2 Tham 7 - JAM DE NHIALIC 2011

Nathan Alëk Debid Thön

¹ Melik Debid aa rɛ̈ɛ̈r ɣöndɛn ë bääny, ku acïï Bɛ̈nydït gäm mät kekë kɔc ke aterde thiääk ë yen kedhie.

² Na wën ke Debid ë yöök tiët Nathan an, “Tïŋ, yɛn rɛ̈ɛ̈r ɣön ë bääny cï yïk ë tim de thidar, ku Athänduŋ de Nhialic atɔ̈u në paany yic!”

³ Go Nathan lɛ̈k melik an, “Lɔɔ loi këduön cï tak në yïnɔm, në biäk tɔ̈u ë Bɛ̈nydït kekë yïn.”

⁴ Ku në ee köölë wakɔ̈u go jam de Bɛ̈nydït bɛ̈n tëde Nathan an,

⁵ “Lɔɔ ku yɔ̈ɔ̈kë lïmdï Debid an, ‘Kë lueel ë Bɛ̈nydït kï an acie yïn bï Yɛn yiëk Luaŋdït bän rëër thïn.

⁶ Gɔl ɣɔn thɛɛr bɛ̈ɛ̈i yɛn Yithriɛl bei në Rip agut cï ënɔɔnë Yɛn kën kɔn rëër ë Luaŋdïtic, Yɛn aaye lɔ tɛ̈ɛ̈n ku tɛ̈ɛ̈n ke ya rɛ̈ɛ̈r në paany yic.

⁷ Në cäthdï yic ëbɛ̈n wokë kɔc ke Yithriɛl, acïn kööl cän bɛ̈ny tök kɔn yɔ̈ɔ̈k, në bänykiën cä kuany yiic bïk Yɛn yiëk Luaŋdït ë tim de thidar?’

⁸ “Ka lɛ̈kë awundiën Debid an, Yɛn Bɛ̈nydït de rɛm. ‘Yïn cä jɔt ë tiët de thök yiic, ke yï bï aa bɛ̈ny nu ë kɔckiën ke Yithriɛl nïïm.

⁹ Yɛn cï tɔ̈u wo yïn në ɣään cï yïn ke lɔ thïn ëbɛ̈n, ku tiaam kɔc ke aterdu në yïnɔm. Ku yïn bä tɔ de kɛt cï bäny dït ke piny nɔm.

¹⁰ Ku yɛn bï kɔckiën ke Yithriɛl lɔ̈c piny, ku abä cuɔm keek agokï rëër ë bɛ̈iken yiic, ke cïn kë bï keek bɛ nuaan. Ku kɔc ee kërac looi acïkï keek bï bɛ nuaan cït man ɣɔn.

¹¹ Të la Yɛn bäny ee löŋ guiir kuɛ̈ny kɔckiën ke Yithriɛl, yïn bä gäm mät wekë kɔc dɛ wek ater kedhie. Ku acä lɛ̈k yïn aya nɔn bän käudu tɔ ye melik ë yïcök.

¹² Të lee yïn thou ku biɔth kuarkun cök. Yɛn bï mɛnh tök ë mïthku yiic tɔ ye melik ë nyindu yic, ku Yɛn bï ciɛɛŋde tɔ ril.

¹³ Yen abï Yɛn yiëk ɣöt, ku thööny de ciɛɛŋde yen abï tɔ̈u athɛɛr.

¹⁴ Yɛn bï ya wun, ku yen abï ya wëndï. Na le wäc ke Yɛn bï kɔc kɔ̈k tɔ lui yen kërac, kek abïk aa wɛtkiën ke dui.

¹⁵ Ku Yɛn cï nhiëërdiën agɔk bï nyaai tëde yen, cït man cän e nyaai tëde Thaulo, ke we tɔ̈u thïn.

¹⁶ Ku dhiëndu ku ciɛɛŋ de melik acïï kɔ̈u bï tɛɛm tëde yïn, thöönydu abï cieŋ aɣet athɛɛr.’ ”

¹⁷ Na wën ke Nathan ë lëk Debid ka cïï Nhialic lɛ̈k yen ë nyuöth yic ëbɛ̈n.

Debid Aläŋ në Alɛɛc

¹⁸ Na wën ke melik Debid ë lɔ në paany de Bɛ̈nydïtic, go nyuc ku lɛ̈ŋ an, “Bɛ̈nydït Nhialic, Yɛn ya ŋa! Ku dhiëndï eeŋa? Eeŋö bïï yïn yɛn ee tënë?

¹⁹ Ku kënë acie këdït tëde yïn, Bɛ̈nydït Nhialic ku yïn cï yɛn luöi gutguut në biäk de käudï wadäŋ. Kënë acï tɔ tiëŋ, kënë ee lɔ̈ŋ de mɛnh ë raan Bɛ̈nydït Nhialic.

²⁰ Eeŋö däŋ duɛ̈ɛ̈r lɛ̈k Yïn! Yïn ŋic awundu Bɛ̈nydït.

²¹ Aa ye këde piɔ̈ndu ku ye kë kɔɔr yen ë looi yïn ee kënë, yïn aa loi ee göökkë kedhie në biäk bïï yïn a wɛ̈ɛ̈t.

²² Yïn adït, Bɛ̈nydït Nhialic! Acïn raan däŋ cït yïn, kë ŋicku wodhie, acïn Nhialic däŋ ee yïn yïtök!

²³ Acïn jur däŋ ë piny nɔm cït Yithriɛl, kɔc cï keek bɛ̈ɛ̈i bei në lïïmic ku tɔ keek ee kɔc ke nɔmdu. Ku göök ku kake gäi cï luöi keek cï kɛkdu tɔ thiɛ̈i ë piny nɔm ëbɛ̈n. Yïn acï ke cuɔp wei acï kɛkdu thiäi piny në piny nɔm ëbɛ̈n. Yïn cï juöör kɔ̈k në yiëthken cuɔp wei wään bïï kɔcku bɛ̈n ee pinyë, kɔckuön cï luöny bei në lïïmic ë Rip ke ke bï aa kɔc ke nɔmdu.

²⁴ Ku yïn cï kɔc ke Yithriɛl tɔ ee kɔcku aɣet athɛɛr, ku Yïn Bɛ̈nydït, Yïn cï aa Nhialicden.

²⁵ “Ënɔɔnë, Bɛ̈nydït Nhialic, tɔ gutguut cï lueel në biäkdï ku në biäk de käudï tɔ ee yic, ku looi kë cï lueel an bä looi.

²⁶ Yen abïï Yïn aa riëëu në aköölnyïïn kedhie, ku abïï kɔc lueel an, ‘Bɛ̈nydït de rɛm Yen aye Nhialic tɔ̈u në Yithriɛl nɔm!’ Ku yïn dhiëndï muk aköölnyïïn ëbɛ̈n.

²⁷ Bɛ̈nydït de rɛm, Nhialic de Yithriɛl! Yɛn ril nyin në biäk bän Yï lɔ̈ŋ ee lɔ̈ŋë, në baŋ cïï Yïn a nyuöth ee kakë kedhie, yɛn lïmdu, ku luɔi cïï yïn E lueel an bä käudï tɔ ee meliik.

²⁸ “Bɛ̈nydït Nhialic, Yïn ee Nhialic, ku wëlku ayek yith, ku Yïn cï ee gutguut piɛthë lɛ̈k yɛn.

²⁹ Yïn läŋ bä käudï thieei, agokï ŋoot ke ke rɛ̈ɛ̈r në piathdu yic. Bɛ̈nydït Nhialic, Yïn cï ya lɛ̈k gutguut, ku athiɛɛidu abï tɔ̈u në kuatdï guöp aɣet athɛɛr.”