Danyel 5 - JAM DE NHIALIC 2011

Këcamdït de Belcadhar

¹ Na ɣɔn ke melik Belcadhar ë cɔl agum de kɔc adhuëëŋke, bïk bɛ̈n cam ë këcamdït ku dëkkï ë mɔ̈u.

² Ku të wën dëk kek ë mɔ̈u, go Belcadhar kɔc yöök, bïk cuöp ku aduuk kë adhääp ku ateek bɛ̈ɛ̈i, ka wään cïï ë wun Nebukadnedhar ke nööm Luaŋdït në Jeruthalem. Aake le melik keek tɔ bïïyë, ago bɛ̈n dek ë keek, yen ku adhuëëŋke ku diëërke, ku diëër määthke.

³ Agokï cuöp ku aduuk ke adhääp ku atek wään cï jɔt ë luaŋdïtic, ɣön ë Nhialic bɛ̈ɛ̈i raantök, agokï mɔ̈u jɔ dek në keek kedhie,

⁴ ku piɔnykï yiëth ë loi në adhääp, ku ateek, ku maläŋ, ku wëëth, ku tim, ku kuur.

⁵ Ee tëthiinë go ciin ë raan tïc ku jɔ gäär guɔ gɔl në päny de ɣön ë melik cï piiny kɔ̈u, të wën riɛɛu ë mɛ̈c ke alath aläl. Ku melik acï ciin tïŋ të wën gɛ̈ɛ̈r en.

⁶ Go nɔm mum aläl ku riɔ̈ɔ̈c arëk abïï lath cök.

⁷ Go cööt në luöi bïï ë kɔc bɛ̈ɛ̈i, kɔc ee cɔ̈ɔ̈r, ku kɔc ee lam, ku kɔc ee meek. Na wën cïk bɛ̈n ɣöt, go melik röör pelnïïm yɔ̈ɔ̈k an, “Na lɔ raan ë weyiic ya kuɛ̈n ee gäärë ku nyuth ɛn kë lueel abïï tɔ ceŋ lupɔ thiith amujuŋ de bääny ë melik, ku abï kuat de adhääp ë riëëu ceŋ ë yeyeth, ku abï ya raan de biäk ë bääny de pinydï yic.

⁸ Go röör pelnïïm ë melik bɛ̈n, ku acïn raan töŋ cï kë cï gɔ̈ɔ̈r bɛ̈n kueen ku nɔn nyuth en melik kë lueel.

⁹ Melik Belcadhar acï nɔm mum aläl në riɔ̈ɔ̈cdït, ku adhuëëŋke acïnkï nïïm kë lëukï në luɔi.

¹⁰ Go man melik, awuɔɔu piŋ, awuɔɔu looi ë melik kekë adhuëëŋke, ago bɛ̈n ɣön looiyë këcamdït thïn. Na wën ke lueel an, “Yïn bï pïïr athɛɛr melik! Yïn läŋ du piɔ̈u jeth ku du rɔt tɔ tiëc cï kë cï nɔm mum.

¹¹ Ade raan nu ë ciɛɛŋdu yic, raan tɔ̈u ë wëi ke Nhialic ɣeric në yen. Wään ye wuur melik, raanë acï ŋïnydekäŋ ku pɛlënɔm piɛth nyuɔɔth, pɛlënɔm cït këde yiëth. Ku melik Nebukadnedhar, wuur, ke yen, wään ye wuur melik, raanë acï wël piɛth bɛ̈n nyooth, ku ŋïnydekäŋ ku pɛlënɔm cït pɛlënɔm de yiëth, ku acïï wuur melik Nebukadnedhar bɛ̈n tɔ ye bɛ̈ny de kɔc ee thuëth, ku kɔc ee cɔ̈ɔ̈r, ku kɔc ee lam, ku kɔc ee meek.

¹² Ade nɔm ŋïnydït ku apelnɔm, ku aa tën de wër ë nyuuth yiic, ku ee meek tiiŋ nïïm, ku weer kacïmoony yiic, ka yïn duëër raan tuöc raan cɔl Danyel, ku acï melik cäk an, Beltecadhar, ku abï yïn lɛ̈k kë lueel ee kënë ëbɛ̈n.”

Danyel Awer kë Lueel ë Gäär

¹³ Go Danyel guɔ lɔ bɛ̈ɛ̈i raantök të nu ë melik thïn, go melik lɛ̈k en an, “Ee yïn Danyel, raan ë Judai wään cï peec ku bïï ë wäär melik ë Juda?

¹⁴ Acä piŋ nɔn tɔ̈u ë wëi ke Nhialic ɣeric ke yïn, ku yïn atët, ku de yï ŋïnydekäŋ ku pɛlënɔm.

¹⁵ Ago röör pelnïïm ku kɔc ee cɔ̈ɔ̈r lɔ bɛ̈ɛ̈i, bïk kë cï gɔ̈ɔ̈rë bɛ̈n kueen ku nyuthkï yɛn kë lueel, ku akɛ̈nkï kë lueel bɛ̈n ŋic.

¹⁶ Ku ënɔɔnë acä piŋ nɔn yïn löŋ cï thiaan yökic ku wer kacïmoony yiic. Na duëërë kë cï gɔ̈ɔ̈rë kuɛ̈n ɛn ku lɛ̈kë yɛn kë lueel, yïn bï tɔ ceŋ lupɔ thith amujuŋ de bääny, ku ceŋ kuat ë adhääp de riëëu në yïyeth ku yïn bï aa raan de diäk ë riɛl ë ciɛɛŋde yic.

¹⁷ Go Danyel bɛ̈ɛ̈r an, “Muɔ̈kë miɔ̈cdu rɔt ku nɔn bä ke gäm raandäŋ pei, ku yïn bä kuɛ̈n kë cï gɔ̈ɔ̈r, ku lɛ̈k yïn kë lueel.

¹⁸ “Nhialic dït acï wuur Nebukadnedhar tɔ ee melik dït, ku gëm dhuëëŋ ku riëëu.

¹⁹ Aa dït aläl ka kɔc ke wuöt ë piny nɔm ëbɛ̈n, ku juöör, ku dhiën ku thook, aake ye riɔ̈ɔ̈c në yen abï ke lath. Na kɔɔr bïï raan nɔ̈k, aye nɔ̈k, ku na kɔɔr bïï raan tɔ pïïr aye tɔ pïïr. Raan kɔɔr bï riëëu ayï riëëu ku raan kɔɔr bï yɔ̈ɔ̈r aye yɔ̈ɔ̈r.

²⁰ Ku në luɔi cï yen rɔt lɛɛc, ku riil nɔm ku ye kɔc yɔŋ, acï bɛ̈n nyaai në thööcdɛn ë bääny yic, ku mɛ̈l ë tëdɛn ë dhuëëŋ.

²¹ Acï bɛ̈n cuɔp wei në kɔc yiic, ku nɔmde acï bɛ̈n ciët tɔ̈u de lɛ̈i. Acï rëër ke mul roor. Ku nyuɛ̈ɛ̈th wal cï lɛ̈i, ku niin roor ke cïn kë kum yen yekɔ̈u në thɛ̈c. Na wään ciëën ke jɔ gam nɔn muk ë Nhialic dït ciɛɛŋ de kɔc ke pinynɔm ëbɛ̈n ku aduëër ke gäm raan cï tak ë yepiɔ̈u.

²² “Ku yïn wënde, yïn kën rɔt kuɔɔr piny cakaa nɔn ŋic yïn ee kakë kedhie.

²³ Yïn cï kërac luöi Bɛ̈nydït de paannhial abä cuöp ku aduuk ë nöm keek ë Luaŋdït yic bɛ̈ɛ̈i. Ku dek mɔ̈u ë ke yiic, yïn wekë adhuëëŋku, ku diëërku, ku diëër määthku, ku jakï yiëth lɛc nïïm, yiëth ë loi, në adhääp, ku ateek, ku maläŋ ku wëëth, ku tiim ku kuur, yiëth cïï duëër daai ku cïkï pïŋ, yiëth cïn kë ŋickï taitai. Ku yïn kën Nhialic riëëu, Nhialic ŋic luöi duëër yïn pïïr ku nɔn bä thou, ku yen amuk këriëëc ye looi ëbɛ̈n.

²⁴ Yeka cïï Nhialic ciin tuɔɔc bïï ë wëlkë bɛ̈n gɔ̈ɔ̈r.

²⁵ “Kën ë gɔ̈ɔ̈r kï: ‘Kuɛ̈n, kuɛ̈n, thëm, tëŋ ë yic.’

²⁶ Ku kë lueel kï: Nhialic acï nin bï ciɛɛŋdu thök kueen, ku acï jɔ tɔ thök thok.

²⁷ Thëm, acï yïn them në kë ye käŋ them, ku yïn cï yök ke yï piɔl,

²⁸ Tëŋë yic, ciɛɛŋdu acï tekic ku acï gäm Mede ku Perthia.

²⁹ Go Belcadhar kɔcke yöök raantök, bïk Danyel yiɛ̈k kɔ̈u lupɔ thith amujuŋ ku bïk kuat ë adhääp de riëëu tääu ë yeyeth, ku tɔ ee raan de diäk ril në ciɛɛŋ ë bäänyde yic.

³⁰ Ku në ë wɛ̈ɛ̈r töŋë yic Belcadhar melik de Babilon acï bɛ̈n nɔ̈k.

³¹ Go Dariouth raan de Mede bääny dɔm, ku aaye run thiërdhetem ku rou (62).