Danyel 10 - JAM DE NHIALIC 2011

Nyuuth de Danyel ë Wɛ̈ɛ̈r ë Tigri Yɔu

¹ (Në ruöön de diäk wään ye Thairuth melik de Perthia, jam acï nyuöth Danyel, yen acɔl Beltecadhar aya, jam aaye yic, ku arilic aläl në luöi bï ë yen yökic, ku jam acï wɛ̈ɛ̈ric yen ë Nyuuth yic.)

² Ku në aköölkë, yɛn Danyel, yɛn aa dhiau në nïn kathiërrou ku tök yiic.

³ Acïn kuïn mit cä cam, ayï rïŋ, ayï pïïu, ayï mɔ̈u, acïn kë cä jak, ku yɛn kën tɔc abï nïn kathiërrou ku tök wan.

⁴ Na ɣɔn ye pɛɛi tueŋ thok thiërrou ku ŋuan në ruöönë yic, yɛn aa kääc në wɛ̈ɛ̈r dïït cɔl Tigri yɔu.

⁵ Guɔ nhial woi yic, aguɔ raan ceŋ lupɔɔ ke linɔn ku thiɔ̈nh de adhäm atop tïŋ.

⁶ Alɔ guöp bilbil cït kuur ë beril, ku yenɔm tueŋ aɣer ë top cït wilëdeŋ, ku nyïïnke ariaukï cït mac, ku ye diir kekë yecök alek bilbil cït maläŋ cï coth kɔ̈u, ku rölde ee awuɔɔu cït awuɔɔu ye kɔc juëc looi.

⁷ Ee yɛn aye raan töŋ ë tïŋ nyuuth. Kɔc ë rëër ë yɛn acïn kë cïk tïŋ, ku acïk riɔ̈ɔ̈c aläl abïk kat ku thiɛɛnkï.

⁸ Go yɛn nyääŋ ëtɛ̈ɛ̈n yatök, ke ya woi nyuuth ë gɛ̈iyë. Acïn riɛldiën be tɔ̈u, yɛn cï nyin waar, ka acïn raan duëër ya ŋic guöp.

⁹ Wën piɛŋ ɛn en röl, guɔ wïïk piny ka ya cï thöök, ku ja tɔ̈u piny ëtɛ̈ɛ̈n ke ya gut yanɔm piny.

¹⁰ Ago ciin rɔt ɣɔ̈ɔ̈k, ku dɔm ɛn ku jɔt ya nhial në yacök ku riɛny yacin, ku yɛn aa ŋoot ke ya lɛthë.

¹¹ Go tunynhial ya yɔ̈ɔ̈k an, “Danyel, Nhialic anhiaar yïn, jɔt rɔt ku piŋ kë lɛ̈k yïn apiɛth. Yɛn cï tuöc yïn. Wën cï yen ee kënë lueel, yɛn cï rɔt jɔt, ku ŋuɔɔt ke ya lɛthë.

¹² Ago jɔ lueel an, “Danyel, du riɔ̈c. Nhialic acï lɔ̈ŋdu piŋ, gɔl ë kööl tueŋ bï yïn rɔt kuɔɔr piny, në biäk bï yïn yöŋ de käŋ yiic yök. Yɛn aa bɔ̈ bä lɔ̈ŋdu bɛ̈n bɛ̈ɛ̈r.

¹³ Go tuny de wën melik de ciɛɛŋ de Perthia ya pɛ̈ɛ̈n në nïn kathiërrou ku tök. Ago Maikɔl, raan töŋ de bäny ke tunynhial bɛ̈n bïï yɛn bɛ̈n kuɔny, në biäk cïï ë yɛn nyääŋ Perthia ëtɛ̈ɛ̈n yatök.

¹⁴ Yɛn aa bɔ̈ bä yïn tɔ ŋic kë bï rɔt luöi kɔckun wadäŋ. Kënë ee nyuuth në biäk de wadäŋ.

¹⁵ Wën lueel en ee kënë, guɔ piny woi ke cïn kë luɛɛl.

¹⁶ Na wën ke tunynhial, cït guöp raan, ke riny yeciin tueŋ ku jiɛk yathok. Guɔ lɛ̈k en an, “Bɛ̈ny, nyuuthë acï yɛn tɔ kɔ̈c aläl, ka acïn luöi kɔ̈ɔ̈c ë lɛth lɛthë yɛn.

¹⁷ Yɛn cït lïm kääc ë bɛ̈nyde nɔm. Duɛ̈ɛ̈r jɔ jam adï wo yïn? Acïn riɛl ayï wëi lik cï döŋ në ya yic.

¹⁸ Ago yɛn bɛ nyɔk ë döm, guɔ rɔt yök ke ya ril.

¹⁹ Go lueel an, “Nhialic anhiaar yïn, ku du tɔ de kë diir yïn, ku du riɔ̈c. Wën cï yen ee kënë lueel, aguɔ rɔt yök ke ya ril aläl, aguɔ lueel an, “Bɛ̈ny, lɛ̈kë yɛn kë kɔɔr bä lueel, yïn cï yɛn tɔ piɛth.

^20-21 Go lueel an, “Ŋic kën ë tɔ yɛn bɔ̈ tëde yïn? Ee luɔi bän yïn bɛ̈n nyuöth kë cï gɔ̈ɔ̈r në Awerek de Yith yic. Ku ënɔɔnë yɛn bï rɔt puk bä lɔ thɔ̈ɔ̈r wokë tuny ë wën melik de Perthia, ku të cän thök wokë yen, ke tuny de wën melik de Girikii abï bɛ̈n. Ku acïn raandäŋ bï ya kony në tɔŋdï wok ë keek ee Maikɔl yetök tunynhial de Yithriɛl.