Dhiëëu 4 - JAM DE NHIALIC 2011

Jeruthalem në Wïïkde Cök

¹ Adhääp acïï be lɔ riauriau, adhäm awai acï rɔt waar, kur ɣeriic ke Luaŋdït acï ke wɛɛr piny ë kuɛɛr yiic ëbɛ̈n.

² Dhuök ke Dhiɔn atuckï thook tëde wook cït man adhääp, ku ënɔɔnë aye keek luööi cït man ë tööny ë tiɔp ë cuëëc ciin.

³ Cakaa kɔ̈ɔ̈rgɔl ee mïthke muk. Ku kɔckï acïtkï wuut, yɔŋ mïthken ë jɔ̈ɔ̈ric.

⁴ Ayek mïthken tɔ thou ë cɔk ku rou. Mïth alipkï kuïn cïn raan bï ye gäm keek.

⁵ Kɔc ɣɔn cïï kuïn piɛth kɔn aa cam athoukï në cɔk ë kuɛɛr yiic. Kɔc ɣɔn muk keek ë pïïr lɔ läŋic, atëërkï kuïn cï cuat wei.

⁶ Kɔckï acï keek luöi këtuc, këtuc wär këtuc cï luöi kɔc ceŋ Thɔdom, kɔc ɣɔn yök duëër adur ë thiäu ë Nhialic cin.

⁷ Wɛ̈ɛ̈t meliikuɔ aake kënë dhiöök, aake lɔ top cït alath. Apiɛthkï gup, cï kɔi lɔ riauriau, ku yek jööt ril.

⁸ Ku ënɔɔnë ayek nïïn ë kuɛɛr yiic ke ke kuc, acïk nyïïn lɔ cut në thuɔɔu, acïk gup ril wei cït tiim, ka dël ë nuɛt ë yom kɔ̈ɔ̈th.

⁹ Kɔc cï thou ë tɔŋic aŋuänkï, në kɔc ë thou ciëën, kɔc ë thou ë määth ë cɔk ke cïn kuïn tɔ keek pïïr.

¹⁰ Riääk cï kɔckï yök acï riɔ̈ɔ̈cdït bɛ̈ɛ̈i, Diëër nhiaar mïth, acïk mïthken thaal ke ke ye kuïn.

¹¹ Bɛ̈nydït acï agönhdɛn tuc aläl wɛ̈lnɔm Dhiɔn, acï Dhiɔn ɣök many cï yen nyuɔp piny ayï këërkëërde.

¹² Acïn raan ë piny nɔm ëbɛ̈n, ayï bäny ke juöör, raan duëër ë gam nɔn duëër ë kɔc ke ater Jeruthalem yiɛ̈n tɔŋ.

¹³ Ku kënë ë rɔt looi, në biäk cïï tït ke Jeruthalem kërac looi, ku bäny de kake Nhialic adekï gup gääk de thon de kɔc cïn kë cïk wööc.

¹⁴ Bäny ke Jeruthalem ayek cath ë paarpaar ë kuɛɛriic cï cɔɔr, acïk riɔk në riɛm ka cïn raan duëër ke jak.

¹⁵ Ayek kɔc ke yöök, an, “Lak tɛ̈n, yïn cï dhiöök! Du ya jak! Ku jɔkï cath ë paarpaar, acï ke lɛɛr ë juöör yiic, ke cïn raan loor keek.

¹⁶ Bɛ̈nydït acïï be diɛɛr ë biäkden, yen guöp acï keek thiäi piny. Acïn riëëu kekë kokdepiɔ̈u ye nyuöth bänykuɔn ke kakë Nhialic ayï röördïtkuɔ.

¹⁷ Wok woi kuɔɔny cie bɛ̈n, wok cï daai abuk jɔ kɔ̈ɔ̈c në daai. Wok cï kuɔɔny tiit tëde jur cie kony.

¹⁸ Ku raan de ater aa woi wook, ka wok cïï duëër cath në kuɛɛr yiic. Nïnkuɔ acïk guɔ thök, ku jɔ thök bɛ̈n.

¹⁹ Acïk wook cuɔp piny, kɔc cop wook awärkï cor nu nhial në riŋ. Acïk wook cop ë kuur nïïm, ku jɔkï wook gïth ëthiäu ë jɔ̈ɔ̈ric.

²⁰ Acïk tëde pïïrda nööm, melik ë lɔc Bɛ̈nydït, raan ë ŋäthku në luöi bïï yen wo gël, të rëër wok ë juöör yiic.

²¹ Dalkï kɔc ke Edom ku Udh, miɛtëpiɔ̈u të lëu wek en ënɔɔnë. Riääkdun abɔ̈ ayadäŋ, yïn bï tuëk aya ke yï cïn kɔ̈u lupɔ në ayäär.

²² Nyan de Dhiɔn acï ariöp de kërɛɛcde cuat piny, Bɛ̈nydït acïï wook bï bɛ muɔ̈k ë pɛ̈cic. Ku Edom, Bɛ̈nydït abï yïn luöi këtuc, abï luɔiduön rac nyuɔɔth.