2 Lëk 23 - JAM DE NHIALIC 2011

Reec cï Athalia Rɛɛc

¹ Na ɣɔn cï Jeɣoyada bɛ̈ny de kake Nhialic tïït në run kadhetem, go lueel an aŋuän bä kë cä takë looi. Go bäny ke rem de tɔŋ kadhïc cɔɔl ku mɛ̈t ke keek: Adharia wën ë Jeroɣam, ku Yicmiɛl wën ë Jeɣoɣanan, ku Adharia wën ë Obed, ku Maathia wën ë Adaya, ku lɔ Elicapat wën ë Dhikiri.

² Gokï pɛ̈ɛ̈nydït ke Juda caath yiic kedhie, ku lek kɔc ke dhiën de Lebai ku bänydït ke baai kedhie lɔ bɛ̈ɛ̈i Jeruthalem.

³ Na wën aa cïk kenïïm kut ɣön ë Nhialic, go amatnɔm löŋ mac ëtɛ̈ɛ̈n ë Jowac wën melik. Go Jeɣoyada bɛ̈ny de kake Nhialic lɛ̈k keek an, “Kënë ee wën de Melik cï thou! Ku yen abï dhil aa melik ënɔɔnë, cït man cï Bɛ̈nydït gutguut looi luɔi yen käu de Debid kek abï aa bäny ë ceŋ.

⁴ Ka yen kë buk looi kï: Të le bäny ke kake Nhialic ku kɔc ke Lebai bɛ̈n luui në kööl ë Thabath, abïk keyiic tek ë rou, bï kɔc kɔ̈kë tïït në kal ë Luaŋdït thok,

⁵ ku kɔc kɔ̈kkë abïk ɣön ë bääny tiit thok, ku kɔ̈kkë abïk kenïïm lɔ kut në pëër de kal ë këërkëër yic. Ku kɔc kedhie abïk kenïïm kut në pëër de Luaŋdït yic.

⁶ Acïn raan bïï lɔ në Luaŋdïtic, ee bäny ke kake Nhialic ku lɔ Lebai tɔ̈u në luɔi yic kapäc, kek abï lɔ në Luaŋdïtic, në biäk ɣeer kek yiic, ku kɔc kɔ̈kkë abïk lööŋ ke Bɛ̈nydït dhil riëëu ku rɛ̈ɛ̈rkï biic.

⁷ Kɔc ke Lebai abïk kɔ̈ɔ̈c ke ke tit melik, ke cïk tuɔɔk cil, ku mukkï abätɛ̈ɛ̈uken në kecin, ku abïk tɔ̈u ë melik ëtök të lee yen thïn. Ku na de raan them en bï lɔ në Luaŋdïtic ë riɛl abï nɔ̈k.”

⁸ Go Lebai ku kɔc ke Juda kë cïï Jeɣoyada lɛ̈k keek looi. Röör cï bɛ̈n ë luɔi yic në kööl ë Thabath acïï keek ee päl jäl, go bäny ke rem de tɔŋ kɔc cï thök ë luɔi, ku kɔc bɔ̈ në luɔi yic määt nïïm tëtök.

⁹ Go Jeɣoyada bäny ke rem de tɔŋ tɛ̈k cïn tɔɔŋ ku kööt wään ee kake Melik Debid, aake cï tɔ̈ɔ̈u në ɣön ë Nhialicic.

¹⁰ Ku tɔ röör tɔ kääc ke ke muk abätɛ̈ɛ̈u ë kecin, gɔl në Luaŋdït thok biäk të lɔ wöuwic ale guööt ë biäk të lɔ rut, ke ke wil yïk ku Luaŋdït, bïk melik gël.

¹¹ Na wën ke Jeɣoyada bɛ̈ny de kake Nhialic ë leer Jowac biic, ku tɛ̈ɛ̈u göl ë yenɔm, ku gëm awereŋ töŋ de yic lööŋ ke luɔi de meliik. Ku jɔ bɛ̈n caal ke ee melik, go Jeɣoyada bɛ̈ny de kake Nhialic kekë wɛ̈ɛ̈tke Jowac tɔc ë miök, ago kɔc kedhie cööt ë röldït an, “Melik yïn bï pïïr athɛɛr!”

¹² Go Athalia piŋ të wën cïï kɔc piɔ̈ɔ̈th miɛt në döm de melik, go dap kat ke lɔ ë Luaŋdïtic, të wën cïï kuut dït ë kɔc kenïïm kut.

¹³ Ku ëtɛ̈ɛ̈n ke jɔ melik ë piacë kuany tïŋ në Luaŋdïtic thïn, ke kääc ë mën cï luöi melik ku acï tuɔɔk cil në bäny ke rem de tɔŋ, ku lɔ kɔc koth kɛŋ. Kɔc wou kedhie ke ke mit piɔ̈ɔ̈th ku kothkï kɛŋ, ku lɔ kɔc ee ket në Luaŋdïtic ke ke gut thom ku lɔ̈r ku loikï dhuëëŋ. Go Athalia lupɔɔke rɛtic ku cööt ë röldït an, “Ee nyiin oou! Ee nyiin oou!”

¹⁴ Ku aacïï Jeɣoyada kɔɔr bï Athalia tɔ näk në pëër ë Luaŋdït yic, go bäny ke rem de tɔŋ cɔɔl ku yɔ̈ɔ̈k keek an, “Lɛɛrkï biic ya në kɛm ke abeer ke kɔc wën ee kal tiit thok, ku na de raan kɔɔr bï yen kony ke näkkï në abätäu.”

¹⁵ Gokï dɔm, ku leerkï ɣön ë bääny, ku jɔkï nɔ̈k të thiääk kekë kal Thoŋ ë Jöŋgöör.

Jeɣoyada Akim Luɔi Piny

¹⁶ Go Jeɣoyada bɛ̈ny de kake Nhialic Melik Jowac cɔɔl kekë kɔc bïk mät looi në luɔi bïï kek aa kɔc ke Bɛ̈nydït.

¹⁷ Na wën ke ke lɔ kedhie lek luaŋ de Baal jäp piny. Gokï yïïk ku yiëth nu ëtɛ̈ɛ̈n dhuɔŋ piny, ku nɛ̈kkï Matan guny de Baal në yïk nïïm tueŋ ëtɛ̈ɛ̈n.

¹⁸ Go Jeɣoyada, bäny ke kake Nhialic ku kɔc ke Lebai tääu ë luɔi de Luaŋdïït ë Bɛ̈nydït nɔm. Abïk luɔi cï melik gäm keek Debid aa looi, ku bïk miɔ̈c ye nyop ëbɛ̈n cï gäm Bɛ̈nydït aa looi cït man ë kë cï lööŋ ke Mothe lueel. Ku abïk luɔi de kɛŋ ku lɔ̈r aa muk, ku akööl ke dhuëëŋ.

¹⁹ Ku Jeɣoyada acï kɔc ee Luaŋdït tiit thok kuany, bïk kɔc de gup acuɔl aa gɛ̈l wei.

²⁰ Na wën ke bäny ke rem, ku röördït ke baai, ku kɔc ŋic gäär, ku kut dïït e kɔc, gokï röt mat në Jeɣoyada bɛ̈ny de kake Nhialic bïk melik jɔt Luaŋdït leerkï ɣön ë bääny. Gokï lɔ thïn ë kaldït thok, ku jɔ melik nyuc tëde në thööc nɔm.

²¹ Go kɔc piɔ̈ɔ̈th miɛt kedhie, ku jɔ pänydïtic dɛ mät, në luɔi cï Athalia nɔ̈k në abätäu.