1 Tham 25 - JAM DE NHIALIC 2011

Thon ë Thamwɛl

¹ Na ɣɔn thouwë Thamwɛl, go kɔc ke Yithriɛl keyiic määt kedhie ku dhiëëukï. Agokï jɔ tɔ̈ɔ̈u wunde në Rama. Go Debid jäl ëtɛ̈ɛ̈n ke lɔ në jɔ̈ɔ̈r de Mawonic.

Debid kekë Abigail

^2-3 Ku aa de raan ë nu në Mawon, raan de nɔm käŋ në Karmel ku ye raan kueth aläl. Ade nɔm agum de bou ku aguum kadiäk ke amɛ̈l, ku aake ye tiit në Karmel. Raanë acɔl Nabal ku tiiŋde acɔl Abigail, Abigail ee tiiŋ pelnɔm ku lɛ̈k aläl, ku monyde aaye raan ee piɔ̈u dap diu ku ye raan piɔlpiɔ̈u aläl. Kööl tök Nabal aa tem nhïm ke thökke në Karmel,

⁴ ku acïï Debid piŋ të wään nu en ë jɔ̈ɔ̈ric, nɔn tem ë Nabal nhïm ke thökke,

⁵ go dhuök kathiëër tooc ku lëk keek, bïk lɔ Karmel tëde Nabal ku takkï thiëcdï lɔ tënu yen.

⁶ Gokï yɔ̈ɔ̈k bïk lɛ̈k Nabal an, “Yïn bï pïïr anandu, ku yïn bï guöp aa pial, wekë paandu, ku kakuön cath ë yïn abïk gup pial kedhie.

⁷ Aya piŋ ënɔɔnë an köölë ee kööl temë nhïm ke thökku. Wään nu ë kɔckuön ee tïït në wook akënku keek yɔŋ, ku aköölnyïïn kedhie aake rɛ̈ɛ̈r në Karmel, ku acïn këdɛn cï määr.

⁸ Thiëc lïïmku ku abïk lɛ̈k yïn. Ka ënɔɔnë jɔ piɔ̈u kok wekë dhuökiën thiikë, cït man cï wok bɛ̈n tëde yïn ë kööl de dhuëëŋ ënɔɔnë yïn liɛm miɔc lïïmku kekë wëndu Debid ë këduön duëërë gäm keek!”

⁹ Të wën ɣëët e kɔc ke Debid, acïk Nabal gäm thön de Debid, ku jɔkï tiit.

¹⁰ Go Nabal jam puɔ̈k nɔm lïïm ke Debid, an, “Eeŋa yen Debid? Eeŋa yen wën ë Jethe? Aköölkë, lïïm acïk röt yök luɔi bï kek aa kat në bänyken cök!

¹¹ Eeŋö duɛ̈ɛ̈r ɛn këcamdï kekë pïïukï ku rïïŋdiën cä guiëër kɔckiën bï nhïm ke thökkï bɛ̈n tem, gäm kɔc bɔ̈ të cïn raan ŋic yen?”

¹² Go kɔc ke Debid röt puk ku lek ciëën. Ku na wën cïk ɣet wut ke ke lëk Debid jam ëbɛ̈n.

¹³ Ago Debid kɔcke yɔ̈ɔ̈k an, “Nämkï tɔɔŋkun, agokï tɔɔŋken nööm, ku tɛ̈ɛ̈u Debid tɔŋde aya, kë cït bot kaŋuan ke kɔc acïk bɛ̈n lɔ në Debid, ku dɔ̈ŋ bot kaarou ke kɔc në käŋ lɔ̈m.

¹⁴ Go lïm tök Abigail tiiŋ de Nabal yɔ̈ɔ̈k, an, “Debid aacï kɔc tuöc bɛ̈nyda ke nu ë jɔ̈ɔ̈ric, bïk thiëcde yiɛ̈n en, go keek läät.

¹⁵ Ku kɔckë aake piɛth në wook. Akënkï wook luööi arac, ku akööliic kedhie wok ee lɔ në duum thiääk në keek, ku acïn këdan cï bɛ̈n määr.

¹⁶ Wakɔ̈u kekë aköl ayek wook tiit, aköölnyïïn kedhie, wok ee thökkuɔ tiit në duum thiääk në keek lɔ̈m.

¹⁷ Yen tëde ka ënɔɔnë takkic apiɛth ku tïŋ kë bä looi, në biäk cïï riääk thiök kekë bɛ̈nyda, ku paande ëbɛ̈n. Ee raan rac aläl ku acïn raan duëër en jam de piŋ!”

¹⁸ Ago Abigail rɔt dap jɔt, ku looi kuïn dït agök, ku töny ke mäu kaarou, ku amɛ̈l cï nyop kadhïc, ku apeet kaarou de rɛɛp cï guöör, ku kuïïn de anyuɔl, ku mɔ̈n de enap cï dhiim, ku tɛ̈ɛ̈u keek ë mul kɔ̈ɔ̈th.

¹⁹ Ku jɔ lïïmke yɔ̈ɔ̈k, an, “Lak tueŋ në yanɔm, ku wek bä kuany cök.” Ku aa kën lɛ̈k Nabal monyde.

²⁰ Na wën aa jɔ ɣëët aguk de kuur ke cath ë mulde kɔ̈u, ke jɔ guɔ rɔ̈m kekë Debid ke kɔcke ke ke bɔ̈ tënu yen.

²¹ Aa cïï Debid lueel, an, “Luɔidiën wään yan kake ee raanë tiit në jɔ̈ɔ̈ric, arëk abïï ciën këtöŋ mär! Acï ya baŋ. Acï këpiɛthdiën cä looi puk nɔm në kërac.

²² Të le yen dɛ raan töŋ dɔ̈ŋ në mïth röör ke dhiënde yiic, ke Nhialic abï ya thiëëc, abä keek nɔ̈k miäk adurduur akën akɔ̈l thok bɛ̈n!”

²³ Na wën aa tïŋ Abigail Debid, ke dap bɛ̈n piny ë mulde kɔ̈u, ku gut yenɔm piny në Debid nɔm,

²⁴ ku wïïk në yecök, ku lueel an, “Bɛ̈nydï tɔ awäc lööny në yakɔ̈u yatök, yïn liɛm në luöi bïï yïn lïmdu tɔ jam kekë yïn, piŋ kë bï lïmdu lueel.

²⁵ Bɛ̈nydï du yïpiɔ̈u wël raan ee karɛc looi cɔl Nabal. Yen acït guöp rinke ëdhöc. Rinke ee rin ke dhɔ̈n. Ku dhɔ̈ɔ̈n ee cath kekë yen. Ku në biäkdï yɛn lïmdu, yɛn kën kɔc ë tooc bɛ̈nydï tïŋ.

²⁶ Ku ënɔɔnë cït man cïï Bɛ̈nydït yïn tiit, ke yïn kën raan nɔ̈k, ku kɛ̈në rɔt guöör në ciindu, yɛn kuëëŋ në rin ke Bɛ̈nydït, ke ya rɛ̈ɛ̈r në yïnɔm eenë. Kɔc ke aterdu, ku kɔc kɔɔr bïk yïn luöi kërac, abïk ciët Nabal.

²⁷ Ku miɔ̈c cï lïmdu yiɛ̈n bɛ̈nydï, ë gëmë kɔc ee yïn kuany cök.

²⁸ Yïn liɛm bä lïmdu päl awäc, ku Bɛ̈nydït abï thöny ë bɛ̈nydï tɔ kääc aril, në luɔi thɛ̈ɛ̈r en tɔŋ de Bɛ̈nydït, ku acïn kërɛɛc bïï yök në luɔɔidu yic në akööl pïïr yïn.

²⁹ Cakaa de raan kɔɔr bïï yïn nɔ̈k, ke wëi ke Bɛ̈nydï abïk yïn tiit në kɔc pïïr ë tök, në riɛl de Bɛ̈nydït Nhialicdu. Ku wëi ke kɔc ke aterdu abï keek riëër wei cït man ë dön nu ë thieec thok.

³⁰ Ku të cï Bɛ̈nydït këriëëc piɛth ëbɛ̈n luöi bɛ̈nydï, ku tɔ ee melik de Yithriɛl cït man wään cïï yen e thɔ̈n en.

³¹ Bɛ̈nydï acïï piɔ̈u bï dɛk nääk de kɔc baaŋ, ku acïï rɔt bï guöör. Ku të le Bɛ̈nydït bɛ̈nydï tɔ tiëm, tak yïnɔm në lïmdu.”

³² Ago Debid lɛ̈k Abigail an, “Yɛn lec Bɛ̈nydït, Nhialic de Yithriɛl, Raan ë toc yïn ee köölë, bä bɛ̈n yök wokë yɛn!

³³ Athiɛɛi abï tɔ̈u kekë yïn në biäk pel yïn nɔm, në luɔi cï yïn a pɛ̈n nääk de kɔc ee köölë, ku bä rɔt guöör yatök, në ciindï.

³⁴ Bɛ̈nydït ë ya muk aguɔ week cïï lui kërac. Ku yɛn aacï kuëëŋ në Nhialic pïïr de Yithriɛl, na ë yï kën dap bɛ̈n yök wekë yɛn, aduëër ciën mony töŋ në mïth ke Nabal yiic, duëër döŋ ke pïïr, të bï piny ke ruu ë lë thɛɛr!”

³⁵ Na wën ke Debid ë gäm ku nööm këdɛn cï yiɛ̈n en. Ku jɔ lueel an, “Lɔɔr wekë athiɛɛi yɛn cï jamdu piŋ ëbɛ̈n, ku këduön cï thiëëc abä gäm yïn.”

³⁶ Na wën le Abigail tëde Nabal, go yök ke loi gökdïït de dhuëëŋ cït man ë kë de melik, aacï wiɛɛt aläl, go ciën kë lëk en agut të le piny ruu.

³⁷ Na ɣɔn amiäk cï mɔ̈u jäl ë Nabal nɔm ke jɔ ë tiiŋde lɛ̈k ee kakë kedhie, go piɔ̈u löny, ku le lik cït man ë kuur.

³⁸ Na ɣɔn cïï nïn kathiëër wan, ke Bɛ̈nydït ë yup Nabal go thou.

³⁹ Na wën, aa piŋ ë Debid nɔn cï Nabal thou, go lueel an, “Athiɛɛi abï tɔ̈u kekë Bɛ̈nydït, në luɔi cï yen göönydï lueel wokë Nabal, raan wään yɔŋ ɛn. Acï lïmde tiit ke cïï kërac bï looi, ku tɔ karɛc ye Nabal ke looi lööny në yenɔm yetök.” Na wën ke Debid ë tɔ thok lɔ tëde Abigail, luɔi kɔɔr en en bïï ya tiiŋde.

⁴⁰ Go lïïmke lɔ Karmel, ku lëkkï Abigail an, “Wok cï Debid tuöc yïn, an, buk yïn jɔt bä ya tiiŋde.”

⁴¹ Go yenɔm guöt piny në kenïïm, ku lueel an, “Kakë ayek duet lïïm, abïk week lɔ waak cök, ku abïk week luöi këriëëc ëbɛ̈n.”

⁴² Ago Abigail rɔt gɔp kɛɛc ë muul kɔ̈u kekë duet lïïmke kadhïc, ku lee kueer kekë kɔc ke Debid, go jɔ ya tiiŋ de Debid.

⁴³ Debid aacï Aɣinowam nyan de Jedhreel thiaak, agokï jɔ aa diäärke kaarou.

⁴⁴ Ku Thaulo aacï nyande Mical tiiŋ de Debid gäm Palti wën de Laic, raan wun ë Galim.