2 Mel 10 - JAM DE NHIALIC 2011

Käu de Aɣap Anäk Keek

¹ Käu de melik Aɣap rɛ̈ɛ̈r ë Thamaria ayek thiërdhorou. Go Jeɣu awerek gäär Thamaria, gɛ̈ɛ̈r bäny ke wut, ku röördït, ku kɔc ee käu de Aɣap gël, lueel an:

² “Wɛ̈ɛ̈t ke melik anukï në wecin, ku abëël ke tɔŋ ku jöŋgöör anukï në week, ku we de nïïm pɛ̈ɛ̈nydït cï gël, ku wëu ke tɔŋ. Të la wek awerekë yök

³ lackï raan rɔ̈ŋ në käu de melikic, ku takï ee melik, ku thɔ̈ɔ̈rkï bäk kony.”

⁴ Go bäny ceŋ Thamaria riɔ̈ɔ̈c, ku luelkï an, “Buk Jeɣu rɛɛc adï, raan kën ë bäny kaarou lëu, melik Joram kekë melik Aɣadhia?”

⁵ Go bɛ̈ny de rem tɔ̈u në ɣön ë melik nɔm, ku bäny mac baai, ku kɔc ke wut, ku kɔc ee mïth ke melik tiit, acïk awerekë bɛ̈n tuöc Jeɣu, luelkï an: “Wok ee lïïmku, ku wok gam këriëëc bä lɛ̈k wook ëbɛ̈n, ku acïn raan buk looi ke ye melik, loi kë ye tiŋ ke piɛth ë yïnyin.”

⁶ Go Jeɣu ke bɛ gäär awerek däŋ ë rou an, “Na täukï në yɛn, na yak jamdï piŋ, ke we bïï nïïm ke käu de melik Aɣap, ku yiɛ̈nkï ke yɛn Jedhreel në thaar cït ee kënë miäk.” Ku käu de melik Aɣap kathiërdhorou, aake ye bäny ke tiit baai ë Thamaria, kɔc ɣɔn muk keek.

⁷ Na ɣɔn lek awerek de Jeɣu yök, gokï käu de melik Aɣap kathiërdhorou dɔm, ku näkkï ke ku tɛ̈ɛ̈ukï nïïmken në diööny yiic, ku tuckï ke Jeɣu në Jedhreel.

⁸ Na ɣɔn aa lɔ Jeɣu ye piŋ nɔn cï nïïm ke käu de Aɣap bɛ̈ɛ̈i, go ke yɔ̈ɔ̈k an, ë ke kut nïïm në kuut kaarou në kal ë wut thok, ku nyiëëŋë ke ëtɛ̈ɛ̈n agut cï run ë piny miäk.

⁹ Na ɣɔn amiäk, ke lɔ biic në kal ë pänydït thok, ku lëk kɔc ë tɔ̈u ëtɛ̈ɛ̈n an, “Ee yɛn ë ciëm yai melik Joram ku näk, acïn raan bï ye tääu në we yiëth yen ee kënë. Ku eeŋa ë näk ee kɔckë ëbɛ̈n?

¹⁰ Kënë anyooth kë cïï Bɛ̈nydït lueel në biäk de käu de Aɣap, nɔn bï yen bɛ̈n ke ye yic. Bɛ̈nydït acï këdɛn cï than piny në tiëtdɛn Elija thok looi.”

¹¹ Ago Jeɣu kɔc raan në Aɣap ɣɔn rɛ̈ɛ̈r në Jedhreel nɔ̈k kedhie, ku nɛ̈k bänykɛn ke luɔi kedhie, ku nɛ̈k määthke, ku gucke, acïn raan töŋ cï bɛ̈n döŋ ke pïïr,

Kɔc Raan ë Melik Aɣadhia Anäk Keek

¹² Go Jeɣu jäl në Jedhreel ke lɔ Thamaria në kueeric ëtɛ̈ɛ̈n, të cɔl Betheked wun ë Tïït ke thök.

¹³ Go Jeɣu rɔ̈m ke määthaken ë melik Aɣadhia de Juda, go ke thiëëc an, “Ee wek yï ŋa?” Gokï puk nɔm an, “Wok ee määthaken ë melik Aɣadhia, wok lɔ Jedhreel lok wɛ̈ɛ̈t ke melik thiëëc, ku mïth ke Jedhebel tiiŋ melik.”

¹⁴ Go Jeɣu kɔcke yɔ̈ɔ̈k an, “Jatkï keek apïr!” Gokï ke lɛɛr apïr ku näkkï ke në pul ë Betheked nɔm. Kedhie ayek kɔc kathiërŋuan ku rou (42), ku acïn raan töŋ cïk bɛ̈n pɔ̈l ke pïïr ë keyiic.

Kɔc Raan ë Aɣap cï Döŋ Anäk Keek Kedhie

¹⁵ Go Jeɣu bɛ jäl ëtɛ̈ɛ̈n, go rɔ̈m kekë Jonadap wën ë Rekap kueer, ke bï ye bɛ̈n loor nɔm, go Jeɣu ye thiëëc ku lueel an, “Yïn wekë yɛn täŋda akït? Kë nu në yapiɔ̈u, ee yen nu ë yïpiɔ̈u?’ Go Jonadap bɛ̈ɛ̈r an, “Ee yen.” Go Jeɣu lueel an, “Na ee yeka ke yï bïï yïciin.” Go Jonadap yeciin gam Jeɣu, go Jeɣu ye dɔm ciin, ku miit nhial në abël de tɔŋde yic,

¹⁶ ku lueel an, “Bä we yɛn, bä tïŋ luɔi ye wël ke Bɛ̈nydït a dɔ̈m tiɛɛl.” Go tɔ cath ke yen në abëldɛn ë tɔŋic ke ke lɔ Thamaria.

¹⁷ Na wën aa lek ɣet ëtɛ̈ɛ̈n ke Jeɣu ë näk kɔc raan në Aɣap ëbɛ̈n, abïï ciën raan töŋ cï poth, cït man cïï Bɛ̈nydït ye lueel në tiët Elija thok.

Kɔc ee Baal Lam Anäk Keek

¹⁸ Go Jeɣu kɔc ke Thamaria mat nïïm kedhie, ku lëk keek an, “Melik Aɣap aaye yanh cɔl Baal luööi ë määth, ku yɛn abä jɔ luööi arëët.

¹⁹ Ënɔɔnë calkï tït ke Baal ëbɛ̈n, ku kɔc ee ye lam kedhie, ku guckɛn ee ye luööi kedhie, në cïn raan bï liu thïn në biäk dɛ yɛn miɔ̈c dïït bä bɛ̈n gäm Baal, ku raan lɔ liu thïn acï bï pïïr.” (Ku kënë aaye kiɛɛr tëde Jeɣu, bï yen kɔc ee Baal lam ëbɛ̈n nɔ̈k kedhie.)

²⁰ Na ɣɔn ke Jeɣu ë yöök kɔc an, “Calkï amatnɔm ago Baal bɛ̈n lɔ̈ŋ!” Gokï cɔɔl,

²¹ ago Jeɣu thok tuɔɔc ë baai yic ëbɛ̈n piny de Yithriɛl, go raan ee Baal lam ëbɛ̈n bɛ̈n, abïï ciën raan töŋ cï döŋ wei ke kën bɛ̈n, gokï jɔ lɔ Luaŋdït de Baal, ku jɔkï thiɔ̈ɔ̈ŋic, gɔl në luak thok ale guööt ë luak thar ciëën.

²² Go Jeɣu bɛ̈ny de kake Baal yɔ̈ɔ̈k bïk lupɔɔ ke läm de Baal bei, ku bïï ke gäm kɔc ee Baal lam ëbɛ̈n ceŋkï ke.

²³ Na wën ke Jeɣu ë jɔ lɔ luaŋ de Baal guöpde kekë Jonadap wën ë Rekap, ku lëkkï kɔc ee Baal lam an, “Ŋiɛckï apiɛth nɔn ye kek kɔc ee Baal lam kek tɔ̈u ee tënë kapäc, ku acïn awun de Bɛ̈nydït tɔ̈u ee tënë.”

²⁴ Ëtɛ̈ɛ̈n go Jeɣu ku Jonadap lɔ luɛɛk ku gɛmkï miɔ̈c näk, ku miɔ̈c ye nyop ëbɛ̈n. Ku acï kɔc kathiërbɛ̈t tɔ kääc biic në luaŋ de Baal kɔ̈u, ku yöök keek an, “Näkkï kɔckë kedhie, ku raan lɔ raan tök tɔ bän, ka abï thou në nyinde yic!”

²⁵ Na wën aacï Jeɣu miɔ̈c gam, ke jɔ lɛ̈k bɛ̈ny ë rem de tɔŋ, ku kɔc ee tïït an, “Lakkï luɛɛk ku näkkï keek kedhie, në cïn raan töŋ bän!” Gokï lɔ luɛɛk ke ke cï abätɛ̈ɛ̈u ken coc, ku näkkï keek kedhie, ku jɔkï gupken thɛ̈l bei. Ku lekkï ë luaŋ de Baal thar ciëën,

²⁶ ku jötkï mën yaath ë tɔ̈u luaŋ de Baal bei, ku nyopkï.

²⁷ Ku riäkkï mën de Baal ayï luaŋde, ku jɔkï looi ke ye ɣön ye kɔc lɔ roor thïn agut cï ee köölë.

²⁸ Yen kueer ë nɛ̈k ë Jeɣu kɔc ee Baal lam kedhie ka piny de Yithriɛl.

²⁹ Ku Jeɣu akën rɔt mɛc wei në awɛ̈ɛ̈c ke melik Jerobowam wën ë Nebat yic, ɣɔn tɔ Yithriɛl lɔ në awäny de läm de miöör ke adhääp, wään cï ke tääu ë Bethel ku Dan.

³⁰ Go Bɛ̈nydït lɛ̈k Jeɣu an, “Yïn cï këpiɛth looi në luɔi cï yïn yic looi në Yanyin, në kë cï looi baai de Aɣap cït man nu yen në Yapiɔ̈u, gɔl në mïth ke käudu, ale guööt ë rɛm kaŋuan bï lɔ̈ɔ̈k bɛ̈n, abïk rëër në thööc de Yithriɛl nɔm.”

³¹ Ku Jeɣu aa kën löŋ de Bɛ̈nydït, Nhialic de Yithriɛl döt apiɛth në yepiɔ̈u ëbɛ̈n, akën rɔt mɛc wei në awäny de Jerobowam yic, raan ɣɔn tɔ kɔc ke Yithriɛl wäc.

Thon ë Jeɣu

³² Në aköölkë yiic, Bɛ̈nydït acï bɛ̈n lɔ ke nyiic piny de Yithriɛl. Kɔc ke Yithriɛl aake cïï melik Ɣadhiɛl de Thiriya ke tiaam në akɛɛth ke Yithriɛl nïïm ëbɛ̈n,

³³ leer ë Jordan biäk të lɔ aköl amiäk agut cï piny de Giliyad ëbɛ̈n. Ku Gad ku Ruben, ku jɔt në Aroyer nu në wak de Arnon nɔm, yen aye Giliyad ku Bacan.

³⁴ Këriëëc ëbɛ̈n cï Jeɣu looi, ku lɔ luɔidɛn de jööt cï looi ëbɛ̈n, acï ke gɔ̈ɔ̈r në Awerek de kathɛɛr ke Meliik ke Yithriɛl yiic.

³⁵ Go Jeɣu thou, gokï tɔ̈ɔ̈u ë Thamaria, go Jeɣowadh wënde lɔ në nyinde yic ke ye melik.

³⁶ Jeɣu acï Thamaria muk ke ye melik de Yithriɛl në run kathiërrou ku bɛ̈t.