2 Kor 6 - JAM DE NHIALIC 2011

¹ Ku nɔn ee wok luui në yen ëtök, en a lɛ̈ŋ wo week, ke we cïï dhuëëŋ de Nhialic piɔ̈u nöm ë ɣɔ̈ric.

² Nɔn cï en e lueel an, “Yɛn ë këdu piŋ ëkööl piɛth, Ku yïn cä luök ëkööl ë kunydewëi. Ëköölë kï, yen aye kööl piɛth, tiëŋkï, ëköölë kï, yen aye kööl ë kunydewëi!”

³ Acïn kë loiku kë bï raan diiu piɔ̈u, ke luɔi ee wok käŋ looi ke cï bï gɔ̈k.

⁴ Wo ye röt tɔ ye kɔc piɛth në këriëëc ëbɛ̈n, acït man ë kɔc ë ka ke Nhialic looi, në liɛɛr dïït ë wopiɔ̈ɔ̈th, në katuc dhal wook, në ka dak wook, në ka giŋ wook.

⁵ Në dui duiyë wook, në mäny mɛcë wook, në awuööu dït, në luɔi ril, në yïn ee wo yïn, në mɔ̈l ee wo mɔ̈l ë nïn ku cäm.

⁶ Në ɣɛɛrëpiɔ̈u, në ŋïnydekäŋ, në guömdekäŋ, në piathëpiɔ̈u, në Wëidït ɣer, në nhiëër cïnic ruëëny,

⁷ në jam de yic, në riɛl dïït ë Nhialic, në wëu ke tɔŋ wëu ke piathëpiɔ̈u ë ciin cuëc ku ciin cam.

⁸ Në lɛc, ku në ciën lɛc, në rin piɛth ku në rin rac, acït kɔc ee kɔc math, ku wok ee kɔc yith,

⁹ acït kɔc kuc, ku wo ŋic apiɛth, acït kɔc an, thoukï, ku tiëŋkï, wok pïïr, acït kɔc cï dui, ku wo kënë nɔ̈k,

¹⁰ acït kɔc ë dhiau, ku wo ye piɔ̈ɔ̈th miɛt ananda, acït kɔc kuanynyïïn, ku wo ye kɔc juëc tɔ kueth, acït kɔc cïn nïïm kaken, ku wo de nïïm käŋ kedhie.

¹¹ Wo cï wothook liëp week, wek Korinthoi, wo cï piɔ̈ɔ̈th lääu ë këdun.

¹² Acie wook ë giŋ week, ee weyäc, kek ë giŋ week.

¹³ Ku ënɔɔnë, në cuöt bä wek käŋ cool aya (yɛn cït kë jam wokë mïthkï), takï weyäc lääu.

Jäny në biäk de Läm de Yiëth

¹⁴ Duökï röt ee tɔ mac ëtök në kɔc reec gäm, ke we cï kït: piathëpiɔ̈u eeŋöde thïn kekë dhäŋ de löŋic? Ayï ɣɛɛrëpiɔ̈u bï mat adï kekë cuɔlëpiny?

¹⁵ Ku bï Kërtho e thok mat adï kekë Belial? Ayï raan gäm bï käŋ rɔm adï kekë raan reec gäm?

¹⁶ Ayï luaŋ ë Nhialic bï jam mat kekë yiëth adï? Ku week, wek aye luaŋ ë Nhialic pïïr, acït man cï Nhialic e lueel an, “Yɛn bï rëër ë keyiic, ku cath ë keyiic, ku yɛn bï aa Nhialicden, ku kek abï aa kɔckï.”

¹⁷ Go ë Bɛ̈nydït lueel an, “Yen bä wek bei në keyiic, abäk röt tɔ ye kɔc mɛɛn pei. Ku duökï kënhiany ee jak, ku we bä dɔm.

¹⁸ Ku yɛn bï aa Wuöördun, ku we bï aa wɛ̈ɛ̈tkï ku nyïïrkï, kë lueel Nhialic Awärjäŋ ka.”