Danyel 6 - JAM DE NHIALIC 2011

Danyel Anu ɣön ë kɔ̈ɔ̈r

¹ Na ɣɔn ke Dariouth ë kuany bäny kabɔt ku thiërrou (120) ku tɛ̈ɛ̈u keek ë ciɛɛŋ nɔm, bïk aa tɔ̈u në ciɛɛŋ nɔm ëbɛ̈n.

² Ku jɔ Danyel kuany kekë kɔc kɔ̈k kaarou bïk bäny ke wuöt aa tiit ku bïk ka kɔɔr melik aa looi.

³ Ku ee kaamë yic Danyel acï tïc ke lëu luɔɔi apiɛth awär kɔc lui në yen ayï bäny ke wuöt kɔ̈k. Në baŋ ŋic en luɔi aläl, acï melik guiir nɔn bï yen en tääu në bääny ë ciɛɛŋde nɔm ëbɛ̈n.

⁴ Na wën ke kɔc ee bäny ke wuöt tiit ku lɔ bäny ke wuöt kɔ̈k, acïk them nɔn bï kek kë cïï piɛth yök në luɔi mɛc ë Danyel ciɛɛŋ, ku acïn awäny cïk bɛ̈n yök. Danyel aaye raan ye ŋɔ̈ɔ̈th ku acïn kërɛɛc ye looi, ku cïn këde ruëëny ye looi.

⁵ Gokï lueel kapäc an, “Acïn kë buk yök kë bï wok Danyel gaany, ee kueer këdɛn ye lam yetök.

⁶ Agokï lɔ tëde melik ku lɛ̈kkï yen an, “Melik Dariouth, yïn bï pïïr anandu!

⁷ Wook wodhie wok kɔc lui ë ciɛɛŋdu yic, kɔc ee bääny tiit, ku bäny ke wuöt, ku bäny ke tɔŋ ke wuöt, ku bäny kɔ̈k, wok cï gam në luɔi bï yïn löŋ tääu piny ku mac aril. Tääuwë löŋ piny an, në nïn yiic kathiërdiäk (30), acïn raan bïï tɔ de kë lɛ̈ŋ tëde yanhdäŋ, ayï raandäŋ, ee tëde yïn, yïn melik. Ku raan lɔ ee löŋë rɛɛc gam, abïï cuat adhumic, adhum cï thiäŋ ke kɔ̈ɔ̈r.

⁸ Ënɔɔnë yïn melik, tɔ löŋ ril ku gäär rinku në gääric, ku bïï dhil looi, ee löŋ de Mede kekë Perthia, löŋ cïï duëërë waar.

⁹ Ago melik Dariouth rinke gɔ̈ɔ̈r në gääric.

¹⁰ Na ɣɔn aacï Danyel ye ŋic nɔn cïï ë rin gäär thïn, go lɔ baai. Le ɣöndɛn nu nhial, ku awëërnyïïn ke ɣönde aake wel röt të lɔ Jeruthalem. Në awëërnyin ëtɛ̈ɛ̈n ee yemiɔl tuk, ku lɛ̈ŋ Nhialic raan diäk ë kööl tök, cït man yen e looi ë ceŋ.

¹¹ Go kɔc de ater në Danyel guëër, gokï yök ke läŋ ku pal ë Nhialic nɔm.

¹² Agokï lɔ tëde melik kedhie, lek Danyel gaany. Gokï lueel an, “Melik, yïn cï löŋ thaany an, në nïn yiic kathiërdiäk (30), na lɔ raan yanhdäŋ lɔ lam ayï raan däŋ, ke cie yïn yïtök, raanë abï cuat ɣön thiäŋ ke kɔ̈ɔ̈r. Go melik bɛ̈ɛ̈r an, “Ɣɛɛ, löŋ ril ëtör, löŋ de Mede ku Perthia, löŋ cïï duëërë waar.

¹³ Agokï ja lɛ̈k melik, an, “Danyel, raan töŋ ë kɔc wään pec ë Juda, acïï yïn ee riëëu ku acïï löŋ cï tääu piny ee theek. Ee cool ë läŋ raan diäk ë kööl tökic.

¹⁴ Na wën piŋ melik ee jamë, go piɔ̈u diu, ago them aläl në luɔi bï yen Danyel luök. Go kuɛɛr them ëcaŋwën abï akɔ̈l thëi.

¹⁵ Go kɔc de ater ë Danyel bɛ̈n ciëën tëde melik, ku lɛ̈kkï yen an, “Aŋic yïn melik, cït man de täu de lööŋ ke Mede ku Perthia, acïn löŋ ye melik tääu piny duëërë waar.

¹⁶ Go melik löŋ tääu piny luöi bïï ë Danyel dɔm, ago cuat ɣön cï thiäŋ ke kɔ̈ɔ̈r. Ago lɛ̈k Danyel, “Në Nhialicdu, raan ye luööi ë yïpiɔ̈u ëbɛ̈n kony yïn.

¹⁷ Go kuur tääu ë pul thok, ku tɛ̈ɛ̈u melik kitimdɛn ë bääny ku kitim de adhuëëŋke në kuur kɔ̈u, ago ciën kë bï rɔt waar në biäk de Danyel.

¹⁸ Na wën, ke melik ë puk rɔt baaide, ago ruu ke cïï nin, ku reec cäm ku cïï yenɔm keet.

¹⁹ Na wën adurduur ke piny ke melik ë ban yecök ke lɔ ë pul thok.

²⁰ Na wën cï en ɣet ee të wën nu ë Danyel ke cöt në riɔ̈ɔ̈c ku jiɛthëpiɔ̈u an, Danyel, lïm de Nhialic pïïr! Cï Nhialic ye luööi ë yïpiɔ̈u ëbɛ̈n yï lëu në kuny ë kɔ̈ɔ̈r thook?

²¹ Go Danyel bɛ̈ɛ̈r an, “Yïn bï pïïr athɛɛr, melik!

²² Nhialic acï tunynhialde tuööc bïï kɔ̈ɔ̈r bɛ̈n dɔm thook agokï ya cïï gëm buɔ̈t. Aa loi ee kënë në luɔi ciɛ̈n ɛn guöp awäc, ku acïn kërɛɛc cä luöi yïn, yïn melik.

²³ Melik acï piɔ̈u miɛt aläl ku yöök kɔc bïk Danyel miëët bei ë pul de kɔ̈ɔ̈r yiic. Agokï miëët bei, gokï tïŋ ke cïn guöp buɔ̈t taitai, në luɔi cï en Nhialic ŋɔ̈ɔ̈th.

²⁴ Na wën ke melik ë yöök kɔc bïk kɔc wään gɛɛny Danyel dɔm kedhie, agokï keek cuat ë pul yic, pul cï thiäŋ ke kɔ̈ɔ̈r, keek në diëërken ku mïthken ëtök. Ku të ŋoot kek ke ke kën guɔ ɣet ë pul thar piny, go kɔ̈ɔ̈r guɔ lööny në ke yiic ku dhuuŋkï yomken kedhie.

²⁵ Na wën ke melik Dariouth ë gɛ̈ɛ̈r awerek juöör ëbɛ̈n ku kɔc ëbɛ̈n ku thook ëbɛ̈n ë piny nɔm an, “Wek cä thiëëc!

²⁶ Acä lɛ̈k kɔc wundï ëbɛ̈n an, raan ëbɛ̈n ë ye riɔ̈ɔ̈c ku rïïu Nhialic de Danyel. “Yen ee Nhialic pïïr, ku abï piny cieŋ aɣet athɛɛr. Ciɛɛŋde acïï bïï riɔ̈ɔ̈k taitai, ku riɛlde acï kɔn thɔ̈k.

²⁷ Yen ee kony ku luɛ̈k, Yen ee göök looi ku looi kake gäi paannhial ku piny nɔm. Acï Danyel kony në luɔi bï ë kɔ̈ɔ̈r ye nɔ̈k.

²⁸ Go Danyel jɔ kuɛth në akööl ke bääny de Dariouth yic ku akööl ke bääny de Thairuth raan ë Perthia.