2 Kor 7 - JAM DE NHIALIC 2011

¹ Yen ka, ënɔn ciɛth wok wokë ka cï lueel an, bï ke gäm wookë, wek kɔc nhiaar, yok röt waak në acuɔl ëbɛ̈n acol ë guöp ku acol ë wëi, ku yok wopiɔ̈ɔ̈th tɔ ɣer abïk dikëdik në riëëu de Nhialic.

Miɛtëpiɔ̈n de Paulo

² Liɛ̈pkï wepiɔ̈ɔ̈th wook: acïn raan cuk luöi kërac, acïn raan cuk riɔ̈ɔ̈k piɔ̈u, acïn raan cuk cam.

³ Acie jäny jääny ɛn week, yen ë luɛɛl ee kënë: acä kɔn lueel, nɔn täu wek ë wopiɔ̈ɔ̈th, na cakku thou ëtök, ku na cakku pïïr ëtök.

⁴ Yɛn cï a nyin riil aläl, të jaam ɛn wo week, ku lɛɛc rɔt aläl në biäkdun: yɛn cï riit piɔ̈u aläl ka cïn däŋ kaar, yɛn mit piɔ̈u arëët awär këriëëc në këtuc dhal wook ëbɛ̈n.

⁵ Wään, të cï wok bɛ̈n Makedonia, wo cïn lɔ̈ŋ cï wogup lɔ̈ŋ, wo cïï këtuc dhal wook tuɔɔk ë biäkë ku biäkë, ë wogup biic, tɔɔŋ aake nu, ku ë wopiɔ̈ɔ̈th thïn, riɔ̈ɔ̈c aa nu.

⁶ Acakaa kakë kek ë nu, Nhialic, Raan ë kɔc riit piɔ̈ɔ̈th kɔc ë piɔ̈ɔ̈th dhiau, acï wo riit piɔ̈ɔ̈th në bɛ̈n de Tito.

⁷ Ku acie në bɛ̈nde etök, ku në riët cï e riit piɔ̈u yenguöp në këdun ayadäŋ, wään lëk en wook täŋ aa wek ɛn tak aläl, ayï dhiën aa wek dhiau, ayï lɛ̈thduön aa wek yiic lɛ̈th në biäkdï, aguɔ piɔ̈u jɔ miɛt arëët awär miɛtëpiɔ̈u awään.

⁸ Ku acakaa yɛn ë cï week tɔ dhiau piɔ̈ɔ̈th në këcïgɔ̈ɔ̈r, ke yɛn cïï rɔt gäk ënɔɔnë, acakaa yɛn ë cï rɔt kɔn gɔ̈k wään, acä tïŋ nɔn cï këcïgɔ̈ɔ̈rë we tɔ dhiau piɔ̈ɔ̈th, ku we cï piɔ̈ɔ̈th guɔ lɔ yäŋ.

⁹ Ku ënɔɔnë, acie luɔi cï we tɔ dhiau piɔ̈ɔ̈th, en ë miɛt ɛn piɔ̈u, ë luɔi cä wek piɔ̈ɔ̈th dhiau aɣet puŋ bä wek wepiɔ̈ɔ̈th puk: ee këde Nhialic en acï we tɔ dhiau piɔ̈ɔ̈th, ke cïn kërɛɛc bäk yök ë këda yic.

¹⁰ Ku dhiënëpiɔ̈u bɔ̈ tëde Nhialic ee puŋdepiɔ̈u bɛ̈ɛ̈i, ke bï raan kony wëi, ku acïn raan bï rɔt gɔ̈k ë ye: ku dhiënëpiɔ̈u bɔ̈ në piny nɔm ee thuɔɔu bɛ̈ɛ̈i.

¹¹ Thɔ̈ɔ̈ŋkï këmanë guöp, dhiën cï we tɔ dhiau piɔ̈ɔ̈th në këde Nhialic, thɔ̈ɔ̈ŋkï lɛ̈th cï we tɔ lëth yiic dït dïït en, yeka, ku dït ë luɛl cä wek këdun lueel, yeka, ku diu cä wek piɔ̈ɔ̈th diu, yeka, ayï täŋ cä wek käŋ tak arëët, yeka, ayï tuöc cä wek piɔ̈ɔ̈th tuöc, yeka, ayï guur cä wek käŋ guöör! Në këriëëc ëbɛ̈n we cï röt nyuɔɔth nɔn cä wek gup a gɔk ë liu liɛɛu wek ë jamë yic.

¹² Yen na cä we cak gäär wään, acie biäk de raan cï këdäŋ wööc, en ë gäär ɛn en, ku cie biäk de raan cï wäc këdäŋ aya, ee luɔi bï diɛɛrduön dït tɔ tiëc tëde week ë Nhialic nɔm, diɛɛr aa wek diɛɛr ë wook.

¹³ Yen acï wo muk piɔ̈ɔ̈th. Ku ënɔn cï wo muk piɔ̈ɔ̈th, yen acï wo piɔ̈ɔ̈th miɛt aläl në miɛt ë Tito piɔ̈u, luɔi cï piɔ̈nde tɔ lɔ guïk piny ë week wedhie.

¹⁴ Ku na de kë cä lɛ̈k en ë lɛc lɛɛc ɛn rɔt ë week, ke yɛn kën yäär, ku acït man cï wo week lɛ̈k käŋ kedhie në yic, ayï lɛcdan ë wo röt lɛ̈c week ë Tito nɔm, acï aa yic aya.

¹⁵ Ku täŋ tɛk en week acï yenyin ŋuak, të tɛk en enɔm në piŋ cä wek käŋ piŋ wedhie, ku nyuuc cä wek e nyuööc në riɔ̈ɔ̈c kekë lɛ̈thëguöp.

¹⁶ Yɛn ë piɔ̈u miɛt, në baŋ dɛ yɛn piɔ̈u aŋäth cï dikëdik ë këdun në këriëëcic ëbɛ̈n.