2 Mel 3 - JAM DE NHIALIC 2011

Tɔŋ në Kaam de Yithriɛl ku Mowap

¹ Në ruöön thiëër ku bɛ̈t yic, në bääny de Jeɣocapat melik de Juda, go Jeɣoram wën de Aɣap bääny gɔl ke ee melik de Yithriɛl, ago bääny muk ë Thamaria në run kathiëër ku rou.

² Acï karɛc looi në Bɛ̈nydït nɔm, ku aa cïï cït wun ku man, acï mën de Baal ɣɔn cï wun looi riɔ̈ɔ̈k.

³ Ku acït Jerobowam wën ë Nebat ɣɔn wɛt Yithriɛl në awɛ̈ɛ̈c yiic, ku akën ke pɔ̈l.

⁴ Melik Meca de Mowap raan de nɔm thök, në ruöön thok ëbɛ̈n ade kak ë ye ke gam kekë cït ajuëër ke melik de Yithriɛl, bɔt de agum (100,000) de thök amɛ̈l ku nhiëm cï tem në thök amɛ̈l ka bɔt de agum (100,000).

⁵ Na ɣɔn cï melik Aɣap de Yithriɛl thou, ke Meca melik de Mowap reec melik de Yithriɛl thok.

⁶ Go melik Jeɣoram bɛ̈n bei në Thamaria, ku mɛ̈ɛ̈t remdɛn ë tɔŋ de Yithriɛlic ëbɛ̈n.

⁷ Go thok tuöc melik Jeɣocapat de Juda an, “Melik de Mowap acï a rɛɛc thok.” Duɛ̈ɛ̈rë lɔ tɔŋ we yɛn Mowap? Go melik Jeɣocapat puk nɔm an, “Apiɛth yɛn bï lɔ, yɛn cït yïn, kɔckï acïtkï kɔcku, jöŋgöörkï acïtkï jöŋgöörku.”

⁸ Na wën ke luel an, “Ee Kueerou bï wok lɔ?” Go Jeɣoram bɛ̈ɛ̈r an, “Wok bï tëëk në kueer ë jɔ̈ɔ̈r de Edomic.”

⁹ Ëtɛ̈ɛ̈n go melik Jeɣoram de Yithriɛl ku melik de Juda ku melik de Edom lɔ. Na wën aa cïk cath në nïn kadhorou, ke rem de tɔŋ ayïï ɣɔ̈k ë kuɛɛthë në kecök acïk ciën pïïu ke dëk.

¹⁰ Go Jeɣoram melik de Yithriɛl lueel an, “Wok cï thou! Bɛ̈nydït acï wook wadiäk cɔɔl ku tɛ̈ɛ̈u keek në Mowap cin!”

¹¹ Go melik Jeɣocapat thiëc an, “De tiët ë Bɛ̈nydït duëër wok Bɛ̈nydït luɔp në ye?” Go raan töŋ ë bäny ee melik de Yithriɛl luööi lueel an, “Elica wën ë Capat atɔ̈u eenë, yen aaye raan ë nu Elija cök.”

¹² Go Jeɣocapat lueel an, “Wël ke Bɛ̈nydït anukï ë yen.” Na wën ke melik de Yithriɛl, ku Jeɣocapat, ku melik de Edom lɔ piny të nu yen.

¹³ Go Elica lɛ̈k melik de Yithriɛl an, “Eeŋödï wo yï? Lɔ tëde tït ke wuur ku moor.” Go melik de Yithriɛl lɛ̈k en an, “Ei, ee Bɛ̈nydït Yen acï meliikë kadiäk cɔɔl bï ke bɛ̈n tääu në Mowap cin.”

¹⁴ Go Elica lueel an, “Yɛn cï kuëëŋ në Bɛ̈nydït de rɛm pïïr, Raan ya luööi, na cie luɔi riëëu ɛn Jeɣocapat melik de Juda, ke yïn cä duëër lieec, ku cä yï tïŋ.

¹⁵ Ku ënɔɔnë kɔ̈ɔ̈rë yɛn raan ee gut ë thom.” Ku të wën gut ë raan thomde, ke riɛl ë Bɛ̈nydït bɔ̈ në Elica guöp.

¹⁶ Ku lueel an, “Acïï Bɛ̈nydït lueel, an, ‘Yɛn bï nyin cï dëuwë thiɔ̈ɔ̈ŋic në awuul juëc.’

¹⁷ Në baŋ cïï Bɛ̈nydït E lueel an, ‘Yïn cïï deŋ bï tïŋ kekë yom, ku awuulkë abïk yiic thiäŋ në pïïu, ka yïn bï dek thïn wekë ɣɔ̈kku, ku läiku.’

¹⁸ Kënë apiɔlic në Bɛ̈nydït nyin, ku Yen aya abï Mowap tääu ë we cin,

¹⁹ Ku yïn bï wuötkɛn piɛth cï ŋiëc gël peec, ku wuöt cï lɔc ku yiɛpkï tiim piɛth ëbɛ̈n, ku takï nyin riŋ ë pïïu thïn kääc, ku riäkkï pinydɛn ŋic luɔk ëbɛ̈n në kur.”

²⁰ Na ɣɔn amiäk däŋë në thaar cït ë thaarë të wën ye miɔ̈c amiäk gam, ke pïïu ë ke jɔ guɔ bɛ̈n të lɔ Edom, abï piny thiäŋ ke pïïu.

²¹ Na wën aa lɔ kɔc ke Mowap ye piŋ, nɔn bïï meliik kadiäk bïk keek bɛ̈n mak, go kɔc wën lëu muŋ de ka ke tɔŋ ëbɛ̈n tɔ cɔl, dhuök ayï röördït, ku lek kɔ̈ɔ̈c në akeu nɔm.

²² Na wën aa lek röt jɔt miäk adurduur ke ke tïŋ riaau de akɔ̈l në pïïuwiic, ku woikï kë cït nɔn ë riɛm.

²³ Gokï lueel an, “Kënë ee riɛm, meliik acïk piɔ̈t kapäc ka wek Mowap lok nömku röt käŋ!”

²⁴ Na wën aa lɔ kɔc ke Mowap bɛ̈n të cï kɔc ke Yithriɛl piɔ̈ɔ̈t thïn, go kɔc ke Yithriɛl röt jɔt, ku rɛ̈mkï në keek, arëk abïk keek cop, abï kɔc ke Mowap kat ë keek, agokï kɔc ke Mowap nɔ̈k të le kek ke ke kɔt.

²⁵ Ku riäkkï wuötken ku duum ke tiim ee luɔk ë mïth piɛth ëbɛ̈n, acïk duum ëbɛ̈n cuɛ̈t yiic kur, arëk abïk yiic thiäŋ, ku tɔkï nyïïn ke pïïu kääc ëbɛ̈n, ku yepkï tiim piɛth ëbɛ̈n. Ee wun cɔl Kirɣereth yen aa dɔ̈ŋ kekë kurke, go rem ee moc ë kɔi ye lɔ̈ɔ̈k tuɔɔk ku dɔmkï.

²⁶ Na wën aa lɔ melik de Mowap en ŋic nɔn cïï tɔŋ yic riɛl, go rem de tɔŋ raan bot kadhorou kuany, ke ke muk abätɛ̈ɛ̈u ku dïlkï kenïïm an temkï tuuŋ de melik de Edom kɔ̈u ku akënkï bɛ̈n lëu.

²⁷ Go wëndɛn dït ee yen duëër lɔ̈ɔ̈k bɛ̈n ë yecök ke ye melik nööm, ku gɛm ke ye miɔ̈c nɛ̈kë yanh ë Mowap në kal ë pänydït nɔm. Go riɔ̈ɔ̈c dït kɔc ke Yithriɛl dɔm, gokï röt pɔ̈k ciëën, bïk pinyden.