2 Mel 14 - JAM DE NHIALIC 2011

Amadhia Melik de Juda

¹ Na ɣɔn aacï run ke Jowac wën ë Jeɣowadh aa rou ke ye melik de Yithriɛl, go Amadhia wën ë Jowac aa melik ë Juda,

² aaye run thiërrou ku dhïc, go bääny muk ë Jeruthalem në run kathiërrou ku dhoŋuan. Man acɔl Jeɣowadhin në Jeruthalem.

³ Acï këpiɛth looi në Bɛ̈nydït nɔm, ku aa cïï cït kuɛɛrë Debid, aa loi kë cït kë cï wun Jowac looi.

⁴ Ku ɣään thöny aake ŋoot ke ke kënë nyaai, ku kɔc aake ye lɔ lek miɔ̈c ku wal ŋïr nyuöp yiëth ëtɛ̈ɛ̈n.

⁵ Na ɣɔn aacï bääny de melik jɔ lɔ rok në Amadhia ciin, ke jɔ kɔc ee ye luööi nɔ̈k, kɔc ɣɔn näk melik wun.

⁶ Ku akën mïthken bɛ̈n nɔ̈k në këde lööŋ ɣɔn cï Bɛ̈nydït lɛ̈k Mothe an: “Meth acïï bï nɔ̈k në awäny de wun, ku wun meth acïï bï nɔ̈k në awäny de meth. Raan abï aa nɔ̈k në awäny ë looi në yen guöpde.”

⁷ Amadhia acï aguum kathiëër ke rem de tɔŋ de Edom nɔ̈k në Wak de Amilɔ yic, ku dɔm wun cɔl Thela në tɔŋic, ku ciëk an Joktheel aɣet cï ee köölë.

⁸ Ku jɔ Amadhia kɔc tuöc melik Jowac de Yithriɛl, wën ë Jeɣowadh, ku ye wën ë Jeɣu melik de Yithriɛl an, “Bäär buk bɛ̈n jam ke wo tuum wonïïm.

⁹ Go Jowac melik de Yithriɛl pɔ̈k nɔm Amadhia melik de Juda an: “Të cï kuɔɔth nu ë kuur ë Lebanɔn nɔm tuöc thok thidar an: ‘Gämë ya nyandu bïï wëndï thiaak.’ Go lɛ̈n roor bɛ̈n ku thil piny.

¹⁰ Ënɔɔnë Amadhia, yïn cï kɔc ke Edom tiaam, ka yïn cï lɛc dɔm arëët, jɔ pëk wekë dhuëëŋduönë, ku rɛ̈ɛ̈rë paandu, eeŋö yïn kërac kɔɔr bä riääk gɔ̈n rɔt wekë Juda?”

¹¹ Ku Amadhia akën ee jamë bɛ̈n gam, go melik Jowac lɔ biic kekë remdɛn ë tɔŋ, ku piɔ̈tkï në Beth Cemec de Juda.

¹² Go Yithriɛl rem de tɔŋ de Juda tiaam, ago raan ëbɛ̈n kat ke lɔ baaide.

¹³ Go Jowac melik de Yithriɛl Amadhia melik de Juda dɔm, ee wën Jowac, Jowac wën ë Aɣadhia, në Beth Cemec, go bɛ̈n Jeruthalem ku jiëp kal ë Jeruthalem piny, gɔl në Thoŋ de Eparaim ale guööt në Thoŋ de Aguk, kaam dïït duëër bɛ̈ɛ̈r de aa bot kaarou 200 ke mitïïr.

¹⁴ Ku nööm adhääp ëbɛ̈n ku ateek, ku aduuk cï yök ëbɛ̈n Luaŋdït de Bɛ̈nydït, ku ka cï yök të ye käŋ tɔ̈ɔ̈u thïn baai de melik, ku puk e nɔm Thamaria. Ku jɔt kɔc cï mac aya.

¹⁵ Këriëëc ëbɛ̈n cï Jowac looi, ku kakɛn ke jööt ë tɔŋ, cï yen tɔŋ thɔ̈ɔ̈r kekë Amadhia melik de Juda, acï ke gɔ̈ɔ̈r në Awerek de kathɛɛr ke Meliik ke Yithriɛl yiic.

¹⁶ Go Jowac thou, go tɔ̈ɔ̈u ë rɛ̈ŋ ke meliik ke Thamaria yiic, ago Jerobowam de Rou wënde lɔ në nyinde yic ke ye melik.

Thon de Amadhia Melik de Juda

¹⁷ Amadhia wën ë Jowac melik de Juda aa rëër në run kathiëër ku dhïc, në thon ë Jowac cök wën ë Jeɣowadh melik de Yithriɛl.

¹⁸ Këriëëc ëbɛ̈n cï Amadhia looi, acï ke gɔ̈ɔ̈r në Awerek de kathɛɛr ke Meliik ke Juda yiic.

¹⁹ Gokï luöi kiɛɛr rac në Jeruthalem, go rɔt kual leer Lacic. Gokï kɔc tuɔɔc ë yecök Lacic ku näkkï ëtɛ̈ɛ̈n.

²⁰ Gokï guöpde bɛ̈ɛ̈i ke ɣɛ̈ɛ̈ckï ke pukkï nɔm Jeruthalem në Jöŋgöör kɔ̈ɔ̈th, ku tɔ̈ɔ̈u ë Jeruthalem ke kuarken ë Pänydït de Debid yic.

²¹ Go kɔc ke Juda kedhie wëndɛn ee run thiëër ku dhetem cɔl Adharia tääu në nyin ë Amadhia wunic ke ye melik.

²² Na wën ke Adharia ë puk Elath nɔm Juda ku yïk në thon ë wun cök.

Jerobowam de Rou Melik de Yithriɛl

²³ Në ruöön de thiëër ku dhïc yic, në bääny de Amadhia wën ë Jowac melik de Juda, go Jerobowam wën ë Jowac bääny gɔl ke ee melik de Yithriɛl, ago bääny muk ë Thamaria në run kathiërŋuan ku tök.

²⁴ Acï karɛc looi në Bɛ̈nydït nɔm, akën jäl në awɛ̈ɛ̈c ke Jerobowam wën ë Nebat yic, raan ɣɔn tɔ kɔc ke Yithriɛl wäc.

²⁵ Yen, acï aken ë Yithriɛl puk nɔm, ɣɔn ɣet piny de Ɣamath, gɔl të lɔ rut ɣeet ë Wɛ̈ɛ̈r de Amilɔ biäk të lɔ wöuwic. Yen kë wään cï Bɛ̈nydït, Nhialic de Yithriɛl gutguut lueel ka në lïmde tiët Jona wën de Amitai thok, wun cɔl Gath Ɣeper.

²⁶ Bɛ̈nydït aacï luɔi nuɛɛn ë Yithriɛl arëët tïŋ, acïn lïm, ku acïn raan lääu nɔm, ku cïn raan kony Yithriɛl.

²⁷ Ku akën ë Bɛ̈nydït lueel nɔn bï Yen rin ke Yithriɛl cuöth bei në piny nɔm, go ke luäk bei në kueer de melik Jerobowam de Rou wën de Jowac.

²⁸ Këriëëc ëbɛ̈n cï melik Jerobowam de Rou looi, ku kakɛn ke jööt tɔŋ, ku riɛldɛn cï yen Damathko ku Ɣamath pɔ̈k nɔm Yithriɛl, acï ke gɔ̈ɔ̈r në awerek de kathɛɛr ke meliik ke Yithriɛl yiic.

²⁹ Go Jerobowam jɔ thou, go tɔ̈ɔ̈u në rɛ̈ŋ ke meliik ke Yithriɛl yiic, ago Dhekaria, wënde lɔ në nyinde yic ke ye melik.