Bäny 14 - JAM DE NHIALIC 2011

Thamthon ku nyan wun ë Timena

¹ Na ɣɔn ë kööl tök, ke Thamthon ë lɔ piny ë Timena, go nyan ë kɔc ke Pilithiin tïŋ.

² Wën puk en rɔt, go lɛ̈k wun ku man, an, “Yɛn cï nyan ë kɔc ke Pilithiin tïŋ ë Timena ku ë ya diir. Lak yiɛ̈nkï yɛn ënɔɔnë bä thiaak.”

³ Go wun bɛ̈ɛ̈r kekë man an, “Cïn nyan piɛth duɛ̈ɛ̈rë yök në kɔc raan ë wook yiic ayï kɔc ke dhiën nu ë Yithriɛl? Eeŋö le yïn tëde kɔc ke Pilithiin, kɔc ee yiëth kɔ̈k lam, ku thiëk në ke yiic?” Go Thamthon lɛ̈k wun an, “Yiɛ̈në yɛn. Arɔ̈ŋ ke yɛn.”

⁴ Aa kuc ë wun kekë man nɔn yen Bɛ̈nydït yen tɔ Thamthon loi ee kënë, në baŋ kɔɔr ë Bɛ̈nydït kueer bï Yen tɔŋ looi kekë kɔc ke Pilithiin. Ɣɔn në aköölkë yiic Pilithiin aake ceŋ kɔc ke Yithriɛl.

⁵ Ago Thamthon lɔ Timena kekë wun ku man. Na jɔkï ɣëët ë duum ke enap ke Timena lɔ̈ɔ̈m, go aduur ë köör ŋäär ke bɛ̈k Thamthon.

⁶ Go riɛl ë Wëi ke Bɛ̈nydït bɛ̈n ë yeguöp, go köör ŋuany gëm ku reetic cït kë ret amɛthɔ̈kic, ke cïn kë muk ë yecin. Ku akën kë cï looi lɛ̈k wun kekë man.

⁷ Go lɔ wut ku jiɛɛm kekë tik, go Thamthon tik nhiaar.

⁸ Na wën ke puk e nɔm tik, go rɔt yal le guöp de köör wään cï nɔ̈k tïŋ, go miök ë kiëc lɔ yök ë köör cï thou kɔ̈u.

⁹ Ago nööm ë yecin, ku ciɛth ke ciɛm ke cath kueer. Ago wun ke man miɔɔc në miök ë kiëc, agokï cam aya, ku cïï lëk keek nɔn ë nööm en kiëc ë köör cï thou kɔ̈u.

¹⁰ Na wën ke wun Thamthon ë lɔ baaiden ë yï tik, gokï Thamthon luöi këcamdït, cït man ee kë ye luöi raan thiëk në ciɛɛŋic.

¹¹ Ku na wën, aacï kɔc ke Pilithiin e tïŋ, ke ke bïï dhuök kathiërdiäk bïk bɛ̈n rëër në yen.

¹² Go Thamthon ke yɔ̈ɔ̈k an, “Ë we lɛ̈k kë bäk mɛɛk, na duɛ̈ɛ̈rkï tiiŋ nɔm aŋoot nïn ke këcam kadhorou ke ke kën guɔ thök, ke wek bä gäm lupɔɔ ke kɔ̈u kathiërdiäk, ku dut ke lupɔɔ kathiërdiäk.

¹³ Ku na cäkkï lɔ lëu në meek, ke we bï ya gäm lupɔɔ ke kɔ̈u kathiërdiäk, ku dut ke lupɔɔ kathiërdiäk.” Gokï lueel an, “lɛ̈kë wook meekdu, buk piŋ.”

¹⁴ Go lɛ̈k keek an, “Bɔ̈ këcam bei në kën ee kɔc cam yic, ku bɔ̈ këmit bei në riɛlic.” Agokï cuö lëu në meek në nïn kadiäk.

¹⁵ Na wën ë kööl ye nïn ŋuan, ke ke yöök tiiŋ de Thamthon an, “Wëŋ, monydu, ke bï wo nyuöth kë wën meekku, ke yï cukku bï nyop wekë baai de wuur në mac, ë we cɔl wook bäk ka cath ë wook bɛ̈n nööm?”

¹⁶ Go tiiŋ ë Thamthon dhiau ë yenɔm, ku lueel, an, “Yïn man ɛn, yïn cïï ya nhiaar, yïn cï mïth ke kɔckuɔ lɛ̈k kë meekkï, ku cïï ya lëk wɛ̈ɛ̈rde yen yic.” Ago pɔ̈k nɔm en, an, “Akɛ̈n lɛ̈k wäär kekë maar, ka eeŋö duëër en e lɛ̈k yïn?”

¹⁷ Na wën, ke dhiau ë yenɔm ë akööl kadhorou ŋoot ë këcam, na wën ë kööl ya akööl dhorou ke jɔ lɛ̈k en, në luɔi cï yen e cuil guöp, ago meek lɔ lɛ̈k kɔckɛn ke Pilithiin.

¹⁸ Ago kɔc ke pänydït bɛ̈n ke akɔ̈l ë kën lɔ piny ë akööl ë dhorou an, “Ee kënou mit arëët, awär miök de kiëc? Ku eeŋö ril aläl awär köör?” Ago Thamthon bɛ̈ɛ̈r an, “Na ë we kën pur në weŋdï, adï kɛ̈nkï meekdiënë mɛɛk.”

¹⁹ Na wën ke Wëi ke Bɛ̈nydït ë ke bɔ̈ ë yeguöp, ku jɔ lɔ Acekelon, le ku nɛ̈k kɔc kathiërdiäk, ku yɔɔt lupɔɔ piɛth ë kekɔ̈ɔ̈th, ku gëm lupɔɔken kɔc ë meek këdäŋ. Ku jɔ lɔ dhiënden ke cï gɔ̈th arëët,

²⁰ go tiiŋ ë Thamthon lɔ̈ɔ̈k gäm raan ë mɛ̈ɛ̈th kek ë tɔ̈u në thiëëkkic.