Bäny 10 - JAM DE NHIALIC 2011

Tola

¹ Në thon ë Abimelek cök, go raan dhiën ë Yithakar rɔt jɔt, Tola wën ë Pua, ku ee wën ë wën ë Dodo, bïï Yithriɛl luäk bei. Ku yen aa rɛ̈ɛ̈r ë Camir, në piny ë kuur de Eparaim yic.

² Go aa bɛ̈ny ee löŋ guiir ë Yithriɛl ë run kathiërrou ku diäk, ku jɔ thou. Go tɔ̈ɔ̈u ë Camir.

Jayir

³ Në Tola cök, go Jayir wun ë Giliyad bɛ̈n. Aa mac Yithriɛl ë run kathiërrou ku rou (22).

⁴ Aa de nɔm mïthwät kathiërdiäk, wään ee kɛɛc ë mul kathiërdiäk kɔ̈ɔ̈th. Amɛckï wuöt kathiërdiäk ë Giliyad, aye ke cɔɔl agut cï ee köölë an wuöt ke Jayir.

⁵ Na wën aa thou Jayir go tɔ̈ɔ̈u ë Kamon.

Japetha

⁶ Go kɔc ke Yithriɛl kërac bɛ looi në Bɛ̈nydït nyin. Acïk Baal kekë Acetaroth lam, ku yiëth ke Thiriya, ku yiëth ke Thidon, ku yiëth ke Mowap, ku yiëth ke kɔc ke Ammon, ku yiëth ke kɔc ke Pilithiin. Ku në luɔi cïï Yithriɛl Bɛ̈nydït puɔ̈l ku cïkkï be luööi.

⁷ Go Bɛ̈nydït gɔ̈th ke keek, ago ke tɔ yɔŋ ë kɔc ke Pilithiin ku kɔc ke Ammon. Aa gɔl rɔt në thon de Jayir cök.

⁸ Në runiic kathiëër ku bɛ̈t aake yɔŋ mïth ke Yithriɛl tɔ̈u në baŋ të lɔ aköl amiäk në Jordan kɔ̈u ë Giliyad, piny de kɔc ke Amor.

⁹ Go kɔc ke Ammon Jordan teem ayadäŋ bïk lɔ thɔ̈ɔ̈r ke Juda, ku Benjamin ku dhiën de Eparaim ago Yithriɛl jɔ nuan aläldïïtë.

¹⁰ Na wën ke kɔc ke Yithriɛl ë ke läŋ Bɛ̈nydït, an, “Wo cï karɛc luöi Yïn, wok cï Nhialicda puɔ̈l ku yok Baal lam.”

¹¹ Go Bɛ̈nydït bɛ̈ɛ̈r, an, “Wään ë we kɛ̈n luök në kɔc ke Rip cin, ku kɔc ke Amor, ku kɔc ke Ammon, ku kɔc ke Pilithiin.

¹² Ku wään yɔŋ ë kɔc ke Thidon ku kɔc ke Amalek ku kɔc ke Mawon week ɣɔn tueŋ, guɔkï Yɛn lɔ̈ŋ bä week luäk bei në ke cin, kɛ̈n we bɛ̈n luäk bei në kecin?

¹³ Ku wek cï Yɛn puɔ̈l ku lamkï yiëth kɔ̈k, ka wek cä bï bɛ luök.

¹⁴ Lakï ku läŋkï yiëth cäk keek lɔc. Takï keek luäk week, të täu wek ë nuanic.”

¹⁵ Go kɔc ke Yithriɛl Bɛ̈nydït yɔ̈ɔ̈k, an, “Wok cï karɛc wööc, luöiyë wook kë Ye tak ke piɛth. Yïn lɛ̈ŋku luäk wook ënɔɔnë Bɛ̈nydït.”

¹⁶ Gokï yiëth ke juöör nyaai në ke yiic, ku lamkï Bɛ̈nydït, go Bɛ̈nydït bɛ diɛɛr në yaaŋ de Yithriɛl.

¹⁷ Na wën, ke kɔc ke Ammon ë cɔl tɔŋ ku kutkï kenïïm ë Giliyad, go kɔc ke Yithriɛl kenïïm kut në Midhpa.

¹⁸ Ëtɛ̈ɛ̈n go bäny ke Giliyad röt yɔ̈ɔ̈k kapäc an, “Raan lɔ kɔc ke Ammon mak tueŋ yen abï tɔ ye bɛ̈ny de kɔc ke Giliyad kedhie.”