1 Tham 4 - JAM DE NHIALIC 2011

Pɛ̈c de Athänduŋ de Mät

¹ Ku ëtɛ̈ɛ̈n, kɔc ke Yithriɛl aake cï tɔŋ yiɛ̈n kɔc ke Pilithiin. Go tɔŋ ë Yithriɛl lɔ nyuc wun cɔl Ebenedher, ku nyuc tɔŋ ë Pilithiin në Apek.

² Na wën ke kɔc ke Pilithiin ë ke mɛk kɔc ke Yithriɛl. Na wën cïk thɔ̈ɔ̈r ke ke tiam kɔc ke Yithriɛl ku näkkï aguum kaŋuan 4,000 ke kɔc ke Yithriɛl ë tɔŋ nɔm.

³ Na wën aacï kɔc ë dɔ̈ŋ në tɔŋic bɛ̈n, go röördït ke Yithriɛl lop an, “Eeŋö tɔ Bɛ̈nydït wo tiɛɛm ë kɔc ke Pilithiin ee köölë? Lok bïïku athänduŋ de män ë Bɛ̈nydït në Cilo, ke bï bɛ̈n lɔ tɔŋ ke wook abï wo lɔ kony në kɔc ke aterda.”

⁴ Agokï kɔc tuɔɔc Cilo lek athänduŋ de män ë Bɛ̈nydït de rɛm nu në kɛm ke cerubiim lɔ bɛ̈ɛ̈i. Ago wɛ̈ɛ̈t ke Eli yï Ɣopni kekë Pineɣath lɔ në athänduŋ de män ë Nhialic.

⁵ Na wën aa ɣëët athänduŋ de män e Bɛ̈nydït tënu tɔŋ de Yithriɛl, go kɔc ke Yithriɛl kiɛɛu ë tɔŋ moc në röldït abï piny lɔ nieeŋ nieeŋ.

⁶ Na wën aa piŋ kɔc ke Pilithiin awuɔɔu dïïtë, ke ke lop röt an, “Ee awuɔɔu dïït täu adï looi ë tɔŋ de Yithriɛl. Eeŋö yïdï?” Na wën aa lek piŋ nɔn yen Athänduŋ de Män ë Bɛ̈nydït yen cï bɛ̈ɛ̈i tɔŋ,

⁷ gokï riɔ̈c, ku luelkï an, “Amawoou në wook, wok cï riääk taitai! Yath acï bɛ̈n tɔŋ! Ee kë kën rɔt kɔn looi ë caŋɣɔn!

⁸ Amawoou në wook! Eeŋö bï wo jɔ luök në ee yiëth rilkë cin? Ee kek yiëth ɣɔn näk kɔc ke Rip në jɔ̈ɔ̈ric!

⁹ Ka wek kɔc ke Pilithiin riɛɛtkï röt piny! Ku takï röt ee röör, na cie yen ke wek bï aa lïïm ke kɔc ke Ɣeberuu ee köölë, cït man wään kɔn kek aa lïïmkuɔ. Ka week takï röt ee röör ë gɔk!”

¹⁰ Ago kɔc ke Pilithiin piɔ̈t arëët, agokï kɔc ke Yithriɛl tiaam, abï ŋɛk aa kat në kueerde ke lɔ baai. Ku thuɔɔu ëbɛ̈n dït arëët: aguum kathiërdiäk 30,000 de kɔc ke Yithriɛl acï ke bɛ̈n nɔ̈k.

¹¹ Ku pec Athänduŋ de Män ë Nhialic, ku näk wɛ̈ɛ̈t ke Eli kaarou yï Ɣopni kekë Pineɣath.

Thon de Eli

¹² Ku në ee kööl manë, raan dhiën ë Benjamin ëbɛ̈n kat tɔŋ ke lɔ Cilo, ku aacï lupɔɔke rɛtiic në dhiëëu ku yïk yenɔm abuui.

¹³ Na wën aa bïï ke yök Eli arɛ̈ɛ̈r në thööcde nɔm në kueer këc ke woi kueeric, në luɔi ë diir en në biäk de Athänduŋ de Män ë Nhialic. Na wën cï raan bɛ̈n wut ku guïïr kɔc kë cï rɔt looi, ke wut ëbɛ̈n ë päl kiɛɛu.

¹⁴ Na wën aa piŋ Eli kiɛɛu, ke lop an, “Ee kiɛɛu eeŋö ee kënë?” Go raan guɔ lɔ të nu Eli le guiëër kë cï rɔt looi.

¹⁵ Ku Eli aaye run thiërdhoŋuan ku bɛ̈t ku acie bɛ daai.

¹⁶ Go raan lɛ̈k en an, “Yɛn aa kɔt tɔŋ ee köölë guöp, ka yɛn aa bɔ̈ ënɔɔnthiinë.” Go Eli ye luɔp an, “Ka eeŋö cï rɔt looi mɛnhdï?”

¹⁷ Go lueel an. “Pilithiin ë Yithriɛl cop, ku acïk kɔc juëc ke Yithriɛl nɔ̈k. Ka wɛ̈ɛ̈tku kaarou yï Ɣopni kekë Pineɣath acïk thou, ku acïk Athänduŋ de Män ë Nhialic peec!”

¹⁸ Na wën lueelë raan Athänduŋ de Män ë Nhialic rin, ke Eli ë cuɛt rɔt ciëën në thönyde nɔm në kal ë wut thok, ago yeth dhuɔɔŋ ku thou, në luɔi ë cï en dhiɔp ku aa dït kɔ̈u.

Thon de Tiiŋ Abaar de Pineɣath

¹⁹ Ku tiiŋ ë Pineɣath wënde aa liac, ku aacï thiɔ̈k ke dhiëth. Na wën aa piŋ thoŋ ë monyde ku thon ë wurɔ̈ɔ̈rde ku piŋ pec cïï Athänduŋ de Män ë Nhialic peec, ke kɛ̈cë ku aacï rɔ̈p aläl ku jɔ bɛ̈n dhiëth.

²⁰ Na wën aa kɔɔr thuɔɔu ke lëk ë amadhiëth en an, “Rit rɔt yïn ë mɛwä dhiëëth.” Go ciën këde yic thïn kekë kë lueel ku cïï puk nɔm.

²¹ Ago meth cäk an Yikabod, lueel an, “Dhuëëŋ de Nhialic ë jäl Yithriɛl.” Në luɔi cïï Athänduŋ de Män de Bɛ̈nydït peec, ku thou wurɔ̈ɔ̈rde kek monyde.

²² Aa lueel an, “Dhuëëŋ de Nhialic ë jäl ë Yithriɛl në luɔi cïï Athänduŋ de Män de Bɛ̈nydït peec.”