1 Mel 5 - JAM DE NHIALIC 2011

Tholomon Akïït Yïŋ de Luaŋdït

¹ Na ɣɔn ke Ɣiram melik ë Tayer toc kɔckɛn ee ye luööi, tuc ke Tholomon, në luɔi yen e piŋ nɔn cïï ye tɔc bï aa melik në nyin ë wunic. Në luɔi ye Debid mɛ̈thë thɛɛr.

² Go Tholomon kɔc tuöc Ɣiram lueel an:

³ “Yïn ŋic luɔi kën Debid wäär Luaŋdït yïk në rin ke Bɛ̈nydït Nhialicde në biäk de tɔɔŋ ë cï ye tuɔɔk ë tuŋ thook kedhie, agut të bïï Bɛ̈nydït kɔc ke aterde tiaam kedhie.

⁴ Ku ënɔɔnë Bɛ̈nydït Nhialic acï a gäm mät ë tuŋ thook kedhie, ka cïn raan de ater ayï kërac aliu.

⁵ Ku yakï, yɛn de piɔ̈u luɔi bän Luaŋdït yïk në rin ke Bɛ̈nydït Nhialicdï, cït man ë cï Yen e lɛ̈k wäär Debid an, ‘Wën bä tääu ë nyindu yic ë thöönydu nɔm, yen abï rinkï luöi Luak.’

⁶ Yen ënɔɔnë, yɔ̈ɔ̈kë kɔcku bïk a yiëp tiim ke thidar ë Lebanɔn, ku kɔc ee yɛn luööi abïk rëër në kɔc ee yïn luööi, ku yïn bä gäm ariöp de kɔckuön ee yï luööi, në këde kë bä lueel ëbɛ̈n. Ku aŋic nɔn cïn en raan nu në wo yiic, raan atët ee tiim ŋiëc yep cït kɔc ke Thidon.”

⁷ Na ɣɔn aacï Ɣiram wël ke Tholomon piŋ, ke jɔ piɔ̈u miɛt arëët, ku lueel an, “Thieithieei Bɛ̈nydït ë köölë, Raan cï Debid yiɛ̈n wën pelnɔm adöt në ë jurdïïtë nɔm!”

⁸ Go Ɣiram kɔc tuöc Tholomon lueel, an, “Jam cï tɔ yïnë yɛn acä piŋ, ku këde yïn piɔ̈u ëbɛ̈n abä looi në tiim ke thidar ku tiim ke ameth.

⁹ Abï kɔckiën ee ya luööi ke bɛ̈ɛ̈i Lebanɔn ku leerkï ke në wɛ̈ɛ̈r yɔu, ku abä ke ya duöt ku tääu ke ë thiɛɛkic ë wɛ̈ɛ̈ric, bï keek lɛɛr të bä lueel. Ku abïï kɔckï ke jöt bei ëtɛ̈ɛ̈n, ku abïï kɔcku ke jɔ aa nööm. Ku kë bïï aa biäkdu, ee luɔi bïï yïn kɔckï aa miɔɔc në këcam.”

¹⁰ Ku Ɣiram aaye Tholomon yiɛ̈n tiim ke thidar ku tiim ke ameth ku këde piɔ̈nde ëbɛ̈n.

¹¹ Go Tholomon Ɣiram aa yiɛ̈n bɔt de agum (100,000) ke cual ke agamɔ, ku bɔt de agum ku bot kathiëër (110,000) ke aguut ke miök, aake ye Tholomon ke yiɛ̈n Ɣiram ë run nyïïn ëbɛ̈n, bïï kɔcke ke cam.

¹² Go Bɛ̈nydït Tholomon gäm pɛlënɔm, cït man cï en e lɛ̈k gutguut. Ku aade mät nu ë kaam de Ɣiram kekë Tholomon, agokï määth looi kaarou.

¹³ Go melik Tholomon bot kathiërdiäk 30,000 ke röör ke luɔi kuɛ̈ny bei në Yithriɛlic ëbɛ̈n,

¹⁴ ku tooc keek Lebanɔn, ku tɔ Adoniram ee bɛ̈nyden, acï ke tekiic në bot kathiëër 10,000 ke röör, ku kuut tök abï pɛɛi tök aa lɔ thöl në Lebanɔn, ku bïï pɛ̈i kaarou bɛ̈n thöl baaide.

¹⁵ Ku Tholomon aa de nɔm bot kathiërbɛ̈t 80,000 ke röör aya, kɔc ee kur guaŋ piny ë kuur, ku bot kathiërdhorou 70,000 ke röör bï kur aa ɣääc,

¹⁶ ku tɛ̈ɛ̈u aguum kadiäk ku bot kadiäk 3,300 ke röör, bï keek aa wat ë luɔidenic.

¹⁷ Go melik Tholomon kɔc ee kur guaŋ yɔ̈ɔ̈k bïk kurdït läk pätiic wäk bei bï ke këërkëër ë Luaŋdït yïk.

¹⁸ Go kɔc ke Tholomon ku kɔc ke Ɣiram ku lɔ kɔc ke wun cɔl Gebal, tiim ku kur bïï ë Luaŋdït yïk guiir.