Amoth 1 - JAM DE NHIALIC 2011

¹ Amoth ee raan töŋ de tïït ke thök, wun cɔl Tekowa. Ku jam ë lueel kï, në ka cï tïŋ në biäk de Yithriɛl, të ɣɔn ŋoot ë run kaarou wei, ɣɔn cïï piny rɔt nieeŋ. Ku në ee ruöönë, Yudhia aaye melik de Juda, ku ye Jerobowam wën ë Jowac, meliŋ de Yithriɛl.

² Ago Amoth lueel an, “Bɛ̈nydït abï jam në kuur ë Dhiɔn nɔm, ku reel në Jeruthalem. Ka ɣään ke nyuäth ke kɔc ee thök tiit abïk riɛl kedhie, ayï kuur ë Karmel abï nɔm biɔɔr aya.

Bɛ̈nydït Aguiir Löŋ de Juöör Thiääk në Yithriɛl Thiriya

³ Aye Bɛ̈nydït lueel an, “Kɔc ke Damathko abä keek luöi këtuc, në biäk de karɛc juëc cïk looi. Arëk abïk kɔc ke Giliyad kääm piny në abëël ke käm de thook wiɛth.

⁴ Në biäk de ee kënë, yɛn bï mac tuɔɔc baai de Ɣadhiɛl. Ku nyuɔp ɣään ril ke Benɣadad piny.

⁵ Ku yɛn bï thoŋ de kal ë Damathko dhuɔŋ piny, ku riäär melik nyin piny, meliŋ tɔ̈u në Wak de Aben, ayï bɛ̈nydïït de kɔc ke Betheden. Ku kɔc ke Thiriya abï keek peec, leerë keek piny ë Kir. Yen kë cïï Bɛ̈nydït lueel ka.

Pilithtiya

⁶ Aye Bɛ̈nydït lueel an, “Kɔc ke Gadha abä keek luöi këtuc, në biäk de karɛc juëc cïk looi. Arëk abïk kɔc ke paan tök peec kedhie, ku lek keek gäm kɔc ke Edom.

⁷ Në biäk de ee kënë, yɛn bï mac tuɔɔc pänydïït de Gadha, ku nyuɔp ɣään riilke piny.

⁸ Yɛn bï meliik ke pɛ̈ɛ̈nydït ke yï: Acedɔd kekë Acekelon nyaai në bääny yic. Yɛn bï rɔt pɔ̈k kɔc ke Ekeron ku luöi keek këtuc, ku kɔc ke Pilithiin cï döŋ ëbɛ̈n, abïk thou kedhie. Yen kë cïï Bɛ̈nydït Nhialic lueel ka.

Tayer

⁹ Aye Bɛ̈nydït lueel an, “Yɛn bï kɔc ke Tayer luöi këtuc në biäk de karɛc juëc cïk looi. Arëk abïk kɔc ke paan tök peec kedhie, ku lek keek gäm Edom, ku cïkï löŋ ë cïk mac në biäk de ŋiëc rëërden be döt.

¹⁰ Në biäk de ee kënë, Yɛn bï mac tuɔɔc Tayer, bï lɔ nyuɔp piny, ku nyop ɣään riilke piny.

Edom

¹¹ Aye Bɛ̈nydït lueel an, “Kɔc ke Edom abä keek luöi këtuc, në biäk de karɛc juëc cïk looi. Arëk abïk kɔc ke Yithriɛl, mïthëkɔcken yɔ̈ɔ̈p në abätɛ̈ɛ̈u, abïk jɔ tïc ëgɔk nɔn cïn en kokdepiɔ̈u tɔ̈u ke keek taitai. Ayek tɔ̈u ke ke diu piɔ̈ɔ̈th aköölnyïïn kedhie. Ku ayek agönhden mukic ananden.

¹² Në biäk de ee kënë, Yɛn bï mac tuɔɔc Teman bï nyuɔp piny, ku nyop ɣään riil ke Bothera piny.

Ammon

¹³ Aye Bɛ̈nydït lueel an, “Kɔc ke Ammon abä keek luöi këtuc, në biäk de karɛc juëc cïk looi. Arëk abïk diëër liac rɛ̈ɛ̈tiic bei në mïth në Giliyad, në baŋ bï kek piny nööm ke ye këden, ŋuɛk kek pinyden nyin.

¹⁴ Në biäk de ee kënë, Yɛn bï mac tuɔɔc Raba bï lɔ nyuɔp piny, ku nyop ɣään riilke piny. Ku ëtɛ̈ɛ̈n, abï dɛ awuɔɔu de tɔŋ, ku anuɔɔn de kööl amaŋdït.

¹⁵ Meliŋden abï peec kekë bänyke kedhie, leerë keek piny lei.