1 Tham 21 - JAM DE NHIALIC 2011

Debid Akɔt në Thaulo

¹ Na wën, ke Debid ë lɔ tëde Aɣimelek raan de kake Nhialic nu ë Nop. Go Aɣimelek bɛ̈n bei ke lɛthë wën rɔ̈m kek kekë yen, ago luɔp an, “Eeŋö bïï yïn eenë yïtök?”

² Ago Debid bɛ̈ɛ̈r an, “Ee melik yen ë tooc ɛn lueel an, ‘Du tɔ ŋic ë raan yen kë loi, ayï këduön kɔɔr! Ku në biäk de kɔc ee cath në yɛn acä keek yɔ̈ɔ̈k luɔi bï wok lɔ yök tëdan cuk mac.

³ Ka ënɔɔnë eeŋö nu tëde yïn? Gämë yɛn kuïïn cï pam kadhïc, ku na de däŋ ye cam ke gämë yɛn aya.”

⁴ Go Aɣimelek lɛ̈k Debid an, “Acïn kuïndiën cï pam nu baaŋ, ee kuïïn ɣeriic ke Bɛ̈nydït kek nu, na kën kɔckuön cath në yïn tɔ̈c në diäär aduëërkï cam.”

⁵ Ago Debid këde Aɣimelek bɛ̈ɛ̈r, an, “Ee yic wok cï röt tiit në diäär, cït man yan e looi aköölnyïïn tëde yen të lan thïn. Wok ee ka cath në wook tɔ ɣeriic ëbɛ̈n, ayï të le wok tëdäŋ pei, ku ee köölë wok cï röt tiit aläl!”

⁶ Go bɛ̈ny de kake Nhialic Debid gäm kuïn cï pam ɣeric ë cï gäm Nhialic, në luɔi yen kuïn töŋ ë tɔ̈u, kekë yen, kuïn ë cï bɛ̈ɛ̈i bei tëde ka cï thiɛɛi yiic, ku yïk nyinde yic däŋ ë piacë thaal.

⁷ (Ku bɛ̈ny de kɔc ee ɣɔ̈k ke Thaulo tiit aa nu ëtɛ̈ɛ̈n ee köölë, acɔl Doweg ee raan wun Edom, aa bɔ̈ bï jam de Bɛ̈nydït bɛ̈n piŋ.)

⁸ Acïï Debid lëk Aɣimelek, an, “De yïnɔm tɔŋ ku nɔn yen abätäu bä gäm ɛn? Tuöc de melik, acï ya tɔ jäl ke ya cïï tɔɔŋ be määt yiic ayï abätäu.”

⁹ Go Aɣimelek bɛ̈ɛ̈r an, “Yɛn de nɔm abätäu de Goliath raan wään bä nɔ̈k, ë Wak de Ela yic, anu në lupɔ kɔ̈u, ke cï dɛɛr ë lupɔ de ajïpɔ yic. Na kɔɔr en ke nöm ee yen aye tɔŋ töŋ nu eenë.” Go Debid bɛ̈ɛ̈r, an, “Gämë yɛn, acïn të bï tɔŋ piɛth yök thïn!”

¹⁰ Ago Debid jäl, të wën kɔt en në Thaulo, ku lee tëde Acic Melik de Gath.

¹¹ Go bäny tɔ̈u ë melik Acic cök e yɔ̈ɔ̈k, an, “Cie Debid ee kënë melik de paandan? Kënë ee raan wään piɔɔny ë diäär të cöŋ kek, an “Thaulo acï agum nɔ̈k, ku Debid acï aguum kathiëër nɔ̈k.”

¹² Jamden acï Debid gäm diɛɛrdït, ago bɛ̈n riɔ̈ɔ̈c aläl në melik Acic.

¹³ Ku të ye kek rɛ̈ɛ̈rë, Debid ee rɔt të ye raan cï miɔ̈l, ku ye luui cï raan amiɔ̈l të kɔɔr kek bïk yen dɔm, ee päny de wundït lɔ giɛt kɔ̈u, ku ye thok jol në lääk, abï yual aa jool ke lääk.

¹⁴ Go Acic lɛ̈k bänyke yen cök, an, “Tiëŋkï monytui ë miɔ̈l eeŋö yiɛ̈n wek e yɛn?

¹⁵ Cä nɔm de amiɔ̈ɔ̈l juëc eenë? Eeŋö bɛ wek amiɔ̈l däŋ bɛ̈ɛ̈i paandï, bï kake dhɔ̈ɔ̈n bɛ̈n looi ɣöndï eenë?”