2Tim 1 - JAM DE NHIALIC 2011

¹ Yɛn Paulo, tuny de Yecu Kërtho në këde piɔ̈n ë Nhialic, në këde pïïr cï kɔn lueel an, bï gäm kɔc, pïïr nu ë Kërtho Yecuyic.

² Awerek en gäär Timotheo, mɛnhdiën nhiaar: Ë dhuëëŋdepiɔ̈u ë ye tɔ̈u kekë yïn, ku mät, ku kokdepiɔ̈u, në ke bɔ̈ tëde Nhialic Wääda kekë Kërtho Yecu Bɛ̈nydïïtda.

Thieithieei ku Riëtëpiɔ̈u

³ Aya lueel an, Thieithieei Nhialic, Raan luɔɔi ɛn këde në ŋïny aa yɛn apiɔ̈u ŋic nɔn le en gɔk, acït man ë ye kuarkuɔ ye looi, luɔi aa yɛn a nɔm tak ë këdu ë lɔ̈ŋdïyic wɛ̈ɛ̈rwakɔ̈u ku aköl.

⁴ Ciët aa yɛn a nɔm cät ë pïïu ke yïnyin, yen aa ya yɛn yïn tak aläl, adï tiëŋ yïn, ke ya bï piɔ̈u miɛt abä piɔ̈u a yum.

⁵ Yɛn ee yanɔm cät ë gäm nu ë yïpiɔ̈u gäm cïnic ruëëny, gäm ë kɔn cath kekë kɔk Loyith, ku be cath kekë Yunike moor, ku aŋiɛc ëgɔk nɔn ciɛth en ke yïn aya.

⁶ En a täk ɛn yïnɔm, luɔi bï yïn miɔ̈c de Nhialic aa kooth abï dëp apiɛth cït man ë mac, miɔ̈c cath ke yïn në thäny cän yï thany ë yacin.

⁷ Nhialic akën wo gäm piɔ̈n ë riɔ̈ɔ̈c, ee piɔ̈n ë riɛldït, ku nhiëër, ku pɛlënɔm, en aa gëm wook.

⁸ Yen du yïn ee yäär në jam de Bɛ̈nydïïtda jam ee cäätɔɔ lueel, ku du yäär në këdï yɛn ee raandɛn cï mac: ye katuc guum wekë yɛn ëtök në biäk de wëlpiɛth në riɛldïït ë Nhialic.

⁹ Ee Nhialic en ë kony wo wëi, ago wo cɔɔl ë cɔ̈t ɣeric, acie këde luɔida, ee këde yenpiɔ̈u etök, ku në dhuëëŋ de yenpiɔ̈u, dhuëëŋ cï yiɛ̈n wook ë Kërtho Yecuyic ɣɔn thɛɛr ŋootë piny ke kënë cak,

¹⁰ ku acï tïc ënɔɔnë në tuöl cï Konydan Kërtho Yecu tuöl, raan cï riɛl ë thuɔɔu tɔ cïn naamde, ago pïïr bɛ̈ɛ̈i tëɣer ayï ciën dhiap bï käŋ dhiap, në guiëër ë wëlpiɛth.

¹¹ Ku në biäk de wëlpiɛth, yen aa dɔmë ya, kë bän aa raan ee ke guiir, ku ya tuc, ku ya raan ee Juöör wɛ̈ɛ̈t.

¹² En aa guööm ɛn ee kakë aya: ku acä keek guum, ke yɛn kën yäär, në biäk ŋiɛc yɛn raan cä gam, ku aŋiɛc ëgɔk nɔn duëër en këdäŋ ŋiëc tiit kë cä kuɛ̈i yen aɣet kööl bï bɛ̈n.

¹³ Ye täu de wël piɛth muk, wël cï piŋ tëde yɛn, abä keek aa muk në gäm ku nhiëër nu ë Kërtho Yecuyic.

¹⁴ Këpiɛth cï kuɛ̈i yïnë ye cök ë tiit yïn en në Wëidït ɣer, Wëi rëër ë woyiic.

¹⁵ Cöökë aŋic an, kɔc nu Athia acïk röt yal wei ë yalɔ̈ɔ̈m kedhie, kɔc deyiic yï Pugelo kekë Kermogene.

¹⁶ Ë Bɛ̈nydït ë ye piɔ̈u kok ke dhiën ë Onethiporo: aaye ya dap muk wëi, ku aa cie yäär në jonh ë mac ɛn,

¹⁷ ku ɣɔn nu yen ë Roma, acï cök ë kɔɔr en ɛn, abï a yök.

¹⁸ (Ë Bɛ̈nydït gam lɔ̈ŋdï në biäkde, ke bï kokdepiɔ̈u yök tëde Bɛ̈nydït ee köölë), ku kajuëc cï luöi ɛn ë Epetho, aŋic keek apiɛth.