1 Tham 26 - JAM DE NHIALIC 2011

Debid Abe Thaulo Luök Wëi

¹ Na wën go kɔc ke Dhip bɛ̈n tëde Thaulo në Gibia, ku lëkkï yen an Debid acï rɔt thiaan në kuur de Ɣakila të lɔ aköl amiäk në Jecimon.

² Go Thaulo rɔt gɔp kekë aguum kadiäk ke rem de tɔŋ, rem cï ŋiëc wɛ̈ɛ̈t në tɔŋ, lekkï ë jɔ̈ɔ̈r de Dhipa yic, ke ke kɔɔr Debid,

³ na wën aa cïk ɣet, ke ke jɔ piɔ̈ɔ̈t në kueer lɔ kuur de Ɣakila, të lɔ aköl amiäk në Jecimon. Ku Debid aa ŋoot ke tɔ̈u në jɔ̈ɔ̈ric, na wën aa lee piŋ nɔn cï Thaulo bɛ̈n ke kɔɔr en,

⁴ go nëëmke tuɔɔc, go nëëmke lɔ yök nɔn tɔ̈u ë Thaulo ëtɛ̈ɛ̈n.

⁵ Go rɔt jɔt ku lee, go lɔ yök ë yic, ago të ye Thaulo kekë Abener wën de Ner bɛ̈ny ë rem de tɔŋ de Thaulo niin thïn kɔɔr. Thaulo aa ye tɔ̈c në atookic thïn ku tɔ̈c remdɛn ë tɔŋ ke ke cï melik Thaulo gɛɛu cil.

⁶ Na wën ke Debid ë thiëc Aɣimelek raan de Ɣit, ku Abicai mänhë Jowap, (manden acɔl Dheruia), an, “Eeŋa në weyiic waarou raan bï lɔ ke yɛn wun ë Thaulo?” Go Abicai bɛ̈ɛ̈r, an, “Yɛn bï lɔ.”

⁷ Në ee wɛ̈ɛ̈rë yic, Debid kekë Abicai acïk bɛ̈n lɔ në atookic të wën tɔ̈u ë Thaulo thïn, ke cïï gɛɛu cil, ku yökkï tɔŋde ke cï guöt thok piny në yelɔ̈ɔ̈m ke thiääk ke yenɔm. Ku Abener kekë remdɛn ë tɔŋ aninkï në yelɔ̈ɔ̈m.

⁸ Go Abicai lɛ̈k Debid an, “Nhialic acï kɔc ke aterdu tääu në yïcin ee köölë, ka ënɔɔnë tɔ thäär piny në tɔŋ tök, ku acä duëër thɔ̈ɔ̈r raanrou!”

⁹ Go Debid lueel an, “Du bï luöi kërac! Bɛ̈nydït abï raan lui kërac melikdɛn cï lɔc luöi këtuc.”

¹⁰ Go Debid ŋoot ke jam an, “Në rin ke Bɛ̈nydït pïïr, aŋiɛc nɔn bïï Bɛ̈nydït guöp Thaulo nɔ̈k, nɔn bïï thou miäk të cïï köölde bɛ̈n, ku nɔn bï guɔ nɔ̈k në tɔŋic.

¹¹ Ku Bɛ̈nydït acï jaai luɔi bän raan cï Bɛ̈nydït lɔc ke ye melik luöi kërac! Nömku tɔŋdɛn cï ciɛk piny në yenɔm, ku aguundɛn ë pïïu, ku jëlku.”

¹² Go Debid tɔŋ nööm, ku aguun ë pïïu tɔ̈u në biäk cuëc në Thaulo nɔm, ku jɔkï jäl kekë Abicai. Acïn raan cï ye tïŋ ku cïn raan ŋic kë cï rɔt looi, ku keek kedhie acïn raan cï pääc, në biäk cïï Bɛ̈nydït ke tuöc nïn thiek kedhie.

¹³ Na wën ke Debid ë teem wak lee lɔŋ däŋë në kuur nɔm, të mec ë määth,

¹⁴ ku cɔɔl rem de tɔŋ ë Thaulo kekë Abener në röldït an, “Abener duɛ̈ɛ̈rë kë luɛɛl piŋ?” Go Abener lop, an, “Eeŋa ee kë cöt në röldït ke päc melik?”

¹⁵ Go Debid bɛ̈ɛ̈r, an, “Abener cie yïn ee raan dïït ril de tɔŋ ë Yithriɛl? Ka eeŋö cï yïn bɛ̈nydu, melik ee gël? Ënɔɔnë raan aacï lɔ në atookic ke lɔ bɛ̈nydu nɔ̈k.

¹⁶ Abener, yïn cï löny në luɔidu yic! Yɛn cï kuëëŋ në Bɛ̈nydït pïïr an week wedhie wek rɔ̈ŋ në thuɔɔu, në biäk kɛ̈n wek bɛ̈nydun tiit, raan cïï Bɛ̈nydït tɔ ye melik. Tiëŋkï, tɔ̈u tɔŋ de melik ënou? Ku tɔ̈u aguun ë pïïu wään tɔ̈u ë yenɔm ë nou?”

¹⁷ Ëtɛ̈ɛ̈n go Thaulo Debid guɔ ŋic röl ku lop, an, “Ee yïn Debid wëndï?” Go Debid bɛ̈ɛ̈r an, “Ɣɛɛ, bɛ̈nydï.”

¹⁸ Ku lëk en an, “Eeŋö bɛ̈nydï, kë ŋoot yïn ke yï kɔɔr ɛn? Eeŋö cä luöi yïn, ee awäny ŋö cä looi?

¹⁹ Ënɔɔnë, tɔ bɛ̈nydï melik, piŋ këdiën luɛɛl. Na ee Bɛ̈nydït yen cï yïn puɔ̈k nɔm ɛn, miɔ̈c cï gäm en abï yen tɔ waar E nɔm, ku na ee kɔc kek ë looi yen, ke aciɛɛn de Bɛ̈nydït abï lööny në kegup, në biäk cïï kek ɛn cuɔp wei piny de Bɛ̈nydït ku leerkï yɛn piny duɛ̈ɛ̈r ɛn yiëth lei lɔ lam.

²⁰ Du yɛn tɔ näk piny lei, të mec ke Bɛ̈nydït. Eeŋö duëër ë melik de Yithriɛl bɛ̈n bïï ya bɛ̈n nɔ̈k? Eeŋö duëër en yɛn jɔ yɔ̈ɔ̈p cï dit ë kur nïïm?”

²¹ Go Thaulo bɛ̈ɛ̈r, an, “Yɛn cï awäc looi, bäär ciëën, Debid mɛnhdï! Yïn cä bï bɛ luöi kërac, në biäk cïï yïn wëikï bɛ luök ee wɛ̈ɛ̈rë yic. Yɛn cï ya dhɔ̈n! Yɛn cï kërac arëët looi!”

²² Go Debid bɛ̈ɛ̈r an, “Ŋö nöm tɔŋdu kï bɛ̈nydï. Tɔ raan töŋ de remduön ë tɔŋ bɔ̈, bï bɛ̈n nööm.

²³ Ku Bɛ̈nydït ee raan piathëpiɔ̈u ëbɛ̈n ku raan adöt ëbɛ̈n gäm athiɛɛi. Köölë acï yï tääu në yacin, ku yïn kɛ̈n luöi kërac, yïn raan cï Bɛ̈nydït tɔ ye melik.

²⁴ Cït man cän yï luök wëi ee köölë, Bɛ̈nydït abï yɛn luöi kë cït ee kënë ku gëm a nɔm lääu në këriëëc nuan ɛn ëbɛ̈n!”

²⁵ Go Thaulo lɛ̈k Debid an, “Nhialic abï yï thieei, wëndï! Yïn bï tiam në këriëëcduön ye looi yic ëbɛ̈n!” Go Debid lɔ në kueerde yic, ku puk Thaulo yenɔm baaide.