Diɛt 104 - JAM DE NHIALIC 2011

Në piɔ̈ny de Aciëk

¹ Wek wëikï, thiɛikï Bɛ̈nydït! Yïn Bɛ̈nydït, Nhialinydï, eeŋa thöŋ ke Yïn! Yïn cï kuöm piny në bääny ku dhuëëŋ,

² Yïn cï rɔt kuöm piny në ɣɛɛr. Yïn cï paannhial thiɛth piny cït man ë paany

³ ku yïk ɣöndu nhial ë pïïu nïïm. Yïn ë luät looi ke ye abël ë tɔŋ, ku ye cath ë wuök ke yom kɔ̈ɔ̈th.

⁴ Yïn ee yom tɔ ye tuucku, ku tɔ biöl ë wilëdeŋ ee awuutku.

⁵ Yïn cï pinynɔm tääu ë këërkëërde yic, ku acïï bï wony tëde anande.

⁶ Yïn abäpdit tääu ë yenɔm cït awiɛɛi, ku jɔ pïïu kur kum nïïm.

⁷ Të cï Yïn pïïu jɔ̈ɔ̈ny ayek kat, ayek jäl të cïï kek röl ë löŋdu piŋ.

⁸ Ayek wat ë kur nïïm lekkï ë wɛ̈k yiic, lekkï të cï luöi keek.

⁹ Yïn cï akeu cïï duëër lïïr nɔm tääu ë kɛmken, ke ke cïï pinynɔm bï bɛ thiɔ̈ɔ̈ŋ nɔm.

¹⁰ Yïn cï awɛɛŋ ke pïïu tɔ wɛt ë wɛ̈k yiic, ku ye kiɛɛr kat ë kɛm ke kur kor yiic.

¹¹ Ayek läi roor tɔ yök pïïu, yen ëtɛ̈ɛ̈n yen aye mul roor renden nyaai.

¹² Ku në tiim thiɔ̈k ëtɛ̈ɛ̈n, diɛt ayek ɣöötken looi ku jɔkï ket.

¹³ Yïn ë deŋ tooc nhial ke bï kur kor tuɛ̈ny nïïm, ago pinynɔm thiɔ̈ɔ̈ŋ në athiɛɛidu.

¹⁴ Yïn ee wal tɔ cil në biäk de läi, ku ayät bïï ë mɛnh ë raan aa puur, agokï rɔt cuöm kɔ̈th piny bïk cam

¹⁵ ago mɔ̈u luɔk ke bï ke tɔ mit piɔ̈ɔ̈th, ku miök de olip ee ke tɔ lɔ piɔ̈ɔ̈th yum, ku kuïn bï ke gäm riɛl.

¹⁶ Tiim ke Bɛ̈nydït aye ke piɔɔk në pïïu, tiim ke thidar de Lebanɔn wään cï ke com.

¹⁷ Yen aye diɛt ɣöötken yïk ë yenɔm, ku ɣön ë jak anu ë tim de yic kuɔɔth nɔm.

¹⁸ Ku bɔɔth roor ayek rëër ë kur bär nïïm, ku alëu ee thiaan në kɛm ke kur.

¹⁹ Yïn cï pɛɛi looi ke bï pɛ̈i aa nyuɔɔth, ku akɔ̈l aŋic kaam bï en lɔ piny.

²⁰ Yïn cï wakɔ̈u cak, ku yen ee mɔ̈ɔ̈th yen ye läi roor kedhie jɔ bɛ̈n biic.

²¹ Kɔ̈ɔ̈r ayek cath ke ke kïïu të le kek yäp, lek köör ë këcam cï Nhialic yiɛ̈n keek.

²² Ku të cï akɔ̈l thok bɛ̈n, ke ke jɔ kenïïm dak tëdɛn ye kek tɔ̈c.

²³ Ku lɔ kɔc biic tëdɛn ë luɔi ku loikï luɔi agut thëën

²⁴ Bɛ̈nydït, Yïn cï kajuëc looi! Acï ke looi kedhie në pɛlënɔm! Pinynɔm acï thiäŋ kekë läiku.

²⁵ Abäpdit atɔ̈u, ke dït ku alääu yic, të ye läi cï lëu ë kuɛ̈n ceŋ thïn, kadït ku kakor akït.

²⁶ Abëël wïïr ayek cath ë pïïu nïïm, ku thuɛ̈ɛ̈c ŋuäl dïït cï cak ë pïïu yiic aya, ku lɛ̈n dïït tɔ̈u wïïr ee Yïn aa cak en.

²⁷ Keek kedhie atɔ̈ukï ë yïciin bä keek gäm këcam të kɔɔr kek yen.

²⁸ Aye keek miɔɔc, ku ciɛmkï, aye ke gäm këcam, ku ayek kuɛth.

²⁹ Të cïn keek nyääŋ piny, ayek riɔ̈ɔ̈c, ku të cïn wëiku jɔt ayek thou ku dɔkkï kenïïm në abuuidɛn wään bïï kek thïn.

³⁰ Ku të cï Yïn ke gäm wëi, ka acï keek cak, Yïn cï pïïr cï piac looi bɛ̈ɛ̈i ë pinynɔm.

³¹ Në dhuëëŋ de Bɛ̈nydït tɔ̈u aɣet athɛɛr! Në Bɛ̈nydït mit piɔ̈u ke ka cï ke looi!

³² Ee pinynɔm woi, go piny rɔt nieeŋ, ee kur jak, agokï tol ŋɔ̈k bei.

³³ Yɛn bï Bɛ̈nydït kɛ̈t diɛt në pïïrdï yic ëbɛ̈n, yɛn bï Nhialicdï leec në akööl piëër ɛn ëbɛ̈n.

³⁴ Në mit piɔ̈u ke diɛtkï, në biäk ye miɛtëpiɔ̈ndï bɛ̈n tëde Yen.

³⁵ Në kɔc ee kërac looi riɔ̈ɔ̈r nyïïn ë pinynɔm, kɔc rac acïkï bï bɛ nu. Wek wëikï, thiɛikï Bɛ̈nydït! Lɛckï Bɛ̈nydït!