2 Tham 9 - JAM DE NHIALIC 2011

Debid kekë Mepiboceth

¹ Na wën ke Debid ë lop an, “De raan töŋ cï döŋ ke pïïr paan ë Thaulo? Akaar bä nyuöth piathëpiɔ̈u në baŋ de Jɔnathan.”

² Ku ade lïm de paan ë Thaulo cɔl Dhiba, ago Dhiba yɔ̈ɔ̈k bï lɔ tëde Debid. Ago melik Debid thiëëc an, “Ee yïn Dhiba? Go bɛ̈ɛ̈r an, “Ɣɛɛ, ee yɛn lïmdu.”

³ Go melik luɔp an, “De raan töŋ cï döŋ ke pïïr paan ë Thaulo? Akaar bä nyuöth piathëpiɔ̈u cït man wään cän gutguut lɛ̈k Nhialic.” Go Dhiba pɔ̈k nɔm melik an, “Jɔnathan ade nɔm wëndɛn töŋ ŋoot ke pïïr. Ku aa aduany.”

⁴ Go melik Dhiba thiëc an, “Tɔ̈u ënu yen ee wënë?” Go Dhiba pɔ̈k nɔm en an, “Atɔ̈u ɣön ë Makir wën de Amiel në Lodebar.”

⁵ Na wën ke Debid ë yɔ̈ɔ̈k lïïmke bïk Jɔnathan lɔ bɛ̈ɛ̈i ɣön ë Makir wën de Amiel në Lodebar.

⁶ Na wën cï Mepiboceth, wën ë Jɔnathan, kuat de Thaulo bɛ̈n, ke gut yenɔm piny ë riëëu ë Debid nɔm. Go Debid lueel an, “Mepiboceth!” Go Mepiboceth lueel an, “Yɛn ee lïmdu.”

⁷ Go Debid lɛ̈k en an, “Du riɔ̈c. Yɛn bï piɔ̈u piath wokë yïn, në biäk de wuur Jɔnathan. Yïn bä dɔ̈k nɔm piny de kuaar Thaulo ëbɛ̈n, ku yïn bï ya cam we yɛn në paamdï nɔm aköölnyïïn.”

⁸ Go Mepiboceth yenɔm bɛ guöt piny në Debid nɔm ku lueel an, “Yïn cï piɔ̈u kok wekë yɛn aläl, bɛ̈ny! Ku yɛn thöŋ wokë jöŋ cï thou tei!”

⁹ Na wën ke Debid ë cɔl Dhiba lïm de Thaulo, ku yɔ̈ɔ̈k an, “Yɛn cï Mepiboceth wën ë bɛ̈nydu gäm këriëëc wään de paan ë Thaulo ëbɛ̈n.

¹⁰ Yïn, ku mïthku, ku lïïmku, wek bï piny cuöm paan de bɛ̈nydu Thaulo, ku tëmkï keek, ago keek aa yiɛ̈n këcam. Ku Mepiboceth, guöpde abï ya cam në paamdï nɔm ë ceŋ.” (Dhiba aa de nɔm dhuök kathiëër ku dhïc ku lïïm kathiërrou.)

¹¹ Go Dhiba lɛ̈k melik Debid an, “Yɛn ee lïmdu, yɛn bï këriëëc cï melik lɛ̈k yɛn looi ëbɛ̈n.” Ago Mepiboceth aa cam në paam ë Debid nɔm, abïï ciët raan tök në wɛ̈ɛ̈t ke melik yiic.

¹² Mepiboceth ade nɔm wëndɛn koor cɔl Mica. Go kɔc paan ë Dhiba ëbɛ̈n aa lïïm ke Mepiboceth.

¹³ Go Mepiboceth, wään cï cök duany ëbɛ̈n rëër në Jeruthalem, ku ye kacaamke cam ëbɛ̈n në paam de melik nɔm.