ku tɔ kɔc nɛ̈k cɔk tɔ kueth ë kacaam ku kapiɛth ëbɛ̈n.

¹⁰ Kɔc kɔ̈k aake rɛ̈ɛ̈r të col ku cïk nïïm mum, kɔc cï mac rɛk në joth,

¹¹ në biäk cïï kek löŋ de Nhialic Awärjäŋ rɛɛc ku reeckï wëëtde.

¹² Ku keek acïk nɔl në luɔi ril yek looi, yek wïïk piny, ku acïn raan ee keek kony.

¹³ Të de yen nuandɛn cï ke yök ayek Bɛ̈nydït cɔɔl ku kony keek në nuanden yic.

¹⁴ Ku abï Bɛ̈nydït ke bɛ̈ɛ̈i bei ë mɔ̈ɔ̈thic ku mum ë nɔmic ku dhoŋ joth mɛc kek abïk lɔ thorthor.

¹⁵ Abïk Bɛ̈nydït dhil lɛc nɔm, në biäk ë nhiëërdɛn agɔk, në biäk de ka gɛ̈iyë cï ke luöi keek.

¹⁶ Bɛ̈nydït acï athïïn ke maläŋ dhuɔŋ piny ku dhoŋ gɛ̈ɛ̈rgɛ̈ɛ̈r de wëth kɔ̈ɔ̈th.

¹⁷ Kɔc kɔ̈k ayek dhän de gup juäi, në biäk de kërac cïk looi, ku në biäk de racden,

¹⁸ adhɛl ë kɔ̈ɔ̈r ë këcam keek ku acïk thiɔ̈k ë thuɔɔu.

¹⁹ Ku ëtɛ̈ɛ̈n në nuanden yic acïk Bɛ̈nydït cɔɔl, go ë Bɛ̈nydït keek kony wëi në nuanden yic.

²⁰ Acï ë Bɛ̈nydït ke tɔ dem në löŋde ku kony keek ë raŋ thok agokï cuö thou.

²¹ Abïk Bɛ̈nydït dhil lɛc nɔm në biäk ë nhiëërdɛn agɔk, ku në biäk de ka gɛ̈iyë cï luöi keek.

²² Abïk Bɛ̈nydït dhil gäm miɔ̈c de thieithieei, ku në diɛt ke miɛtëpiɔ̈u abïk ka cï looi kedhie nyuɔɔth.

²³ Kɔc kɔ̈k ayek cath në abëël ke abäpdit yiic, amukkï röt në ka yek yök ë wɛ̈ɛ̈r yic.

²⁴ Gokï ka cï ë Bɛ̈nydït ke looi tïŋ, kakɛn ke gäi nu ë wɛ̈ɛ̈r yic.

²⁵ Bɛ̈nydït ë löŋ lueel, go amaŋdït rɔt gap nhial, ku tɔ apiök ke wɛ̈ɛ̈r lɔ jäŋjäŋ.

²⁶ Ago abëël jäp nhial ë yomic ku cut keek piny tëthuth. Në kërɛɛc cït ee kënë kɔc abël wïïr kuath ayek riɔ̈ɔ̈c,

²⁷ Ayek kɔ̈th ku tuëkkï cï kɔc cï miɔ̈l ë mɔ̈u, riɛlden ëbɛ̈n ciɛ̈n naamde.

²⁸ Ayek Bɛ̈nydït cɔɔl ë nuanden yic ëtɛ̈ɛ̈n, ku aye ke kony ë nuanden yic.

²⁹ Bɛ̈nydït ë amaŋ tɔ lɔ dïu, ku tɔ apiök ke wɛ̈ɛ̈r tɔ lɔ lik.

³⁰ Agokï piɔ̈ɔ̈th miɛt në biäk cï piny lɔ dïu, ku acïï Bɛ̈nydït keek bɛ̈ɛ̈i apiɛth wath thok.

³¹ Abïk Bɛ̈nydït dhil lɛc nɔm në biäk ë nhiëërdɛn agɔk, në biäk de ka gɛ̈iyë cï luöi keek.

³² Abïk dïtde luɛɛl në akutnɔm de kɔc nïïm, ku bïk aa leec në amatnɔm de röördït nïïm.

³³ Bɛ̈nydït acï kiɛɛr tɔ ye jɔ̈ɔ̈r, ku tɔ nyïïn tɔ kääc ke ke cïï be wat.

³⁴ Piny ee ŋiëc luɔk acï tɔ ee piny de yic dhiai, në biäk de rɛ̈ɛ̈c de kɔc ceŋ ëtɛ̈ɛ̈n.

³⁵ Bɛ̈nydït acï jɔ̈ɔ̈r puk ke ye të de yic awuul ke pïïu ku tɔ piny cï riɛl de yic awɛɛŋ ee wat ë pïïu.

³⁶ Bɛ̈nydït abï kɔc de gup cɔk tɔ nyuc ëtɛ̈ɛ̈n, ku abïk pänydït bïk cieŋ yïk thïn.

³⁷ Acïk duum com ku comkï enap ku tetkï mïth ke tiim juëc cï luɔk.

³⁸ Bɛ̈nydït ë kɔcke gäm athiɛɛi, agokï dɛ mïth juëc, acï lunydɛn ë ɣɔ̈k tɔ lɔ ke ŋuak yenyin.

³⁹ Na wën, cï kɔc ke Nhialic tiaam ku dhäl keek gup në kɔc rac ee kɔc yɔŋ,

⁴⁰ acï kɔc yɔŋ keek bɛ̈n nyuöth agɔ̈th ku tɔ keek tɔ tai në jɔ̈ɔ̈ric, jɔ̈ɔ̈r cïn yiic kuɛɛr.

⁴¹ Bɛ̈nydït ee kɔc kuanynyïïn kony ë nuanden yic, ku tɔ dhiënken tɔ kɛɛr abïk ciët ɣɔ̈k.

⁴² Aye kɔc lɔ piɔ̈ɔ̈th wai tïŋ agokï piɔ̈ɔ̈th miɛt, ku kɔc ke rɛ̈ɛ̈c ëbɛ̈n abïï ke miɛɛm thook.

⁴³ Na de kɔc pel nïïm abïk ee kake cätic apiɛth, ku në ke cï nïïm määr ë Bɛ̈nydït abïk nhiëërdɛn agɔk tak.