1 Lëk 12 - JAM DE NHIALIC 2011

Kɔc ë Kɔn Cath ë Debid në Dhiën de Benjaminic

¹ Debid aa rɛ̈ɛ̈r ë Dhiklak, të wään cï yen kat ë melik Thaulo. Ago rem de tɔŋ cï ŋiëc wɛ̈ɛ̈t röt mät en ëtɛ̈ɛ̈n,

² kɔc ke dhiën de Benjamin, kɔcken ke melik Thaulo. Kɔc ŋic muny de dhaŋ në cin kedhie ciɛɛm ku cuëëc.

^3-7 Raan ee bɛ̈nyden ee Aɣidher ku Jowac wɛ̈ɛ̈t ke Cemaa wun ë Gibia. Rɛmkɛn ke tɔŋ ee yï: Jedhiel, ku Pelet, wɛ̈ɛ̈t ke Adhimabeth, Beraka ku Jeɣu wun ë Anathoth, Yicmayan wun ë Gibiɔn ee jön de tɔŋ në thiërdiäk yiic, ku ye bɛ̈ny nu në kɔc kathiërdiäk nïïm, Jeremia, ku Jaɣadhiel, ku Jɔnathan ku Jodhabad de Gedera, Eludhai, Jerimoth, Biilia, Cemaria, ku Cepatia wun de Ɣarupa, Elekana, Yicia, Adharel, Joyedher, ku Jacobiim de dhiën ë Kɔra, Jowɛla ku Dhebadia wɛ̈ɛ̈t ke Jeroɣam de Gedor.

Kɔc ee Cath ë Debid në Dhiën de Gad Yic

⁸ Rin ke rem de tɔŋ de dhiën de Gad cï ŋiëc wɛ̈ɛ̈t, kɔc ɣɔn cï röt mät rem de tɔŋ ë Debid, ɣɔn nu en ë jɔ̈ɔ̈ric, ee kɔc cï wɛ̈ɛ̈t ë muŋ de kööt ku tɔɔŋ, acïtkï nyïïn kɔ̈ɔ̈r, ku aŋickï riŋ cï ŋeer ë kuriic.

⁹ Bäänyden acï kiëët alë: Edher, Obadaya, Eliap,

¹⁰ Micmana, Jeremia,

¹¹ Atai, Eliel,

¹² Jɔnathan, Eldhabad,

¹³ Jeremia, ku Makbanai.

¹⁴ Kɔc ke dhiën de Gadkë aake ye bäny nu në rɛm ke tɔŋ nïïm, raan däŋ ee bɛ̈ny de bɔt, ku kɔc kɔ̈k ayek bäny ke agum.

¹⁵ Röörkë kek aake tem Kiir de Jordan ke cï thiɔɔr në yekëc ëbɛ̈n, në pɛɛi tueŋ de ruöön, ku thiɛ̈ikï kɔc nu ë wɛ̈k yiic piny, kɔc ë rɛ̈ɛ̈r të lɔ aköl amiäk, ku kɔc nu të lɔ aköl athɛ̈i de Kiir.

Kɔc ee Cath ë Debid në Dhiën de Benjamin ku Juda

¹⁶ Na ɣɔn ke kɔc ke dhiën ke Benjamin ku Juda lɔ të tɔ̈u ë Debid.

¹⁷ Go Debid yök ke keek, ku lëk keek an, “Të bä wek ke we ye määthkï, bäk ya bɛ̈n kony ke we bäkï mätkï röt wook! Ku na bäkï, bäk a bɛ̈n nyiɛɛn tëde kɔc ke aterdï, cakaa nɔn cïn en kërɛɛc cä luöi week, ke Nhialic de kuarkuɔ, abï kë luɔikï ŋic ku abï week luöi këtuc.”

¹⁸ Go Wëidït ke Nhialic bɛ̈n në raan töŋden guöp, go Amathai ɣɔn cï bɛ̈n aa bɛ̈ny de thiërdiäk lueel an, “Debid wën de Jethe, wok ee kɔcku! Yïn bï tiam wekë kɔc kony yïn! Nhialic atɔ̈u ë biäkdu.” Go Debid ke cɔɔl, ku tɔ keek ee bäny ke remdɛn de tɔŋ.

Kɔc ee Cath ë Debid në Dhiën de Manatha Yic

¹⁹ Go rem däŋ de tɔŋ ë dhiën ë Manatha röt mät Debid, wään le ë Debid tɔŋ kekë rem de tɔŋ ë Pilithiin, bïk lɔ thɔ̈ɔ̈r ë melik Thaulo. Aake kën kɔc ke Pilithiin kony ë yic, në biäk riɔ̈ɔ̈c ë meliik ke Pilithiin, ayek lueel nɔn duëër yen keek nyiɛɛn tëde Thaulo bɛ̈nydɛn thɛɛr, agokï tɔ puk rɔt ciëën Dhiklak.

²⁰ Kakë ee rem de tɔŋ de dhiën ë Manatha ɣɔn cï röt mät melik Debid, wään puk en rɔt ciëën ë Dhiklak: Adina, Jodhabad, Jadiil, Maikɔl, Jodhabad, Eliɣu, ku Dhilethai. Aake ye bäny de aguum de kɔc në dhiën de Manatha yic.

²¹ Acïk Debid luööi ke ke ye bäny ke remdɛn ë tɔŋ, acïk kuɔny ë thɔ̈ɔ̈rden në kɔc ee käŋ kual, ke ke ye bäny ke remdɛn ë tɔŋ, në biäk ye kek jööt ril ke tɔŋ. Na ɣɔn ciëën acïk bɛ̈n aa bäny ke rem de tɔŋ de Yithriɛl.

²² Akööl nyïïn kedhie kɔc aake ye bɛ̈n ku mɛtkï röt ë rem de tɔŋ ë Debid yic, abï ya remdïït de tɔŋ, cït rem de tɔŋ ë Nhialic.

Rin ke Rem de Tɔŋ de Debid

^23-37 Ɣɔn tɔ̈u ë Debid në Ɣebron, remdïït ë tɔŋ cï piɔ̈ɔ̈c acï rɔt bɛ̈n mat ë rem de tɔŋde yic, bïk lɔ kuɔny bïï aa melik ë nyin de melik Thaulo yic, cït jam ɣɔn cïï Bɛ̈nydït lueel. Kɔc ke Juda muk kööt ku tɔɔŋ ayek aguum kadhetem ku bot kabɛ̈t. Kɔc ke Thimion, röör jööt cï ŋiëc wɛ̈ɛ̈t lëu tɔŋ, ayek aguum kadhorou ku bɔt tök Kɔc ke Lebai ayek aguum kaŋuan ku bot kadhetem. Kɔc ke wën melik Jeɣoyada, raan dhiën de Aron ayek aguum kadiäk ku bot kadhorou. Kɔc ke Dhadok, jön thiin cï ŋiëc wɛ̈ɛ̈t lëu tɔŋ, ku wɛ̈ɛ̈t paan de wun, ayek thiërrou ku rou. Kɔc ke Benjamin, kɔc raan në Thaulo ayek aguum kadiäk. Ku kɔc juëc ke Benjamin acïk bɛ̈n döŋ ke ke tɔ̈u ë Thaulo cök. Kɔc ke Eparaim ayek aguum kathiërrou ku bot kabɛ̈t 20,800, ayek jööt cï ŋiëc wɛ̈ɛ̈t lëu tɔŋ, ku ayek kɔc de kɛk ë dhiëndenic. Kɔc ke dhiën biäk de Manatha ayek aguum kathiëër ku bɛ̈t 18,000, kɔc wään cï bɛ̈n bïk Debid bɛ̈n tɔ ye melik. Kɔc ke Yithakar, kɔc ŋic täu de akööl, kɔc ŋic kë duëër ë Yithriɛl aa looi, adekï bot kaarou ke bäny, ku kɔc raan ë keek kedhie atɔ̈ukï në kecök. Kɔc ke Dhebulun ayek aguum kathiërdhïc 50,000, ayek rem de tɔŋ cï ke ŋiëc wɛ̈ɛ̈t, ku adekï kakɛn ë tɔŋ kedhie bï kek Debid luök. Kɔc ke Naptali adekï agum de bäny ke tɔŋ, ku aciɛthkï në aguum kathiërdiäk ku dhorou 37,000 de rem de tɔŋ muk kööt ku tɔɔŋ. Kɔc ke Dan ayek aguum kathiërrou ku bɛ̈t, ku bot kadhetem 26,600 de rem ë tɔŋ cï guiir në biäk ë tɔŋ. Kɔc ke Acer ayek aguum kathiërŋuan 40,000 de rem ë tɔŋ cï guiir në biäk ë tɔŋ. Kɔc ke Ruben, ku Gad, ku biäk de Manatha nu ë Jordan kɔ̈u të lɔ aköl amiäk, ayek agum bɔt ku thiërrou 120,000 de rem ë tɔŋ cï guiir në wëu ke tɔŋ kedhie.

³⁸ Kek ee rɛm ke tɔŋë, acïk röt guiir ë biäk de tɔŋ, gokï lɔ Ɣebron bïk Debid lɔ tɔ ee melik de Yithriɛl ëbɛ̈n. Ku yen ee luɔi cï kɔc ke Yithriɛl keyiic mat kedhie në biäk ee jam töŋë.

³⁹ Gokï nïn kadiäk thöl ëtɛ̈ɛ̈n ë Debid ke ke loi dhuëëŋ ë kacaam ku mäu, ka cïï kɔc ke Yithriɛl kɔ̈kkë luöi keek.

⁴⁰ Go kɔc bɛ̈n ë ɣään mec ke Dhiën nu të lɔ rut de yï Yithakar, ku Dhebulun, ku Naptali. Kɔc acïk bɛ̈n ë mul, ku thɔ̈rɔ̈ɔ̈l, ku miöör cï thiɔ̈ɔ̈ŋ kɔ̈ɔ̈th ë kacaam, ku aɣaar, ku ŋaap, ku rap, ku mäu ku miök de olip. Acïk ɣɔ̈k ku thök bïk bɛ̈n nɔ̈k ku cuetkï keek bɛ̈ɛ̈i. Kënë aaye nyuöth de miɛt de piɔ̈u cï rɔt looi ë baai yic ëbɛ̈n.