2 Lëk 1 - JAM DE NHIALIC 2011

Tholomon Aläŋ Pɛlënɔm

¹ Na wën ke Tholomon wën ë melik Debid ë dɔm ciɛɛŋ de Yithriɛl aril, go ë Bɛ̈nydït Nhialicde ye thieei ku tɔ ril aläl.

² Go melik Tholomon jam kekë kɔc ke Yithriɛl kedhie, ku lɔ bänydït ke rem de tɔŋ wat agum de kɔc, ku bänydït ke rem de tɔŋ wat bot de kɔc, ku bäny ee lööŋ guiir, ku röördït ke baai piny de Yithriɛl, ku kɔc kedhie,

³ ago amatnɔm yɔ̈ɔ̈k në baŋ bïï kek lɔ tëde läm ë yen në Gibiɔn. Aake lɔ ëtɛ̈ɛ̈n në biäk tɔ̈u ë paany de män ë Nhialic ëtɛ̈ɛ̈n, paany wään bï Mothe awun de Bɛ̈nydït looi ë jɔ̈ɔ̈ric.

⁴ (Athänduŋ de mät, aa nu ë Jeruthalem, në paany wään cï melik Debid looi, ɣɔn bïï en athänduk në Kiriath Jiriim).

⁵ Ku yïïŋ de maläŋ wään bï Bedhalel looi, Bedhalel wën ë Yuri, ku Yuri wën de wën de Ɣur, aa tɔ̈u aya në Gibiɔn në paany de män de Bɛ̈nydït nɔm. Go melik Tholomon kekë amatnɔm ëbɛ̈n Nhialic lɔ lam ëtɛ̈ɛ̈n.

⁶ Go melik Bɛ̈nydït lam në paany de mät nɔm tueŋ, ku gɛm miɔ̈c näk në yïïŋ de maläŋ nɔm, acï aguum ke ɣɔ̈k bɛ̈n tɔ näk ku ye miɔ̈c ye nyop ëbɛ̈n ë yïk nɔm.

⁷ Në ee wɛ̈ɛ̈rë yic Nhialic acï bɛ̈n tuöl tëde Tholomon, ku thiëëc an, “Eeŋö kɔɔr bä gäm yïn?”

⁸ Go Tholomon pɔ̈k nɔm Nhialic an, “Yïn cï nhiëërduön agɔk nyuöth wäär Debid, ku Yïn cï yɛn tɔ ee melik në nyinde yic.

⁹ Yïn Bɛ̈nydït Nhialic, tääuwë cït man cïn gutguut luöi wäär Debid. Yïn cï ya tɔ ee melik ë kɔc juëc nïïm, kɔc cïï lëu në kuën,

¹⁰ ka Yïn gämë yɛn pɛlënɔm ku ŋïnydekäŋ kaar, bä yɛn ee kɔckë mac apiɛth. Na cie yen, duëër e kɔc juëckuön cït ee kakë lëu në maac adï?”

¹¹ Go Nhialic pɔ̈k nɔm Tholomon an, “Yïn cï ŋiëc thiëc apiɛth. Yïn kën lɔ̈ŋ në luɔi bï yïn dɛ kajuëc, ku wëu juëc, ku luɔi bï ë yïn dɛ kɛk, ku nɔn bïï ë kɔc ke aterdu nɔ̈k, ku ee luɔi bï yïn pïïr ë run juëc, yïn aa läŋ ë biäk de pɛlënɔm ku ŋïnydekäŋ ago kɔckï mac, kɔc cän yïn tääu ë kenïïm ke yï ye melik.

¹² Yïn bä gäm pɛlënɔm ku ŋïnydekäŋ. Ku yɛn bï kajuëc, ku wëu juëc, ku kɛk dït cïn melik cï ye kɔn yök ku cïn raan bï ye bɛ yök gäm yïn aya.”

Kuɛth ku Riɛl de Melik Tholomon

¹³ Na wën ke Tholomon ë puk yenɔm Jeruthalem të wään cï yen lɔ lam në Gidiɔn, të tɔ̈u ë paany de mät thïn. Ku jɔ bääny de Yithriɛl muk ëtɛ̈ɛ̈n.

¹⁴ Go Tholomon rem de tɔŋ guiir, agum ku bot kaŋuan 1,400 de kɔc ke abëël ke tɔŋ, ku aguum kathiëër ku rou 12,000 de kɔc ee thɔ̈ɔ̈r ë jöŋgöör. Go kɔ̈k muk ë Jeruthalem, ku jɔ kɔ̈k tɔ tɔ̈u ë pɛ̈ɛ̈nydït kɔ̈k yiic.

¹⁵ Wään muk en bääny ateek ku adhääp acïk bɛ̈n kith abïk ciët kɔi ë Jeruthalem, ku tim de thidar acï bɛ̈n kith abï ciët tiim ke ŋaap.

¹⁶ Jöŋgöör ke Tholomon aake ye lɔ ɣɔɔc ë Rip ku lɔ Kue, aaye raan cï melik gäm ɣööcden keek ɣɔɔc ë wëu.

¹⁷ Ku ye abëël ke tɔŋ lɔ ɣɔɔc ë Rip. Ayek kɔc ke Ɣit ku bäny ke Thiriya miɔc ë jöŋgöör ku abëël ke tɔŋ, abëël ke tɔŋ aake ye ɣɔɔc në bot kadhetem de ateek, ku jöŋgör tök aaye ɣɔɔc në bɔt ku thiërdhïc de ateek.