2 Lëk 28 - JAM DE NHIALIC 2011

Aɣadh Melik de Juda

¹ Aɣadh aa dɔm bääny ke ee run thiërrou, go bääny muk ë Jeruthalem në run kathiëër ku dhetem. Akën täu piɛth de kuɛɛrë melik Debid kuany yic, acï kërac looi ë Bɛ̈nydït nɔm,

² ago ka ye meliik ke Yithriɛl looi kuany yiic. Acï rɔt luöi kïn de yanh de Baal ë thäth në wëëth,

³ ku ye nyuöp wal ŋïr në wak de Ɣinom yic, arëk abï wɛ̈ɛ̈tke aa gäm yiëth ke ke ye miɔ̈c ye nyop ëbɛ̈n, ku jɔ luɔi rɛɛc de juöör wään bï Bɛ̈nydït keek cuɔp wei në ye pinyë yic aa looi, të wään jɔ Yithriɛl lɔ ke ke bɔ̈ thïn.

⁴ Ku Aɣadh aaye miɔ̈c ye nyop ëbɛ̈n gäm yiëth tëde ɣään ke läm, në kur nïïm, ku në atïïp ke tiim thäär, ku nyop wal ŋïr.

Tɔŋ në Thiriya ku Yithriɛl

⁵ Ku në biäk cïï Aɣadh awɛ̈ɛ̈c juëc looi, acï Bɛ̈nydït Nhialicde nyääŋ piny, ago tiaam në melik de Thiriya ku peec kɔc juëc ë Juda ku leer keek Damathko ke ke mac. Bɛ̈nydït acï Peka wën de Remalia melik de Yithriɛl tɔ tiam Aɣadh melik de Juda ku nɛ̈k agum ku bot kathiërrou 120,000 de rem de tɔŋ ë Juda ë kööl tök.

⁶ Ee Bɛ̈nydït Nhialic de kuarken, Yen aa tɔ ee riäŋë tɔ bɔ̈ tëde keek, në biäk cïï kɔc ke Juda yen nyääŋ piny.

⁷ Ku aa de raan töŋ de tɔŋ ë Yithriɛl cɔl Dhikiri acï Melik Maathia wën ë Aɣadh nɔ̈k, ku nɛ̈k Adhirkam bɛ̈ny muk ɣön ë bääny, ku Elekana bɛ̈ny ë rem de tɔŋ lɔ ë melik cök.

⁸ Acakaa nɔn ye Juda kɔc raan ë keek, rem de tɔŋ de Yithriɛl acïk aguum bot kaarou (200,000) de diäär ku mïth peec, ke ke mac ku leerkï keek Thamaria, ku peckï kajuëc kɔ̈k.

Tiët Oded

⁹ Ku ade tiët de Bɛ̈nydït ëtɛ̈ɛ̈n ë Thamaria cɔl Oded. Go bɛ̈n bei bïï bɛ̈n yök ke rem de tɔŋ de Yithriɛl ke ke muk kɔckɛn ke Juda cïk peec, ku të wën aa jɔkï lɔ Thamaria, go ë tiët lueel an, “Bɛ̈nydït Nhialic de kuarkun aa göth kekë Juda, yeka cä wek keek tiam, ku acï nääkdït cä wek keek nɔ̈k piŋ paannhial.

¹⁰ Ku ënɔɔnë wek kɔɔr bäk diäär ku röör ke Juda ku Jeruthalem tɔ ee lïïmkun. Kënkï ŋic nɔn cä wek awäc luöi Bɛ̈nydït Nhialicdun ayadäŋ?

¹¹ Piɛŋkï kë lɛ̈k week! Kɔc cäk keek peecë ke ke mac ayek mïthëkɔckun ku nyïïrëkɔckun. Takï keek jäl, na cie yen ke Bɛ̈nydït abï we luöi këtuc.”

¹² Na wën ke röördït kaŋuan ke dhiën ë Eparaim, yï Adharia wën ë Jeɣoɣanan, ku Berekia wën ë Mecilemoth, ku Jedhikia wën ë Calum, ku Amatha wën ë Ɣadelai, ke ke reec kë cï rem de tɔŋ looi.

¹³ Acïk jam luelkï an, “Duökï kɔc cäk peecë bïï ee tënë! Wok ee kɔc cï awänydït luöi Bɛ̈nydït ku acuk tɔ göth në agönh bï en wo luöi këtuc. Ku ënɔɔnë wek kɔɔr bäk kë bï awänyda ŋuak nyin looi.”

¹⁴ Ago rem de tɔŋ kɔc cï peec ku ka cïk peec nyäŋ bänyken kekë amatnɔm ëbɛ̈n,

¹⁵ ago ee kɔckë kaŋuan kuany ke ke bï kɔc mac yiɛ̈n kɔ̈ɔ̈th lupɔɔ wään cïk ke peec. Acïk keek gäm lupɔɔ ku war bïk keek cieŋ, ku gëmkï keek këcam dït ku pïïu dekkï, ku tɔckï bɔ̈ɔ̈tken nyïïn në miök de olip. Agokï kɔc cï gup kɔ̈c cïï cath lëu tääu në mul kɔ̈ɔ̈th, ku jɔtkï kɔc mac kedhie, puk ë kenïïm ciëën piny ë Juda në Jeriko, pänydït de tiim ke akööt. Na wën ke Yithriɛl ë ke jɔ kenïïm pɔ̈k Thamaria.

Aɣadh Akɔɔr Kuɔny tëde Athiriya

^16-17 Go melik Aɣadh raan tuöc Tiglath Pilethar melik de Athiriya bïï yen kony. Në biäk cï ë kɔc ke Edom Juda mak ku tiɛɛm ku peec kɔc.

¹⁸ Ku kɔc ke Pilithiin aake lɔ ke ke yak bɛ̈i ke Juda yiic, bɛ̈i nu ë kur thäär të lɔ aköl athɛ̈i ku bɛ̈i nu të lɔ wöuwic. Ku peckï pɛ̈ɛ̈nydït ke Beth Cemec, Aijalon ku Gederoth, ku pɛ̈ɛ̈nydït ke Thoko, ku Timena, ku Gimdho në wuötkɛn kor, ku lek ëtɛ̈ɛ̈n ɣap ke ee këden.

¹⁹ Ku në biäk cï melik Aɣadh de Juda yic de kɔcke rɛɛc ku riëëk Bɛ̈nydït piɔ̈u, go Bɛ̈nydït riääk tuöc kɔc ke Juda.

²⁰ Ago melik de Athiriya luɔi kony en Aɣadh pɔ̈l ku reec ku tɔ nuan arëët.

²¹ Go Aɣadh adhäm de Luaŋdït nööm, ku nööm kake ɣön ë bääny, ku kake ɣööt ke bäny ke kɔc, ku gëm keek melik de Athiriya, ku akën en bɛ̈n kony ayadäŋ.

Awɛ̈ɛ̈c ke Aɣadh

²² Na wën aa cï awɛ̈ɛ̈c ke melik Aɣadh juëc, go Bɛ̈nydït luöi kërɛɛc kënë kɔn looi anande.

²³ Go miɔ̈c näk gäm yiëth ke Thiriya wään cï yen tiaam ë tɔŋic. Ku lueel an, “Yiëth kë acïk melik de Athiriya kony, na cä keek näk, ka bïk yɛn dhil kony aya.” Kënë acï riäŋ dït bɛ̈n bɛ̈ɛ̈i ë yeguöp ku Yithriɛl ëbɛ̈n.

²⁴ Go Aɣadh kake ɣön ë Nhialic määt yiic kedhie, ku dhuuŋ keek abïk lɔ thorthor. Ku thiɔ̈ɔ̈k ɣön ë Bɛ̈nydït thok, ku looi yïk në aguuk ke Jeruthalem yiic ëbɛ̈n.

²⁵ Në pɛ̈ɛ̈nydït ke Juda yiic kedhie, acï rɔt luöi ɣään ke läm ë yiëth, ku të ye wal ŋïr nyuöp yiëth alɛi. Në ee kueerë acï rɔt yiɛ̈n agönh de Bɛ̈nydït Nhialic de kuarken.

²⁶ Kajuëc kɔ̈k cï tuöl ë bäänyde yic, gɔl tueŋ leer ciëën, acï ke gɔ̈ɔ̈r në awerek de kathɛɛr ke meliik ke Juda ku Yithriɛl yiic.

²⁷ Go melik Aɣadh thou, go tɔ̈ɔ̈u ë Jeruthalem, ku akënë tɔ̈ɔ̈u në rɛ̈ŋ ke meliik yiic. Go Ɣedhekia wënde lɔ në nyinde yic ke ye melik.