2 Lëk 15 - JAM DE NHIALIC 2011

Atha Akim Luɔi Piny

¹ Na wën ke wëi ke Nhialic ë ke löny Adharia wën ë Oded,

² go jäl le yök kekë melik Atha. Go lɛ̈k en an, “Piɛŋkï kë luɛɛl yïn melik Atha, ku wek kɔc ke Juda ku Benjamin! Bɛ̈nydït abï täu kekë week cït man täu wek në Yen. Na kaarkï, ka bäk yök, ku na wɛlkï wenïïm wei ka abï week nyääŋ piny.

³ Kɔc ke Yithriɛl acïk rëër ë run juëc ke ke cïn nïïm Nhialic yic, ku cïnkï nïïm bäny ke kake Nhialic ee keek wɛ̈ɛ̈t, ku cïnkï lööŋ.

⁴ Ku na de nuɛɛn cï ke yök, ke ke jɔ röt pɔ̈k Bɛ̈nydït, Nhialic de Yithriɛl. Ayek kɔɔr ku yökkï.

⁵ Në ee runkë yiic acïn raan duëër cath ë läŋ, në biäk cï piny nɔm thiäŋ kekë agööth ku anuɔɔn.

⁶ Jur ee jurdäŋë yɔŋ, ku pänydït ee pänydït däŋ yɔŋ, në biäk cïï Nhialic riääk ku nuɛɛn bɛ̈ɛ̈i ë kegup.

⁷ Ku yïn bï dhil riɛl ku du bï bäp. Ku luɔi bä looi abï yïn tɔ yök athiɛɛi.”

⁸ Na wën aa piŋ Atha wël cï tiët Adharia wën ë Oded ke caar, acï yen bɛ̈n gäm riɛl ë piɔ̈u. Ago yiëth riɔ̈ɔ̈k kedhie yiëth tɔ̈u ë Juda ku Benjamin, ku lɔ yiëth kedhie nu ë pɛ̈ɛ̈nydït cï ke peec piny ë kuur de Eparaim yic. Ku tɔ yïïŋ de Bɛ̈nydït tɔ nyɔk ë luɔi, yïïŋ nu ë kal de Luaŋdït yic cil.

⁹ Kɔc juëc acïk bɛ̈n mat ë melik Atha, bïk bɛ̈n rëër në ciɛɛŋde yic, në kɔc ke Eparaim yiic, ku Manatha, ku Thimion, në biäk cïï kek Bɛ̈nydït tïŋ ke tɔ̈u ke yen. Go Atha keek caal ë yelɔ̈ɔ̈m kedhie në kɔc ke Juda ku Benjamin.

¹⁰ Agokï kenïïm kut ë Jeruthalem ë pɛɛi de diäk në ruöön ye Atha run thiëër ku dhïc ke ye melik.

¹¹ Yen ee köölë acïk Bɛ̈nydït bɛ̈n gäm miɔ̈c ye nyop ëbɛ̈n ë kak ë peckï yiic. Bot kadhorou (700) de ɣɔ̈k, ku aguum kadhorou 7000 de thök.

¹² Agokï kuëŋ looi nɔn bïk kek Bɛ̈nydït aa lam yetök, Nhialic de kuarken, në piɔ̈ɔ̈thken ku wëiken ëbɛ̈n.

¹³ Raan ëbɛ̈n, raan koor ayï raan dït, moc ku nɔn ee tik, raan cïï Nhialic bï aa lam abï dhil nɔ̈k.

¹⁴ Acïk gutguut bɛ̈n looi në röl dït në rin ke Bɛ̈nydït, nɔn bï kek löŋ cïk mac döt, ku jɔkï wou ku kothkï kɛŋ.

¹⁵ Kɔc ke Juda acïk piɔ̈ɔ̈th bɛ̈n miɛt arëët në biäk cï kek ee gutguutë looi ë piɔ̈ɔ̈thken ëbɛ̈n. Acïk piɔ̈ɔ̈th lɔyum ë läm de Bɛ̈nydït, ago keek gam ku gëm keek mät në ɣään kedhie.

¹⁶ Na wën ke melik Atha ë nyiɛɛi kokke Maaka tëde man tiiŋ melik, në biäk cïï yen rɔt luöi yanh tiiŋ cɔl Acera, yanh ee kɔc tɔ dhiëth. Ago melik Atha yath kiɛp piny, ku tɔ temë ëbɛ̈n, ku lee nyop ë Wak de Kidron yic.

¹⁷ Na cakaa wään kën ë Atha ɣään ke läm de yiëth riɔ̈ɔ̈k në Yithriɛl yic ëbɛ̈n, acï bɛ̈n ŋoot ke ye piɔ̈u adöt ë Bɛ̈nydït nɔm në pïïrde yic ëbɛ̈n.

¹⁸ Acï ka wään cï Abija wun keek gäm Bɛ̈nydït Nhialic tääu ë ɣön ë Nhialic yic kedhie, ayï kake adhääp, ku kake ateek wään cï keek gam guöpde.

¹⁹ Ku ëtɛ̈ɛ̈n acïn tɔŋ cï bɛ̈n bɛ thɔ̈ɔ̈r agut të ɣɔn cïï runke aa thiërdiäk ku dhïc ë bääny yic.