2 Theth 1 - JAM DE NHIALIC 2011

¹ Yɛn Paulo, wokë Thiluano, ku Timotheo: Awerek en gɛ̈ɛ̈rku ɣön ë Nhialic de Thethalonikei nu ë Nhialic wäädayic ku Bɛ̈nydït Yecu Kërtho:

² Ë dhuëëŋdepiɔ̈u tɔ̈u kekë week ayï mät, në ke bɔ̈ tëde Nhialic Wääda ku Bɛ̈nydan Yecu Kërtho.

Guiëër ë Löŋ në Bɛ̈n de Kërtho

³ Wo bï dhil aa cool ë lec Nhialic nɔm në biäkdun, wek mïthëkɔckuɔ, cït man piɛth en, ë luɔi ee gämdun rɔt ŋuak aläldïïtë, ku luɔi dïïtë nhiëër nhiaar wek röt wedhie aläl.

⁴ Yen a leec wok röt në week ë ɣööt ke Nhialic yiic në biäk de liɛɛr ë wepiɔ̈ɔ̈th ku gäm cä wek gam ë yöŋic ëbɛ̈n yöŋ ee we yɔŋ, ku në katuc dhal week kedhie katuc yak guum.

⁵ Ku kënë ee ŋïny bä wek guiëër ee Nhialic löŋ guiir ŋic ëgɔk, nɔn ee yen guiëër yic, ee kë bï we tɔ ye kɔc rɔ̈ŋ në ciɛɛŋ de Nhialic aa wek kake guum në biäkde aya:

⁶ tën ee yen këpiɛth tëde Nhialic luɔi bï en këtuc cool nɔm tëde kɔc ee ye week luöi këtuc,

⁷ ku luɔi bï en week cuööt në lɔ̈ŋ bä wek lɔ̈ŋ në wook ëtök, wek kɔc ee luöi këtuc, kööl bï Bɛ̈nydït Yecu rɔt nyuɔɔth, të bï en paannhial kekë tuuckɛn ril bɔ̈ nhial,

⁸ ke cath ke many ee dëp aläl, ago rɔt guöör ë kɔc kuc Nhialic, ayï kɔc reec wëlpiɛth gam, wël ke Bɛ̈nydan Yecu Kërtho.

⁹ Kɔckë abïk këdɛn tuc yök, yen aye riääk bï ceŋ athɛɛr, riääk bɔ̈ ë Bɛ̈nydït nyin ku bï në dhuëëŋ de riɛlde,

¹⁰ të cï en guɔ bɛ̈n bï dhuëëŋ bɛ̈n yök ë kɔckɛn ɣerpiɔ̈ɔ̈th yiic, ku bïï kɔc diir ee köölë, kɔc gam kedhie (luɔi cä wek jam cuk lɛ̈k week gam).

¹¹ Yen aye wok cool ë lɔ̈ŋ në biäkdun ë aköölnyïïn kedhie aya, ke Nhialicda bï week tɔ rɔ̈ŋ në cɔ̈t cï we cɔɔl, ago kë ye kɔɔr në piath ë yenpiɔ̈u thöl ëbɛ̈n, ku thöl luɔi de gäm në riɛldït,

¹² ke rin ke Bɛ̈nydan Yecu Kërtho ke ke bï dhuëëŋ yök ë weyiic, ku bäk dhuëëŋ yök në yen, në dhuëëŋ de Nhialic piɔ̈u kekë Bɛ̈nydan Yecu Kërtho.