1 Mel 10 - JAM DE NHIALIC 2011

Kɛ̈ny de Tiiŋ Melik de Ceba

¹ Na ɣɔn aa piŋ tiiŋ melik ë Ceba lɛc de Tholomon në këde dhuëëŋ de rin ke Bɛ̈nydït, ke bɔ̈ bï bɛ̈n them në thiëc ril.

² Bïï Jeruthalem ke kɔckɛn cath ë yecök, ku thɔ̈rɔ̈ɔ̈l ɣɛ̈ɛ̈c wal ŋïr, ku adhɛ̈p juëc arëët, ku kur kuur läk. Na wën aacï yök kekë Tholomon, go luɔp në këriëëc nu ë yepiɔ̈u ëbɛ̈n.

³ Go Tholomon lɛ̈k këriëëc wën cï thiëëc ëbɛ̈n, ku acïn thiëc rilic cï melik Tholomon bɛ̈n ban.

⁴ Go tiiŋ melik de Ceba pɛlënɔm de Tholomon tïŋ, ku tïŋ ɣön cï yïk.

⁵ Ku tïŋ këcam nu ë paamde nɔm, ku të rëër ë bänyke, ku täu tɔ̈u ë kɔc ee kake looi, ku lupɔɔkɛn yek ceŋ, ku täu de kɔc ee ye luööi në kööl de dhuëëŋ, ku miɔ̈c ye nyop ëbɛ̈n cïï Tholomon gäm Bɛ̈nydït ë Luaŋdïtic. Go jɔ ciën däŋ be tɛɛr.

⁶ Ago melik Tholomon yɔ̈ɔ̈k an, “Thoŋ cä piŋ pinydï në biäk de luɔidu ku pɛlënɔmdu ee yic!

⁷ Ku aake kɛ̈n gam abä jɔ bɛ̈n ku tiɛ̈ŋ ke në yanyin, pɛlënɔmdu, ku kuɛthdu adït arëët awär ka cï lɛ̈k ɛn.

⁸ Thieithieei ë diëërku, ku thieithieei ë kɔckuön ee yï luööiyë, kɔc ee cool ë kääc ë yïnɔm, ku yek pɛlënɔmdu piŋ!

⁹ Thieithieei ë Bɛ̈nydït Nhialicdu! Bɛ̈nydït amit piɔ̈u ke yïn, abï yï nyuööc ë thööny de Yithriɛl nɔm. Në luɔi nhiɛɛr ë Bɛ̈nydït Yithriɛl aɣet athɛɛr, yen a tɔ En yïn ee melik, ago löŋ aa guiir në piathëpiɔ̈u ku yic.”

¹⁰ Go melik Tholomon gäm miɔ̈c cï bɛ̈ɛ̈i: ka wär aguum kaŋuan 4000 ke kilɔɔ gram ke adhääp, ku wal ŋïr juëc aläl, ku kuur läk. Ku acïn wal ŋïr kɔ̈k juëc cït wal ŋïr cï tiiŋ melik de Ceba gäm melik Tholomon.

¹¹ (Ku abëël wïïr ke Ɣiram ɣɔn bïï adhääp në Opir, acïk tiim juëc ke almuk bɛ̈ɛ̈i ku kuur läk.

¹² Ku tɔ melik mëën ke Luaŋdït ku ɣöndïït ë melik loi në tiim ke almuk, ku tɔ thoom ke kiët ë diɛt loi aya në keek. Aake ye tiim piɛth ke almuk, ku acïn tiim cït ee kakë cï kɔn bɛ̈n piny de Yithriɛl, ku akënë ke bɛ tïŋ aɣet cï ee köölë.)

¹³ Go melik Tholomon tiiŋ melik de Ceba gäm këriëëc cï thiëëc ëbɛ̈n, mɛt ke në ka cï Tholomon gäm en në dhuëëŋde pei. Na wën ke puk e nɔm piny de Ceba kekë kɔckɛn ee ye luööi.

Kuɛth de Tholomon

¹⁴ Në ruöön thok ëbɛ̈n melik Tholomon aye yiɛ̈n aguum kathiërrou ku diäk 23,000 ke kilɔɔ gram ke adhääp,

¹⁵ mɛtke në athölbö ye kuöt en kɔc ee käŋ ɣaac, ku ka ye yök në ka cï lɔ ɣaac thook, ku ka ye meliik ke Arab kedhie juëër en, ku ka ye bäny mac wuöt ke Yithriɛl juaar.

¹⁶ Go melik Tholomon bot kaarou 200 ke köötdït looi në adhäm cï deŋ, ku aaye kön tök dɛ̈ŋ kɔ̈u kilɔɔ kadhorou ke adhääp.

¹⁷ Ku looi bot kadiäk ke kööt kor aya, në adhäm cï deŋ, ku aaye kön tök dɛ̈ŋ kɔ̈u kilɔɔ kaarou ke adhääp. Acï Tholomon ke tääu ɣöndɛn nu roor ë Lebanɔnic.

¹⁸ Ku be melik thöönydɛndïït ë tuuŋ akɔ̈ɔ̈n looi, ku kum kɔ̈u në adhääp lɔ wai.

¹⁹ Thööc ade kake lɔ nhial kadhetem, ku thööc acï giët kɔ̈u nɔm de dɔu në biäk ciëën, ku ade cök në biäkë ku biäkë, ku ye kɔ̈ɔ̈r kɔ̈ɔ̈c kaarou në cök lɔ̈m.

²⁰ Ku kääc kɔ̈ɔ̈r kathiëër ku rou në biäkë ku biäkë në kak ke lɔ nhial nïïm kadhetem, ku acïn kë cït ee kënë cï kɔn looi paan däŋ.

²¹ Ku aduuk ye melik Tholomon ke dek kedhie ayek adhɛ̈p, ku aduuk ke ɣöndɛn nu roor ë Lebanɔn ayek adhäm awai. Acïnic kë cï looi në ateek, në baŋ cïn en naamde në akööl ke Tholomon.

²² Ku melik ade nɔm abëël wïïr ke Tarcic në wɛ̈ɛ̈ric ee käŋ lɔ ɣaac raan tök të cï run kadiäk tëëk në abëël wïïr ke Ɣiram ëtök, ku të bï kek ciëën në abëël wïïr ke Tarcic ayek adhääp ku ateek, ku tuŋ ke akɔ̈ɔ̈n, ku agaŋ jak, ku agɔk lok bɛ̈ɛ̈i.

²³ Ago melik Tholomon meliik ke pinynɔm jɔ wöör kedhie në kuɛth ku pɛlënɔm,

²⁴ ku ye pinynɔm ëbɛ̈n Tholomon kɔɔr, bï pɛlënɔmde bɛ̈n piŋ, pɛl cïï Nhialic gäm yen.

²⁵ Në ruöön thok ëbɛ̈n, raan ëbɛ̈n në ke yiic aaye miɔ̈cde bɛ̈ɛ̈i, wëu ke adhääp ku ateek, ku lupɔɔ, ku wëu ke tɔŋ, ku mer, ku jöŋgöör, ku mul.

²⁶ Go Tholomon abëël juëc ke tɔŋ looi ka cït agum ku bot kaŋuan 1,400, ku aguum kathiëër ku rou12,000 ke jöŋgöör. Acï kɔ̈k tääu Jeruthalem, ku tɛ̈ɛ̈u kɔ̈k në pɛ̈ɛ̈nydït kɔ̈k yiic.

²⁷ Go melik ateek tɔ tɔ̈u ë Jeruthalem cït man ë kur, ku tɔ tim de thidar juëc cït man ë ŋaap ee cil ë kur thäär në Juda.

²⁸ Kɔc ee kake melik ɣaac, kek amuk ɣööc de jöŋgöör ku abëël ke tɔŋ piny në Rip ku Kue,

²⁹ aake ye abëël ke tɔŋ bɛ̈ɛ̈i në Rip Aake ye meliik ke Thiriya ku Ɣit yiɛ̈n abëël ke tɔŋ, abël de tɔŋ aaye ɣɔɔc në bot kadhetem ke ateek, ku ye ɣööc de jöŋgöör tök bot ku thiërdhïc de ateek.