2 Tham 19 - JAM DE NHIALIC 2011

Jowap Ajäny Debid

¹ Na wën ke kɔc ë ke yɔ̈ɔ̈k Jowap nɔn dhiëëu ë melik Abthalom.

² Ago tiëm ee köölë puk ke ee dhiëëu tëde kɔc kedhie, në biäk cïï kɔc yen piŋ an melik adhiëëu wënde.

³ Go kɔc jɔ bɛ̈n ë wutic ee köölë ke ke mim thook, cït man ye rem de tɔŋ cï tiaam ë tɔŋic bɛ̈n wut ë lik.

⁴ Na wën ke melik ë kum yenyin ku dhiɛɛu ë röldït an, “Abthalom wëndï oou, Abthalom, wëndï, wëndï!”

⁵ Go Jowap lɔ ɣöt tënu melik ku lɛ̈k en an, “Köölë yïn cï remduön de tɔŋ yɔ̈ɔ̈r, kɔc ë kony yïn wëi, wekë mïthku, ku duetku, ku diäärku, ku diäär määthku.

⁶ Yïn man kɔc nhiaar yïn, ku yïn nhiaar kɔc man yïn. Acï nyuɔɔth ë gɔk ee köölë nɔn cïn ë bänykuön ke rem de tɔŋ ku kɔcku naamden. Acä tïŋ ënɔɔnë na Abthalom ë cï pïïr ku thou ee kɔckë, yïn duëër piɔ̈u miɛt.

⁷ Ënɔɔnë lɔ lɛ̈kë ë kɔcku. Ku kuëëŋ në rin ke Bɛ̈nydït, na cïï lɔ looi, acïn raan bï döŋ ke yïn miäk aköl! Abï aa gök de riääk ë pïïrdu yic ëbɛ̈n.”

⁸ Na wën ke melik ë jɔt rɔt ku lee ë kal ë wut thok. Go ë kɔcke piŋ nɔn cïï yen lɔ ë kal thok ëtɛ̈ɛ̈n, ago kɔc ëbɛ̈n lɔ ë yelɔ̈ɔ̈m. Na wën ke Kɔc ke Yithriɛl wään kuany Abthalom cök lɔ ë ëbɛ̈iken yiic.

Debid Apuk Yenɔm Jeruthalem

⁹ Kɔc aake göth ë kapäc ë dhiëën ke Yithriɛl yiic ëbɛ̈n an, “Melik Debid acï wook luök në kɔc ke aterda, acï wo kony në kɔc ke Pilithiin, ku ënɔɔnë ë kat në Abthalom, ku nyiëëŋ baai piny.

¹⁰ Wok cï Abthalom tɔc ke ee melikda, ku yeka cï nɔ̈k ë tɔŋic. Eeŋö cïï wok melik Debid be lɔ bɛ̈ɛ̈i?”

¹¹ Jam lueel ë kɔc ke Yithriɛl acï ɣet tëde melik Debid. Ago Debid Dhadok kekë Abiathar, bäny ke kake Nhialic tuöc bäny ke Juda an, “Eeŋö duɛ̈ɛ̈r wek döŋ ciëën në kɔc cök, në bïïr bïï ë melik puɔ̈k nɔm ɣöndɛn ë bääny?

¹² Wek raan në yɛn, wek ee guöpdï ku riɛmdï, Eeŋö duëër wek döŋ ciëën, në bïïr bïï ë melik ciëën?”

¹³ Ku acï ë Debid ke yɔ̈ɔ̈k bïk lɛ̈k Amatha an, “Yïn raan we yɛn. Ee köölë yïn bä tɔ ye bɛ̈ny de rem ë tɔŋdï në nyin de Jowap yic. Yɛn cï kuëëŋ ë Nhialic, na cä lɔ looi abï ya luöi këtuc!”

¹⁴ Wël ke Debid acïk kɔc ke Juda tɔ mit piɔ̈ɔ̈th kedhie, agokï tuöc thok, në biäk bï yen lɔ bɛ̈n ciëën kekë bänyke kedhie.

¹⁵ Na wën bï yen ciëën, ke melik räm ke kɔc ke Juda në wɛ̈ɛ̈r de Jordan nɔm, kɔc ë bɔ̈ në Gilgal bïk en bɛ̈n ruac lɔŋ de kiir.

¹⁶ Go Cimei, raan dhiën ë Benjamin ë Baɣurim, go bɛ̈n ë Jordan nɔm bï bɛ̈n yök ke melik Debid.

¹⁷ Ku Cimei aa cath kekë agum de kɔc ke dhiën ë Benjamin. Ku Dhiba lïm baai de Thaulo, acï bɛ̈n aya ke cath ke wɛ̈ɛ̈tke kathiëër ku dhïc ku lïïm kathiërrou, gokï ɣet ë wɛ̈ɛ̈r de Jordan nɔm ë melik nɔm tueŋ.

¹⁸ Gokï wɛ̈ɛ̈r de Jordan teem ë kɔc ke melik ëtök, ke ke bï kë kɔɔr ë melik yepiɔ̈u aa looi. Të wën kïït ë melik rɔt bïï kiir teem kɔ̈u, go Cimei rɔt cuat piny në melik nɔm.

Debid Anyuth kokëpiɔ̈u Cimei

¹⁹ Go lɛ̈k melik an, “Yïn bɛ̈nydï, pälë yɛn awäny wään bä looi në kööl ɣɔn nyiëëŋ yïn Jeruthalem piny. Pälë yɛn, du yɛn muk ater, ku du tak.

²⁰ Aŋiɛc bɛ̈ny, nɔn cän wäc, yeka bä yɛn tueŋ tëde yïn ee köölë, në kɔc ke dhiën nu të lɔ rut, yïn bɛ̈nydï!”

²¹ Go Abicai wën ë Dheruia lueel an, “Cimei arɔ̈ŋ ke thuɔɔu në biäk cïï yen raan cï Bɛ̈nydït lɔc ke ee melik cieen!”

²² Go Debid lɛ̈k Abicai kekë Jowap mänhë an, “Eeŋa cï we luɔp, wek wɛ̈ɛ̈t ke Dheruia? Wek kɔɔr bäk yɛn luöi nuan? Ee yɛn ee melik de Yithriɛl ënɔɔnë, acïn raan de Yithriɛl bï nɔ̈k ee köölë.”

²³ Na wën ke lɛ̈k ë melik Cimei an, “Yïn cä gäm jamdï në gutguut, yïn cïï bï nɔ̈k.”

Debid Anyuth Kokëpiɔ̈u Mepiboceth

²⁴ Mepiboceth, wën ë wën ë Thaulo, acï lɔ ayadäŋ le yök kekë melik Debid, ku Mepiboceth akën yecök waak, ku akën yenɔm muut, ku akën lupɔɔke waak, gɔl të wään jël ë melik në Jeruthalem aɣet wään bïï yen ciëën ke cï tiam.

²⁵ Wën cï Mepiboceth ɣëët Jeruthalem ke lɔ yök ke melik, go ë melik thiëëc an, “Mepiboceth, eeŋö pɛ̈n yïn jäl we yɛn ëtök?”

²⁶ Ago bɛ̈ɛ̈r an, “Bɛ̈nydï, aŋic nɔn yan aduany. Acä lɛ̈k lïmdï bï muldï duöt kɔ̈u, aguɔ lɔ wok ë yïn ëtök, ku ë yɛn nyiɛɛn.

²⁷ Go yɛn cäk thok ë bɛ̈nydï nɔm, ku yïn cït tunynhial de Nhialic, ka yïn luöi ë yɛn kë cï tak ke piɛth tëde yïn.

²⁸ Baai de wäär ëbɛ̈n arɔ̈ŋ bä keek nɔ̈k, ku yïn cï ya gäm yic bä cam wo yïn ë paamdu nɔm. Ka yɛn cïn nɔm yic bä kokëpiɔ̈u luɔp tëde melik.”

²⁹ Go melik puɔ̈k nɔm en an, “Du de kë bä bɛ lueel. Acä lueel nɔn bän we tëk piny de Thaulo we Dhiba.”

³⁰ Go Mepiboceth këde melik bɛ̈ɛ̈r an, “Tɔ piny nööm Dhiba ëbɛ̈n, ku yɛn mitpiɔ̈u luɔi cïï bɛ̈nydiën melik bɛ̈n ë pial ë guöp.”

Debid Anyuth Kokëpiɔ̈u Bardhilai

³¹ Go Bardhilai raan ë Giliyad bɛ̈n ë Rogelim ke bï melik bɛ̈n ruac të teem en wɛ̈ɛ̈r de Jordan kɔ̈u.

³² Ku Bardhilai aaye monydïït cï dhiɔp, ade nɔm run kathiërbɛ̈t. Aa ye raan kueth, ku aaye melik yiɛ̈n këcam në Maɣanayim.

³³ Go ë melik lɛ̈k en an, “Bä lokku ëtök Jeruthalem, ku yïn bä lɔ muk apiɛth.”

³⁴ Go ë Bardhilai puɔ̈k nɔm melik an, “Yɛn cïn nɔm run juëc bän ke pïïr, eeŋö bï ya lɛɛr Jeruthalem wokë melik?

³⁵ Yɛn cï run guɔ aa thiërbɛ̈t, ka cïn kë be yɛn aa tɔ mit piɔ̈u. Yɛn cïï pïïu ya dek ayï këcam ee yɔ̈k miɛt ë yathok, ayï kɔc kët acä keek ee piŋ röt. Ee yïn bä lɔ nuaan.

³⁶ Yɛn cïï athiɛɛi dïït cït ee kënë kɔɔr. Yïn bä ruac tei ë määth ë wɛ̈ɛ̈r de Jordan lɔŋtui.

³⁷ Ku tɔ yɛn tɔ puk yanɔm ciëën wunda, aguɔ lɔ thou të thiääk kekë rɛ̈ŋ ke wärkuɔ. Ku Kimɣam wëndï kï, tɔ lɔ ke yïn, bɛ̈nydï, bïï yïn lɔ luööi, luöiyë kë ye tak ke piɛth ë yïpiɔ̈u.”

³⁸ Go melik puk nɔm an, “Kimɣam abä jɔt ke yɛn ëtök, abä luöi kë kɔɔr ë yïpiɔ̈u. Ku yïn bä luööi kë kɔɔr ë yïpiɔ̈u.”

³⁹ Go Debid kekë kɔcke kedhie wɛ̈ɛ̈r de Jordan jɔ teem. Go Bardhilai ciim thok ku gëm athiɛɛide, go Bardhilai yenɔm puɔ̈k baai.

Juda kekë Yithriɛl Atëërkï Melik

⁴⁰ Na wën cï melik wɛ̈ɛ̈r de Jordan teem kɔ̈u, ke ruɛc ë kɔc ke Juda, ku lɔ biäk de kɔc ke Yithriɛl, go lɔ Gilgal, go Kimɣam lɔ ke yen ëtök

⁴¹ Na wën ke kɔc ke Yithriɛl kedhie ë ke lɔ tëde melik ku luelkï an, “Eeŋö ye mïthëkɔckuɔn ke Juda, ye tak nɔn bïï kek nïïm yic bïk yïn ruac, wekë baaidu, ku kɔcku ë wɛ̈ɛ̈r de Jordan?”

⁴² Go kɔc ke Juda puɔ̈k nɔm kɔc ke Yithriɛl an, “Aa loiku në biäk rɛɛn wok në melik. Eeŋö tɔ week tɔ göth? Akën këcamda ɣɔɔc, ku acïn kë cï gäm wook.”

⁴³ Go kɔc ke Yithriɛl puɔ̈k nɔm kɔc ke Juda an, “Wok de nïïm biäk kathiëër në melikic, ku wo de nïïm yic në Debidic awär week, cakaa nɔn yen raandun! Ka eeŋö ya wek wo biɔɔn gup? Wok ë kɔn jam tueŋ në biäk bïï melik bɛ̈n ciëën!” Ku kɔc ke Juda aa ke ye jamden lueel ke cin yic riëëu, awär kɔc ke Yithriɛl.