Luɔi 18 - JAM DE NHIALIC 2011

Në Korinth

¹ Na wën, aacï kakë thök, ke jël ë Athenai, bï Korinth.

² Ku yök Judai tök ëtɛ̈ɛ̈n cɔl Akula, raan cï dhiëëth ë Ponto, ku aa piɛc bɛ̈n ë Yitalia, kekë Pirithila tiiŋde, në biäk de löŋ cïï Kulaudio lueel an, bï Judai jäl ë Roma kedhie. Go bɛ̈n tëde keek,

³ ago rëër ke keek, luɔi ee kek atëët kït, agokï ya luui ëtök, ayek atëët ee pɛɛny cuëëc.

⁴ Go wël aa guiir luaŋ ë Nhialic ë akööl ke Thabath kedhie, ke bï Judai tɔ gäm wëlke, ayï Girikii.

⁵ Na wën, aacï Thila bɛ̈n Makedonia kekë Timotheo, ke Paulo jieth piɔ̈u, go cök ë guïïr en Judai an, Yecu yen aye Kërtho.

⁶ Ku të cï kek ater cak ku lɛ̈ɛ̈tkï, ke Paulo teŋ lupɔde, ku jɔ keek yɔ̈ɔ̈k an, “Ë riɛmdun tɔ̈u ë weyiëth, yɛn liu thïn, ëlë ënɔɔnë, yɛn bï lɔ tëde Juöör.”

⁷ Go jäl ëtɛ̈ɛ̈n, le ɣön ë raan cɔl Tito Juthuto, raan riëëu Nhialic, thiëëkë ɣönde kekë luaŋ ë Nhialic.

⁸ Ku Kirithipo, bɛ̈ny ë luaŋ ë Nhialic, acï Bɛ̈nydït gam kekë dhiënde ëbɛ̈n, ku gam Korinthoi juëc ayadäŋ, të cï kek jam piŋ, ago ke baptith.

⁹ Ku yöök Bɛ̈nydït Paulo wakɔ̈u ke ee nyuöth an, “Du riɔ̈c, ye wël guiir, du mim,

¹⁰ yɛn cath wo yïn, ku acïn raan bï rɔt yiëk ater ke yïn, bï yï nɔ̈k, yɛn de kɔc juëc ë pänydïïtëyic.”

¹¹ Go rëër ëtɛ̈ɛ̈n ë ruöön tök ku pɛ̈i kadhetem, ke ye jam ë Nhialic wɛ̈ɛ̈t në keyiic.

¹² Na ɣɔn, nu Galio ke ye bɛ̈ny de Akaya, ke Judai ke ke jɔt röt ë piɔ̈n tök lek tɔŋ yiɛ̈n Paulo, ku bïïkï të ye bäny löŋ guiir thïn.

¹³ Ku luelkï an, “Raanë ee kɔc wëŋ an, bïk Nhialic aa lam në läm de ater kekë löŋda!”

¹⁴ Na wën, ke Paulo an, tueer e thok, ke Galio yöök Judai an, “Tëë yen jam de luɔi rac ayï awäny cïï raan looi ë cuëër, wek Judai, adï piɛth luɔi bän këdun piŋ.

¹⁵ Ku na ënɔɔnë, tëë yen ater ë wël tei, ku rin, ku löŋdun week, jakï woiyic week wapäc, yɛn cïn piɔ̈u luɔi bän kë cït ee kënë guiir!”

¹⁶ Go ke cieec ɣön ee löŋ guiir thïn.

¹⁷ Go Girikii kedhie gokï Thothene dɔm, yen aye bɛ̈ny de luaŋ ë Nhialic, ku duikï ɣöt thok ɣön ee löŋ guiir thïn. Ku Galio akën yecin tuɛɛl thïn, aa rɛ̈ɛ̈r.

Lɔ Ciëën Antiokia

¹⁸ Na wën, ke Paulo ŋoot ke rɛ̈ɛ̈r ëtɛ̈ɛ̈n ë nïn juëc, na ɣɔn, ke tɔ̈ŋ wäthii, ku jël le Thiriya në abël, ku cath Pirithila ku Akula në yen, acï e nɔm muut ë Kenkuria: në këde jam wään cï lɛ̈k Nhialic.

¹⁹ Go bɛ̈n Epetho, ku nyiëëŋ keek piny ëtɛ̈ɛ̈n. Na wën, ke yenguöp ke lɔ luaŋ ë Nhialic, le wël guiir kekë Judai.

²⁰ Gokï lɔ̈ŋ an, yökë ke yï rɛ̈ɛ̈r wekë wook, go jäl.

²¹ Go keek tɔ̈ɔ̈ŋ, ku lueel an, Dhuëëŋ abɔ̈ ënɔɔnë abä dhil lɔ looi Jeruthalem, ku yɛn bï a nɔm dɔ̈k week tei, të cï Nhialic e lueel. Go jäl ë Epetho ke cath ë abël.

²² Na wën, aacï bɛ̈n bei ë abëlic ë Kaitharia, ke jɔ ɣön ë Nhialic lɔ thiëëc, ku jɔ lɔ Antiokia.

²³ Na wën, aacï rëër ëtɛ̈ɛ̈n ë aköölkë, ke jɔ jäl, le piny ë Galatia kuanyic, ayï paan ë Purugia, ke tɔ kɔcpiööcë ril ë gäm kedhie.

Apolo anu në Epetho ku Korinth

²⁴ Na wën, ke Judai tök bɔ̈ Epetho, cɔl Apolo, ee raan cï dhiëëth ë Alekandaria, raan ŋic wël guiir, ku ŋic kacïgɔ̈ɔ̈r aläl.

²⁵ Monyë acï wëët në kueer ë Bɛ̈nydït, ku ye raan lëthic, go kɔc guiëër ku wëët keek në ka ke Bɛ̈nydït ke cïn cöök wɛ̈ɛ̈c, ku ŋoot ke ŋic baptith ë Jɔn tei.

²⁶ Go jam gɔl luaŋ ë Nhialic ke ye nyin riɛl. Na wën, acï Akula kekë Pirithila e piŋ, ke leerkï ɣönden, ku wëëtkï apiɛth në kueer ë Nhialic.

²⁷ Na wën, aacï piɔ̈u dɛ luɔi bï en tëëk le Akaya, ke wäthii ke ke jɔ awerek gäär kɔcpiööcë ëtɛ̈ɛ̈n, läŋkï keek an, bïk loor, ku të cï en bɛ̈n ëtɛ̈ɛ̈n, ke jɔ kɔc cï gam në dhuëëŋ de Nhialic piɔ̈u kony aläl.

²⁸ Aaye Judai tiaam ë wël arëët ë kɔc nïïm, në nyuuth ee yen keek nyuööth ë gɔk në kacïgɔ̈ɔ̈r, an, Yecu yen aye Kërtho.