2 Tham 8 - JAM DE NHIALIC 2011

Tɔɔŋ cï Debid Tiaam

¹ Na ɣɔn, ke melik Debid ë be Pilithiin mak, ku tiɛɛm keek, ku nööm wun cɔl Methek Amma.

² Ku acï kɔc ke Mowap tiaam ayadäŋ. Ku tɔ keek tɔ̈c piny ë tiɔp nɔm, ku jɔ keek them në awiɛɛth. Ku kɔc kaarou nɔ̈k në kɔc kadiäk yiic. Go kɔc ke Mowap bɛ̈n aa lïïm ke Debid ku yek kuöt athölbö.

³ Na wën ke Debid ë tiam Ɣadadedher wën ë melik Reɣop piny de Thiriya cɔl Dhoba, të wään le yen an bïï piny tɔ̈u në wɛ̈ɛ̈r ë Yuparat kɔ̈u lɔ puk nïïm.

⁴ Go Debid agum ku bot kadhorou 1,700 de kɔc ke jöŋgöör peec, ku peec aguum kathiërrou 20,000 de rem de tɔŋ cath ë kecök. Go rɔt muɔ̈k jöŋgöör juëc bï bɔt de abëël ke tɔŋ thel, ku jɔ kɔ̈k tɔ ee ŋöl.

⁵ Wään bï Thiriya tɔ̈u në Damathko ye them bïk Ɣadadedher melik de Dhoba lɔ kony, go Debid ye mak ku nɛ̈k bot kathiërrou ku rou 22,000 de kɔc.

⁶ Na wën ke Debid ë loi pɛɛny ke rem de tɔŋ ë Damathko, piny de kɔc ke Aram. Gokï aa lïïm ke Debid, ku tɔ keek tɔ kut athölbö ëbɛ̈n. Go Bɛ̈nydït Debid tɔ tiëm të yen lɔ thïn ëbɛ̈n.

⁷ Ago Debid kööt cï looi në adhääp peec tëde bäny ke Ɣadadedher ku leer ke Jeruthalem.

⁸ Ku nööm malɔ̈ɔ̈ŋ juëc tëde Beta, ku Berothai, pɛ̈ɛ̈nydït ke Ɣadadedher.

⁹ Na wën ke piŋ ë Tɔi melik de Ɣamath, nɔn cïï Debid rem de tɔŋ de Ɣadadedher tiaam ëbɛ̈n

¹⁰ Go Tɔi Joram wënde tuöc melik Debid, bï lɔ gäm lɛc, ë biäk cïï yen Ɣadadedher tiaam. Ku Ɣadadedher aa ke cï thɔ̈ɔ̈r kekë Tɔi raan juëc. Ago Joram Debid yiɛ̈n miɔ̈c cï looi në adhääp, ku ateek, ku maläŋ.

¹¹ Go melik Debid keek gam, ke ee kake läm, mɛtke ëtök në ateek, ku adhääp wään nööm tëde juöör cï keek peec.

¹² Edom, ku Mowap, ku Ammon, ku Pilithiin, ku Amalek, ku ka kɔ̈k cï nööm aya tëde Ɣadadedher wën ë Reɣop, melik de Dhoba.

¹³ Ku Debid acï bɛ̈n ŋic aläl, wään lee yen bɛ̈n ciëën, të wään cï yen bot kathiëër ku bɛ̈t (18,000) de kɔc ke Edom lɔ nɔ̈k ë Wak de Amilɔ yic.

¹⁴ Go pɛɛny ke rem de tɔŋ looi ë Edom yic ëbɛ̈n, ku tɔ kɔc ke Edom ee lïïmke ëbɛ̈n. Go Bɛ̈nydït Debid tɔ tiëm të yen lɔ thïn ëbɛ̈n.

¹⁵ Debid aaye melik paan ë Yithriɛl ëbɛ̈n, ku aa ye këpiɛth yic looi në kɔc piɔ̈ɔ̈th kedhie.

¹⁶ Jowap wën de Dheruia yen aye bɛ̈ny ë rem de tɔŋ ëbɛ̈n. Ku Jeɣocapat wën de Aɣilud yen aye bɛ̈ny de kacïgɔ̈ɔ̈r.

¹⁷ Dhadok wën de Aɣitup ku Abiathar wën de Aɣimelek, kek aye bäny ke kake Nhialic, ku Theraya yen aye kake melik gɔ̈ɔ̈r.

¹⁸ Benaya wën de Jeɣoyada yen atɔ̈u në Kereth ku Peleth nïïm rem de tɔŋ ë kɔc ee melik tiit, ku wɛ̈ɛ̈t ke Debid aake ye bäny ke kake Nhialic.