1 Tham 23 - JAM DE NHIALIC 2011

Debid aluäk kɔc wun ë Keila

¹ Na wën aacï Debid ye piŋ nɔn ye Pilithiin wun cɔl Keila mak, ku yek rɛɛpkɛn ë piac luɔk kual.

² Go Bɛ̈nydït luɔp an, “Bä Pilithiin lɔ mak?” Go Bɛ̈nydït bɛ̈ɛ̈r, an, “Ɣɛɛ, lɔ makë Pilithiin ku luäk kɔc wun ë Keila.”

³ Ago kɔc ke Debid yen yɔ̈ɔ̈k an, “Ënɔnthiin rëër wok ë Juda wok riɔ̈c, ku na lok lɔ Keila ku mɛkku Pilithiin cuku bï jɔ riɔ̈ɔ̈c aläl?”

⁴ Ago Debid Bɛ̈nydït bɛ lɔ luɔp, go Bɛ̈nydït lɛ̈k en an, “Lɔɔr Keila ku yïn bä tɔ tiam Pilithiin ee köölë.”

⁵ Ago Debid lɔ Keila kekë kɔckɛn ke tɔŋ, ku mɛkï Pilithiin, gokï kɔc juëc nɔ̈k ë keyiic ku peckï ɣɔ̈kken. Ago Debid kɔc ke Keila jɔ luök.

⁶ Ku Abiathar wën de Aɣimelek aacï lupɔ de ajïpɔ bɛ̈ɛ̈i kekë yen, ɣɔn kɔt en ke lɔ tënu Debid në Keila.

⁷ Ku Thaulo aacï lɛ̈k nɔn cïï Debid lɔ Keila, go lueel an, “Acï Nhialic jɔ tääu në yacin, Debid acï rɔt math, luɔi bï yen lɔ wun cï gël në kur, ku de thok athïïn dït.”

⁸ Ago Thaulo kɔckɛn ë tɔŋ cɔɔl ku tɔ keek lɔ tɔŋ, bïk Debid kekë kɔcke lɔ tuɔɔk wutic në Keila.

⁹ Na wën aa lɔ Debid ye piŋ nɔn kɔɔr ë Thaulo bï yen mak, go Abiathar bɛ̈ny de kake Nhialic yɔ̈ɔ̈k, an, “Bɛ̈ɛ̈iyë lupɔ de ajïpɔ eenë.”

¹⁰ Na wën ke Debid ë läŋ, an, “Bɛ̈nydït Nhialic de Yithriɛl. Acä piŋ nɔn guiir ë Thaulo rɔt ke bï Keila bɛ̈n riɔ̈ɔ̈k në biäkdï, yɛn lïmdu.

¹¹ Bï kɔc ke Keila yɛn gäm Thaulo? Bï Thaulo bɛ̈n ë yic cït man cän e piŋ? Bɛ̈nydït Nhialic de Yithriɛl Yïn liɛm bä këdï bɛ̈ɛ̈r!” Go Bɛ̈nydït këde Debid bɛ̈ɛ̈r an, “Thaulo abï bɛ̈n.”

¹² Go Debid bɛ lueel an, “Bï kɔc ke Keila ya gäm Thaulo wokë kɔckï ëtök?” Ago Bɛ̈nydït bɛ̈ɛ̈r an, “Abïk week gam.”

¹³ Ago Debid kekë bot kadhetem de kɔcke kedhie, Keila nyääŋ piny raan tök, ku jɔkï ruu ke ke cath. Na wën aa lɔ Thaulo ye piŋ nɔn cï Debid rɔt kual, go mɔ̈l në luöi bï yen wut bɛ mak.

Debid anu Piny ë Kuur

¹⁴ Go Debid jɔ tɔ̈u ke thiaan piny ë kuur thiääk ke jɔ̈ɔ̈r de Dhip. Aaye Thaulo them aköölnyïïn luɔi bï yen Debid yök, ku Nhialic akën Debid bɛ̈n tääu në yecin.

¹⁵ Na wën ke piŋ ë Debid nɔn kɔɔr ë Thaulo luɔi bï yen en nɔ̈k. Ku Debid aa tɔ̈u në Ɣorec, të thiääk ke jɔ̈ɔ̈r de Dhip.

¹⁶ Go wën de Thaulo Jɔnathan lɔ tënu Debid në Ɣorec, ku riit piɔ̈u në luɔi bï yen riɛl aa yök tëde Nhialic,

¹⁷ ago Jɔnathan lueel, an, “Du riɔ̈c, wäär Thaulo acïï yïn bï nɔ̈k. Yïn bï ya melik de Yithriɛl ku yɛn bï lɔ në yïcök, ayï wäär Thaulo aŋic ee kënë.”

¹⁸ Agokï mät looi në Bɛ̈nydït nɔm kaarou. Na wën ke Jɔnathan ë lɔ baai, ku döŋ Debid Ɣorec.

¹⁹ Na wën ke kɔc ke Dhip ë ke lɔ tënu Thaulo në Gibia, ku lëkkï yen, an, “Debid kï cï thiaan në piny de Ɣorec, në kuur de Ɣakila nɔm, të lɔ wöuwic në jɔ̈ɔ̈r de Judaya yic në Jecimon.

²⁰ Ka ënɔɔnë yïn melik, bäär wunda në köölduön kɔɔr bï yïn bɛ̈n, ku yen abuk bɛ̈n gäm yïn të le yïn bɛ̈n.”

²¹ Go Thaulo bɛ̈ɛ̈r, an, “Bɛ̈nydït abï week thieei në luɔi nhiaar wek ɛn!

²² Lakkï ku bɛkï röt guiir. Tiëŋkï të ye Debid lɔ thïn aköölnyïïn, ku eeŋa ë tïŋ en ëtɛ̈ɛ̈n. Acïk lëk ɛn nɔn pel en aläl.

²³ Tiëŋkï tëdɛn yen dap thiaan thïn, ku bäkkï ciëën në jam yic, ku ëtɛ̈ɛ̈n yɛn bï lɔ wokë week, na nu wutic, abä kɔɔr në aguum ke Juda yiic ëbɛ̈n.”

²⁴ Na wën, ke ke lɔ biic lek Dhip në Thaulo nɔm tueŋ, ku Debid aa rɛ̈ɛ̈r kekë kɔcke në jɔ̈ɔ̈r de Mawon yic, në wak de Araba, të lɔ wöuwic në jɔ̈ɔ̈r de Judaya yic në Jecimon.

²⁵ Go Thaulo kekë kɔcke kɔ̈ɔ̈r gɔl, na wën cïï ë Debid yɔ̈ɔ̈k në biäkde, go lɔ piny ë kuriic ku le rëër në jɔ̈ɔ̈r de Mawonic. Na wën aa piŋ Thaulo ee kënë, go lɔ në jɔ̈ɔ̈r de Mawonic ke cop Debid.

²⁶ Thaulo aa nu në baŋ töŋ de kuur, ku Debid kekë kɔcke anukï në baŋ däŋë, abankï kecök ke ke kɔt në Thaulo. Ku të wën cï Thaulo kekë kɔcke jɔ thiɔ̈k në Debid, ku an jɔkï keek dɔm kekë kɔcke.

²⁷ Ke tuc go bɛ̈n tëde Thaulo ku lueel, an, “Dap bɛ̈n! Pilithiin arumkï baai!”

²⁸ Go Thaulo cum cop en Debid puɔ̈l, ku puk rɔt lee thɔ̈ɔ̈r kekë Pilithiin. Yeka ye kek ëtɛ̈n cɔɔl an Kuur de Kuël ë rɔt.

²⁹ Go Debid jäl ku le thiaan wun cɔl Engedi.