1 Kor 3 - JAM DE NHIALIC 2011

Lïïm ke Nhialic

¹ Ku yɛn, mïthëkɔckuɔ, yɛn aa cïï duëër jam wokë week wään, cït kɔc cï kepiɔ̈ɔ̈th tuöm ka ke Wëi, yɛn aaye jam wo week cït kɔc cï kepiɔ̈ɔ̈th tuöm ka ke guöp tei, cït mïththii ateteet ë Kërtho yic.

² We cä tɔ ruëth ë ca, ku acïn rïïŋ cä gäm week, wek aa kën rïŋ guɔ lëu ë cuët: ku acakaa ënɔɔnë, acäkï ee lëu,

³ we ŋoot ë we tum wepiɔ̈ɔ̈th ka ke piny. Ku nɔn tɔ̈uwë tiɛɛl ë weyiic ayï ateer ayï tëŋ aa wek weyiic tek, cäkï wepiɔ̈ɔ̈th ë tuöm ka ke piny, ku cäkï ë rëër ë rëër ë kɔc tei?

⁴ Ku tën ee ŋɛk e lueel an, “Yɛn ee këde Paulo,” ku lueel ŋɛk an, “Yɛn ee këde Apolo,” cäkï ë kɔc ee kepiɔ̈ɔ̈th tuöm ka ke piny?

⁵ Paulo eeŋa? Ku Apolo eeŋa? Cïkï ë kɔc ee luui tei, kɔc cï we tɔ gäm, cït man cï Bɛ̈nydït e gäm ŋɛk ku gëm ŋɛk?

⁶ Yɛn ee com, Apolo en aaye piöök, ku ee Nhialic en aaye käŋ tɔ cil.

⁷ Yen acïn raan ee com naamde, ku cïn raan ee piöök naamde, ee Nhialic raan ee käŋ tɔ cil, yen ade nɔm.

⁸ Ku raan ë com kekë raan ë piöök ayek tök, ku raan ëbɛ̈n abï ariöpde yök, ariöp bï röŋ ke luɔide yenguöp.

⁹ Wok ee kɔc ë luui në Nhialic ëtök: wek ee dom ë Nhialic. Ku yak alooc de Nhialic.

¹⁰ Luɔi luɔɔi ɛn kë cï tääu ë yacin në dhuëëŋ de Nhialic nu ë atëët nïïm, ku ee raan däŋ yen ayïk thïn. Ku tɔ raan ëbɛ̈n cök ë woi en yïŋ yïk en thïn.

¹¹ Ku këërkëër däŋ acïn raan duëër e lëu ë kɛ̈ɛ̈r, ee kë ye thök ë kɛ̈ɛ̈r etök, yen aye Yecu Kërtho.

¹² Ku na yïk raan ë këërkëërë nɔm, ku yïŋ yïk en ë yenɔm, nɔn ee yen adhääp, ku nɔn ee yen ateek, nɔn ee yen kuur läk, nɔn ee yen tim, nɔn ee yen wal, nɔn ee yen anin,

¹³ ke luɔi de raan ëbɛ̈n abï tïc wadäŋ: ee köölë yen abï e nyuɔɔth, ee mac en abï e nyuɔɔth, ku luɔi de raan ëbɛ̈n abïï mac them, nɔn ee yen luɔi cït ŋö.

¹⁴ Na dɔ̈ŋ kë ë ŋɛk looi, kë cï yïk ë këërkëër, ka bï ariöpde yök.

¹⁵ Ku të cï kë cï ŋɛk looi nyop abï lɔ kuith piny, ka bï dak ë käŋ, ku yen guöp abï kony wëi, ku abï poth ë poth ë raan ë kony ë macic.

¹⁶ Kuöckï wegup, nɔn aa wek luaŋdïït ë Nhialic, ku nɔn rëërë Wëidït ke Nhialic ë weyiic?

¹⁷ Raan ee luaŋdïït ë Nhialic tɔ nhiany, en abïï Nhialic tɔ nhiany: luaŋdïït ë Nhialic ee kë ɣeric, ku yen aye week.

¹⁸ Në cïn raan ee rɔt math. Na de raan ë weyiic raan ee rɔt tɔ ye raan pelnɔm ë pinyë nɔm, ë ye rɔt tɔ ye dhɔ̈n, luɔi bï en aa raan pelnɔm.

¹⁹ Pɛlënɔm ee pinyë ee dhɔ̈ɔ̈n tëde Nhialic, luɔi cï ë gɔ̈ɔ̈r an, “Aye kɔc pelnïïm dɔm në ruëënydenic”,

²⁰ ku aye bɛ gɔ̈ɔ̈r an, “Bɛ̈nydït aŋic ka ye kɔc pelnïïm tak ë kepiɔ̈ɔ̈th, nɔn ee kek kaɣäär yiic.”

²¹ Yen cïn en raan ee rɔt leec ë kɔc. Käŋ kedhie ayek kakun.

²² Paulo, ayï Apolo, ayï Kepath, ayï piny nɔm, ayï pïïr, ayï thuɔɔu, ayï ka nu ënɔɔnë, ayï ka bï bɛ̈n, ayek kakun kedhie,

²³ ku wek ee ka ke Kërtho, ku Kërtho ee këde Nhialic.