1 Lëk 5 - JAM DE NHIALIC 2011

Käu de Ruben

¹ Kakë ayek wɛ̈ɛ̈t ke mïth ke Ruben wën kɛ̈i de Yithriɛl, Ruben yen aaye wën kɛ̈i, ku në biäk cï yen lɔ ɣöt kekë tiiŋ tök në diäär määth në wun, yiny de kɛ̈ide acï bɛ̈n gäm wɛ̈ɛ̈t ke Jothep wën de Yithriɛl, ka rinke akën ë keek gɔ̈ɔ̈r në kuëny ye kek kecök kuany cït man de yiny de dhiëth.

² Cakaa wään cïï dhiën de Juda bɛ̈n riɛl ku bɛ̈ny aa bɔ̈ në ye yic, ku yiny de dhiëth acï bɛ̈n ŋoot ke ye këde Jothep.

³ Wɛ̈ɛ̈t ke Ruben wën kɛ̈i de Yithriɛl, ee Ɣanook, ku Palu, ku Ɣedheron, ku Karemi.

^4-6 Ku wɛ̈ɛ̈t ke Jowɛl, ee Cemaya, ku Gok, ku Cimei. Maika, ku Riiya, ku Baal. Ku Beera wään aacï Tiglath Pilethar melik de Athiriya peec, aaye bɛ̈ny de dhiën de Ruben.

⁷ Bäny ke dhiën de Ruben cï ke bɛ̈n gɔ̈ɔ̈r, ee Jeyel, ku Dhekaria,

⁸ ku Bila wën de Adhadh, ku wën de wën ë Cema de dhiën de Jowɛl. Yen ee dhiënë ee rɛ̈ɛ̈r në Aroyer, ku rɛ̈ɛ̈r kɔ̈k ë jɔ̈ɔ̈ric ë biäk të lɔ aköl amiäk de Nebo ku Baalmion.

⁹ Keek ayek kɔc de nïïm ɣɔ̈k juëc piny de Giliyad, gokï baai guɔ rum ëtɛ̈ɛ̈n abïk ɣet të lɔ aköl amiäk ë jɔ̈ɔ̈ric të thiääk ke wɛ̈ɛ̈r ë Yuparat.

¹⁰ Në ruöön tɔ̈u ë melik Thaulo ë bääny yic, go dhiën de Ruben kɔc ke Ɣagariit lɔ mak ku nɛ̈kkï keek ë tɔŋic, ku nömkï pinydɛn tɔ̈u ë Giliyad biäk të lɔ aköl amiäk.

Käu de Gad

¹¹ Dhiën de Gad aa rɛ̈ɛ̈r ë biäk të lɔ rut të lɔ dhiën ë Ruben piny de Bacan ɣeet Thaleka.

¹² Jowɛl yen aye bɛ̈ny, ku lɔ Capan në yecök, ku Janai, ku Capat në Bacan.

¹³ Ku kɔckɛn kɔ̈k ke dhiënken ayek kɔc ke dhiënkë: Maikɔl, ku Meculam, ku Ceba, ku Jorai, ku Jakan, ku Dhia, ku Eber, ayek dhorou.

¹⁴ Keek ayek käu de wɛ̈ɛ̈t ke Abiɣail wën de Ɣuri, Ɣuri wën de Jarowa, Jarowa wën de Giliyad, Giliyad wën de Maikɔl, Maikɔl wën de Jecicai, Jecicai wën de Jaɣodo, Jaɣodo wën de Budh.

¹⁵ Aɣai wën de Abidiel, wën de Guni, aaye bɛ̈ny në dhiën ke wärken nïïm.

¹⁶ Aake rɛ̈ɛ̈r në Giliyad ë Bacan ë wuötken yiic, ku lɔ ɣään ke nyuäth ëbɛ̈n ë Caron yic.

¹⁷ Kakë aake matke yiic në akööl ke Jotham melik de Juda ku Jerobowam de Rou melik de Yithriɛl, ɣɔn tɔ̈u kek ë bääny yic.

Rɛm ke tɔŋ ke Dhiën tɔ̈u të lɔ Aköl Amiäk

¹⁸ Në Dhiën de Ruben, ku Gad ku Manatha de aköl amiäk, ade aguum kathiërŋuan ku ŋuan, ku bot kadhorou ku thiërdhetem 44,760 de rem de tɔŋ cï wɛ̈ɛ̈t ë muŋ de kööt, ku abätäu, ku muny de dhɛ̈ŋ.

¹⁹ Gokï lɔ tɔŋ, lekkï piɔ̈t ë kɔc ke Ɣagariit nu ë Jitur, ku Napic, ku Nodap.

²⁰ Agokï Nhialic ŋɔ̈ɔ̈th, ku lɛ̈ŋkï bïï ke kony, go Nhialic lɔ̈ŋden piŋ, ku tɔ keek tɔ tiam kɔc ke Ɣagariit në kɔc mät ë keek.

²¹ Acïk aguum kathiërdhïc 50,000 de thɔ̈rɔ̈ɔ̈l bɛ̈n peec, ku bot kaarou ku thiërdhïc de aguum 250,000 ke amɛ̈l, ku aguum kaarou 2,000 ke mul, ku peckï bɔt töŋ de agum 100,000 ë kɔc ë tɔŋic.

²² Acïk kɔc juëc ke aterden bɛ̈n nɔ̈k ë tɔŋic, në biäk ye tɔŋ këde Nhialic piɔ̈u. Ku jɔkï rëër ee pinyë agut cï ɣɔn jɔ ë keek peec.

Kɔc Dhiën de Manatha nu të lɔ Aköl Amiäk

²³ Go kɔc ke Manatha nu të lɔ aköl amiäk lɔ ɣap piny de Bacan ɣeet Baal Ɣermon, ku Thenir ku Kuur ë Ɣermon, go kuɛ̈n de kɔc yenyin ŋuak aläl.

²⁴ Kake ayek bäny ke dhiënken, Eper, Yici, Eliel, Adheriɛl, Jeremia, Ɣodabia, ku Jaɣadiel. Keek kedhie aa ke ye rɛm ril ke tɔŋ, ku yek bäny ŋic ë dhiënken thook.

Dhiën nu të lɔ Aköl Amiäk acï ke Peec

²⁵ Na wën ke kɔc ë ke lui awäc Nhialic de kuarken, ku reeckï, ku lamkï yiëth ke kɔc ɣɔn bï ë Nhialic ke cuɔp wei pinyden ë kenïïm.

²⁶ Go Nhialic de Yithriɛl, Pul melik de Athiriya ku acɔl Tiglath Pilethar aya, go tɔ rum pinyden. Go dhiën de Ruben, ku dhiën de Gad, ku kɔc dhiën ë Manatha nu të lɔ aköl amiäk, ago keek peec. Ku nyuuc keek në Ɣala, ku Ɣabor, ku Ɣara, ku në Kiir de Godhan kɔ̈u, bïk ɣap aɣët ee köölë.