1 Tham 12 - JAM DE NHIALIC 2011

Thamwɛl Ajiëëm Kɔc

¹ Na wën ke Thamwɛl ë yɔ̈ɔ̈k kɔc ke Yithriɛl an, “Yɛn cï kë cäk thiëc a luöi week. Wek cä gäm melik bï tɔ̈u ë wenïïm,

² ku ënɔɔnë yen abï we wat. Na pëk ke ee yɛn ke yɛn cï dhiɔp ka yɛn cï nɔm ɣɛɛr, ku wɛ̈ɛ̈tkï atɔ̈ukï ë week ëtök. Yɛn aaye bɛ̈nydun gɔl ɣɔn ee yɛn dhuk agut cï ënɔɔnë.

³ Ya kï. Na de kë cä wööc, ke we gɔɔny yɛn ë Bɛ̈nydït nɔm ku lɔ melik cï piac lɔc. De weŋ de raan cä nööm ku nɔn ee yen mul? De raan cän këde rum ku nɔn de raan cä yɔŋ? De raan cän kum thok nööm tëde yen? Ku na de ka cä looi në ee kakë yiic, ka abä keek cool tëde yen ka cä nööm.”

⁴ Ago kɔc bɛ̈ɛ̈r an, “Ei, yïn kën wook cam, ku yïn kën wook yɔŋ, acïn këduön cï nööm tëde raan.”

⁵ Ago Thamwɛl lɛ̈k keek an, “Bɛ̈nydït, ku jɔ aa melik cï lɔc ayï kɔc daai ee köölë acïk a yök ke ya cïn kë cä wööc.” Agokï gam an, “Ɣɛɛ, Bɛ̈nydït ee cäätɔ tëde wook, në jamdun.”

⁶ Ku lɔ Thamwɛl ke jam an, ee Bɛ̈nydït Yen ë lɔc Mothe ku Aron ku bïï kuarkun bei ë Rip.

⁷ Yen ka, ënɔɔnë kääckï ee tëduönë, ku wek bä gɔ̈ny Bɛ̈nydït, ke we bä tɔ tak karil cï Bɛ̈nydït looi ka wään kony Yen week ku kuarkun.

⁸ Ɣɔn cï Jakop kekë dhiënde lɔ Rip, ago kɔc ke Rip ke yɔŋ, kuarkun acïk bɛ̈n dhiau ku lëkkï Bɛ̈nydït bï keek kony, ago Mothe kekë Aron tuöc keek, ago keek tɔ jël ë Rip, ku jɔ keek tɔ rɛ̈ɛ̈r piny tɔ̈u kek ënɔɔnë.

⁹ Ku yen acï kɔc nïïm guɔ määr ë Bɛ̈nydït Nhialicden, go Pilithiin ku melik ke Mowap ku Thithera, bɛ̈ny ë rem de tɔŋ ë wun cɔl Ɣadhar piɔ̈t kekë kuarkun, ago kuarkun keek tiam.

¹⁰ Na wën ke ke jɔ dhiau ku lɛ̈ŋkï Bɛ̈nydït bï keek kony an, ‘Wok cï awäc looi, në biäk cï wok kueerdu puɔ̈l Bɛ̈nydït, ku lamku yiëth ke Baal ku Acetaroth. Kony wook në kɔc ke aterda, ku Yïn buk lɔ̈ŋ!’

¹¹ Ago Bɛ̈nydït ke tuöc Gidiɔn, ku Barak, ku Japetha, ku ja keek thïk cök. Raan tök ë woyiic acï week luäk bei në kɔc ke aterdun cin, aguɔkï jɔ rëër ë mätic.

¹² Na ɣɔn tiëŋ wek Naɣac melik de Ammon ke kɔɔr bï wek yiɛ̈n tɔŋ, guɔkï Bɛ̈nydït rɛɛc ke ye melikdun ku lɛ̈kkï yɛn an ‘Wok kɔɔr melik bï wook aa wat.’

¹³ “Yekï ënɔɔnë yen melik cäk lɔc, ee wek ë kɔɔr en, ku ënɔɔnë acï Bɛ̈nydït gäm week.

¹⁴ Käŋ ëbɛ̈n abïk cath apiɛth tëde week të la wek Bɛ̈nydït Nhialic riëëu, ku riëëukï lööŋke, ku na lak kuany cök ë melikdun ëtök.

¹⁵ Ku na cäkï röl de Bɛ̈nydït lɔ piŋ, ku lak lööŋke dhɔ̈ŋ yiic, abï piɔ̈u rɔc kekë week në melikdun.

¹⁶ Yen ka, ënɔɔnë kääckï tëdun, ku wek bï göök bï Bɛ̈nydït ke looi tïŋ.

¹⁷ Piny cie mɔ̈i ënɔɔnë të ye agamɔ tem, cie täu de ka? Ku yɛn bï lɔ̈ŋ, ke Bɛ̈nydït bï deŋ tɔ rel ku tueny deŋ, ku të cïï kënë tuöl, ka bäk ŋic nɔn yen awäny dït yen cäk luöi Bɛ̈nydït, në kë cä wek Yen thiëc ë melik.”

¹⁸ Na wën ke Thamwɛl ë läŋ, go Bɛ̈nydït deŋ tɔ rel ku tueny deŋ ee köölë guöp. Ago kɔc kedhie riɔ̈ɔ̈c ë Bɛ̈nydït ku riɔ̈ckï në Thamwɛl aya,

¹⁹ agokï lɛ̈k Thamwɛl an, “Bɛ̈ny, läŋ Bɛ̈nydït Nhialicdu, ke wo cïï bï thou. Ku ënɔɔnë acuk ŋic, na ciɛk dɛk karɛckuɔn kɔ̈k, ke wok cï wäc në baŋ cïï wok melik kɔɔr.”

²⁰ Go Thamwɛl lueel an, “Duökï riɔ̈c, cakaa nɔn cä wek kërac looi, duökï kueer ë Bɛ̈nydït päl, ku luööikï ë piɔ̈ndun ëbɛ̈n

²¹ Duökï yiëth ee kɔc math kuany cök, acïkï week bï kony ku acïkï week bï gël, në biäk ee kek lueth.

²² Bɛ̈nydït acï kuëëŋ looi, ka cïï week bï nyääŋ piny. Acï Bɛ̈nydït tak bï week tɔ ye kɔcke

²³ Na yɛn, yɛn cï kuëëŋ në Bɛ̈nydït nɔn bän aa lɔ̈ŋ në biäkdun. Kë bä looi ee luɔi bän we piööc bäk këpiɛth ku yic aa looi.

²⁴ Riëëukï Bɛ̈nydït, ku luööikï apiɛth në piɔ̈ndun ëbɛ̈n. Takï wenïïm në kajuëc cï keek luöi week

²⁵ Ku na ŋuɔɔtkï ke we loi kërac, week ku melikdun wek bïï riɔ̈ɔ̈k.