1 Theth 3 - JAM DE NHIALIC 2011

¹ Na wën, aacï ciën luɔi bï wok e bɛ guum, ke luelku ë wopiɔ̈ɔ̈th an, apiɛth të bï wo nyääŋ Athenai wapäc,

² agoku Timotheo tooc, mɛnhkënëda, ku ye raan ee ka ke Nhialic looi, raan ee wok luui ëtök në wëlpiɛth ke Kërtho, acuk tooc luɔi bï en week tɔ kääc apiɛth, ku riit wepiɔ̈ɔ̈th ë gämduön cä wek gam,

³ ke cïn raan bï rɔt yal në biäk de katuc dhal wookë: luɔi ŋiɛc wek en wegup, nɔn ee yen biäk de kakë yen ë dɔmë wo.

⁴ Ayï ɣɔn tɔ̈u wok ë weyiic ayadäŋ, acuk kɔn lɛ̈k week nɔn bï wo kërɛɛc dhal wook guum, acït man cï en guɔ aa yic ënɔɔnë, aŋiɛckï week.

⁵ Yen aa tuɔɔc ɛn raan, wään cï en ciën luɔi bän e bɛ guum, ke ya bï gämdun ŋic, nɔn de kë cï jɔŋ ee kɔc them we yiɛ̈n them, ago luɔida aa ɣɔ̈ric.

⁶ Ku ënɔɔnë, të cï Timotheo lɔ bɛ̈n ë welɔ̈m bï tëde wook, ke bïï jam piɛth jam de gämdun ku nhiëërdun, ayï täŋ aa wek cool ë tak wook apiɛth ëcaŋɣɔn, ku nɔn kaar wek tïŋ bä wek wo tïŋ aläl, acït man kɔɔr wok tïŋ bï wo we tïŋ ayadäŋ.

⁷ Yen aa jɔ wook muk piɔ̈ɔ̈th në biäkdun, wek mïthëkɔckuɔ, në këtuc dhal wook ëbɛ̈n ku në dak ee wo dak ë käŋ, ee gämdun yen aa muk wopiɔ̈ɔ̈th:

⁸ wok pïïr ënɔɔnë, të kääc wek aril ë Bɛ̈nydïtic.

⁹ Ee lɛc ŋö duëër wok Nhialic bɛ lɛc nɔm në biäkdun, në miɛtëpiɔ̈u ëbɛ̈n miɛt ee wo piɔ̈ɔ̈th miɛt në biäkdun ë Nhialicda nɔm?

¹⁰ Wok ee cool ë lɔ̈ŋ aläl wɛ̈ɛ̈rwakɔ̈u ku aköl, ke we buk tïŋ nyïïn, agoku ka dak week ë gämdun looi abïk dikëdik.

¹¹ Ënɔɔnë, ee Nhialic guöp, yen aye Wääda, kekë Bɛ̈nydan Yecu Kërtho, ë ke nyuth wo kueerdan lɔ tëde week:

¹² ë Bɛ̈nydït ë we tɔ ŋuak wenyïïn abäk kuɛth në nhiëër nhiar wek röt, ku në nhiëër nhiaar wek kɔc kedhie, acït man nhiɛɛr wok week ayadäŋ,

¹³ luɔi bï en we tɔ kääc piɔ̈ɔ̈th aril, ke cïn gääk duëërë we gɔ̈k, në ɣɛɛrëpiɔ̈u ë Nhialic nɔm, Yen aye Wääda, ë kööl ë bɛ̈n bï Bɛ̈nydan Yecu Kërtho bɛ̈n kekë kɔckɛn ɣerpiɔ̈ɔ̈th kedhie.