2 Tham 5 - JAM DE NHIALIC 2011

Debid atɔ ye melik de Yithriɛl kekë Juda

¹ Na wën ke dhiëën ke Yithriɛl lɔ tëde Debid në Ɣebron ku lëkkï yen an, “Tïŋ wok ee kɔc ke dhiëndu.

² Ayï ɣɔn ye Thaulo melik, ee yïn ë wɛt kɔc ke Yithriɛl tɔŋ. Ku acïï Bɛ̈nydït lɛ̈k yïn nɔn bï yïn aa tïn ë kɔc ke Yithriɛl ku yïn bï aa bɛ̈nyden.”

³ Go bäny ke Yithriɛl kedhie lɔ tëde Debid në Ɣebron. Ago mät looi ke keek në Ɣebron në yïïŋ de Bɛ̈nydït lɔ̈ɔ̈m. Na wën ke ke jɔ Debid wäl nɔm miök ku tɔkï ee melik de Yithriɛl.

⁴ Run ke Debid aake ye thiërdiäk ɣɔn cï yen aa melik, ku jɔ bääny muk në run kathiërŋuan.

⁵ Aa muk bääny në Ɣebron ke ye melik de Juda në run kadhorou ku pɛ̈i kadhetem, ku muk bääny ë Jeruthalem ke ye melik de Yithriɛl ku Juda në run kathiërdiäk ku diäk.

⁶ Na wën ke melik kekë kɔcke jäl bïk Jeruthalem lɔ mak. Aaye kɔc ke Jebuth ceŋ ëtɛ̈ɛ̈n ye tak nɔn cïï ë Debid pänydït bï peec agokï lueel an, “Cöör ku aduɛɛny aduëërkï yïn gël, ke yï cï bï ɣëët thïn.”

⁷ (Ku Debid acï të ril de Dhiɔn bɛ̈n nööm, go bɛ̈n cäk an, “pänydït de Debid.”)

⁸ Go Debid kɔcke yɔ̈ɔ̈k ee köölë an, “Raan kɔɔr bïï kɔc ke Jebuth mak abï tëëk ë nyïïn ke pïïu yiic piny, wek bï ŋöl ku cöör mak.” Në biäk cï ë ye lueel an, “Ŋöl ku cöör acïkï bï lɔ ë Luaŋdïtic.”

⁹ Ago Debid pänydïït ril peec, go Debid ceŋ thïn ku ciëk an, “pänydït de Debid.” Go pänydït yïk ë yekɔ̈u, gɔl të wään bïï ë tiɔp wäl ë päny kɔ̈u në baŋ lɔ të lɔ aköl amiäk de kuur.

¹⁰ Go riɛlde lɔ ke ŋuak yenyin, në biäk tɔ̈u ë Bɛ̈nydït Nhialic Awärjäŋ kekë yen.

¹¹ Go melik Ɣiram në päny de Tayer kɔc tuɔɔc tëde Debid, ke ke muk mën dït ke tiim ke thidar, ku kɔc ë tiim guaŋ, ku kɔc ee kur pak yiic, ke ke bï ɣönë bääny ë Debid yïk.

¹² Na wën ke jɔ ë Debid ŋic nɔn cïï ë Bɛ̈nydït yen tɔ ee melik de Yithriɛl ku tɔ bäänyde tɔ kueth në biäk de kɔckɛn ke Yithriɛl.

¹³ Ku ɣɔn jël en në Ɣebron, Debid aacï diäär mɔ̈th juëc nööm, ku diëër juëc, ku ade nɔm mïthwät ku duet juëc.

¹⁴ Kake ë rim ke mïthwät wään dhiëëth ë Debid keek në Jeruthalem: Camua, ku Cobab, ku Nathan, ku Tholomon,

¹⁵ Yibiɣar, ku Elicua, ku Nepek, ku Japia,

¹⁶ ku Elicama, ku Eliada, ku Elipelet.

Debid Atiam Pilithiin

¹⁷ Na wën aacï kɔc ke Pilithiin ye piŋ nɔn cïï Debid tääu ke ye melik de Yithriɛl ëbɛ̈n, go rem de tɔŋ ë Pilithiin jäl an lek Debid dɔm. Na lɔ Debid ye piŋ, go lɔ tëde ɣään cï gël.

¹⁸ Ago Pilithiin bɛ̈n në Wak de Repaim yic ku ɣɛ̈pkï ëtɛ̈ɛ̈n.

¹⁹ Na wën ke Debid ë lop Bɛ̈nydït an, “Bä Pilithiin lɔ mak? Bä yɛn tɔ tiëm?” Go Bɛ̈nydït lɛ̈k Debid an, “Lɔɔr! Abä keek lɔ tiam!”

²⁰ Go Debid lɔ Baal Peradhim ku jɔ Pilithiin lɔ tiaam ëtɛ̈ɛ̈n. Go ë Debid lueel an, “Bɛ̈nydït acï kɔc ke aterdï dhuööŋ cï amool.” Go Debid ëtɛ̈ɛ̈n cäk an Baal Peradhim. “Bɛ̈nydït ee käŋ dhuööŋ kɔ̈ɔ̈th.”

²¹ Ku jɔ Pilithiin yiëthkɛn yek lam nyääŋ piny në Baal Peradhim go kɔc ke Debid keek jɔt.

²² Na ɣɔn ke Pilithiin ë ke be bɛ̈n në Wak de Repaim yic ku ɣɛpkï.

²³ Na wën ke Debid ë be Bɛ̈nydït luɔp, go ë Bɛ̈nydït bɛ̈ɛ̈r an, “Du Pilithiin mɛk në biäk tueŋ, lɔɔ tɛ̈ɛ̈k në kekɔ̈ɔ̈th ciëën, ku jɔ keek lɔ mak në baŋ tui tëde tiim ke baltham.

²⁴ Të le yïn awuɔɔu de kɔc cath piŋ ë tiim ke baltham nïïm, ke dap keek mak, në baŋ bän cath në wenïïm tueŋ ke ya bï rem de tɔŋ ë Pilithiin tiaam.”

²⁵ Go Debid kë cï Bɛ̈nydït lɛ̈k yen looi, ago Pilithiin tiaam, ku cop keek ciëën gɔl në Geba leer Gedher.