Bɛ̈n 5 - JAM DE NHIALIC 2011

Mothe kekë Aron në Melik ë Rip Nɔm

¹ Go Mothe kekë Aron lɔ tëde melik ë Rip, lek lɛ̈k en an, “Acïï Bɛ̈nydït lueel, Nhialic de Yithriɛl an, ‘Tɔ kɔckï jäl, lek dhuëëŋ bïï kek Ɛn näk looi ë jɔ̈ɔ̈ric, dhuëëŋ bï Ɛn miët piɔ̈u.’ ”

² Go melik puk nɔm an, “Bɛ̈nydït eeŋa, ka yɛn duëër jamde jɔ piŋ, ku ta kɔc ke Yithriɛl jäl? Yɛn kuc Bɛ̈nydït, ku kɔc ke Yithriɛl acä ke bï tɔ jäl.”

³ Go Mothe puɔ̈k nɔm en kekë Aron an, “Nhialic de Ɣeberuu acï rɔt nyuöth wook, ka yïn pälë wo nïn kadiäk bïï wok cath ë jɔ̈ɔ̈ric, ke wo bï Bɛ̈nydït Nhialicda lɔ näk. Të kën wok E lɔ näk, abï wo nɔ̈k në jɔɔk ku nɔn yen tɔŋ.”

⁴ Go melik puɔ̈k nɔm keek an, “Eeŋö cäk tak, nɔn ja wek kɔc tɔ päl luɔiden? Dakkï wenïïm në luɔɔidunic.

⁵ Wek ë juëc awär kɔc ke Rip, ka akaarkï bäk kɔc tɔ päl luɔi.”

⁶ Ku ee kööl manë guöpde, melik ë bäny ke Rip bɛ̈n yɔ̈ɔ̈k, bäny yɔŋ kɔc ke Yithriɛl, ku yöök kɔc ke Yithriɛl cï tääu në lïïm nïïm an,

⁷ “Duökï lïïm be gäm anin looi kek thoop. Pälkï ke alɔ aninden kɔɔr kapäc.

⁸ Ku takï ke loi kuën cït kuën yek looi ë caŋawään. Na cakaa thom tök ë cïï dak. Acïn luɔi dïït loikï, yen aye kek cool ë lueel kek en an, ‘Tɔ wo jäl lok Nhialicda näk.’

⁹ Gämkï ke luɔɔi tuc, ke ke bï ya luui ë cieŋ ke ke cïï lueth bï bɛ aa piŋ.”

¹⁰ Ago bäny ke lïïm jäl, mɛ̈tkï në kɔc ke Yithriɛl cï tääu në lïïm nïïm, lek lɛ̈k kɔc ke Yithriɛl an, “Acïï melik lueel an cïï we bï bɛ aa yiɛ̈n anin.

¹¹ Në yen aa bäk anindun aa kɔɔr wapäc alɔ të bä wek en lɔ yök thïn. Ku we bï ŋoot ke we ye kuën ë thoop looi cït man wään ya wek en looi ë caŋawään.”

¹² Ago kɔc thiëi Rip ëbɛ̈n lek anin kɔɔr.

¹³ Ku aaye bäny ke lïïm keek rɛ̈liic an, “Thɔ̈lkï luɔi, luɔikï kuën cït kuën wään yak kɔn looi, wään ye we yiɛ̈n anin.”

¹⁴ Go bäny ke lïïm kɔc ke Yithriɛl cï tääu ë lïïm nïïm dui, ku lëkkï keek an, “Eeŋö kɛ̈n wek kuën ë thop cït kuën wään tueŋë looi?”

¹⁵ Ago kɔc ke Yithriɛl cï tääu ë lïïm nïïm gööny në melik nɔm an, “Eeŋö lui yïn wook ee kënë, bɛ̈ny?

¹⁶ Anin acie bɛ gäm wook, ku aye lɛ̈k wook an loiku thoop. Wok cï dui, ku ee yïn ade ee kënë ëbɛ̈n.”

¹⁷ Go melik puk nɔm an, “Wek liriic, wek cïï luɔɔi kɔɔr. Yen aya wek e lueel an, ‘Tɔ wo jël lok Bɛ̈nydït näk miɔ̈c.’

¹⁸ Dakkï wenïïm ë luɔɔi yic ënɔɔnë? Acïn anin bï ya gäm week, ku wek bï kuën ë thoop wään yak looi aa ŋoot ke luɔikï.”

¹⁹ Ago kɔc ke Yithriɛl cï tääu ë lïïm nïïm ye ŋic nɔn cï kek lɔ në wëliic, nɔn cïï ye lueel an bïk kuën cït kuën wään aa ŋoot ke loikï aköölnyïïn ëbɛ̈n.

²⁰ Na wën aa bïk bei tëde melik, ke ke yök Mothe akääc kekë Aron ke ke tiit kɔc ɣöt.

²¹ Agokï lɛ̈k Mothe kekë Aron an, “Bɛ̈nydït ë kë cäk looi tïŋ, ku abï we luöi këtuc, në luɔi cä wek melik tɔ man wook kekë bänyke. Acäk keek gäm kueer bï kek wo nɔ̈k.”

Mothe Agööny Bɛ̈nydït

²² Ago Mothe yenɔm bɛ puɔ̈k Bɛ̈nydït, ku lëk En an, “Bɛ̈nydït, eeŋö looi Yïn kɔcku arac? Ka eeŋö tuuc Yïn ɛn eenë?

²³ Të cän ajam wokë melik në këdu, melik ee kɔc jɔ luööi arac. Ku acïn kë cï looi kony Yïn keek!”