1 Kor 1 - JAM DE NHIALIC 2011

¹ Yɛn Paulo, raan cï cɔɔl bï aa tuny ë Yecu Kërtho në këde piɔ̈n ë Nhialic, wokë Thothene mɛnhkënëda,

² Awerek en gɛ̈ɛ̈rku ɣön ë Nhialic nu Korinthoi, kɔc wën cï tɔ ɣerpiɔ̈ɔ̈th ë Yecu Kërtho yic, kɔc wën cï cɔɔl bïk aa kɔc piɛthpiɔ̈ɔ̈th, kekë kɔc kedhie kɔc nu ë wuöt yiic ëbɛ̈n, kɔc ee rin ke Yecu Kërtho Bɛ̈nydïïtda cɔɔl, ee Bɛ̈nyden keek ku ye Bɛ̈nyda wook.

³ Ë dhuëëŋdepiɔ̈u tɔ̈u ë weyiic ayï mät, ë ke bɔ̈ tëde Nhialic Wääda kekë Bɛ̈nydït Yecu Kërtho.

Athiɛɛi në Kërtho Yic

⁴ Yɛn ee cool ë lec Nhialicdï në baŋdun, në këde dhuëëŋ de Nhialic piɔ̈u dhuëëŋ cï gäm week ë Kërtho Yecu yic,

⁵ luɔi cï en week tɔ kueth në këriëëc ëbɛ̈n, në ŋiëc jam ëbɛ̈n ku në ŋïny de käŋ ëbɛ̈n,

⁶ acït man cï jam tɔ ye yic ë weyiic jam cï lueel ë këde Kërtho:

⁷ ago ciën miɔ̈c töŋ dak week, të tiɛɛt wek nyuöth bï Bɛ̈nydan Yecu Kërtho rɔt nyuɔɔth.

⁸ Raan bï week muk abäk riɛl a thöökë piny, ke bï ciën kë bï we gɔ̈k ëkööl ë Bɛ̈nydan Yecu Kërtho.

⁹ Nhialic ee Raan adöt, Raan cï we cɔɔl në këde määth de Wëndɛn Yecu Kërtho Bɛ̈nydïïtda.

Tɛɛk ë Yic Ɣön ë Nhialic

¹⁰ Ku ënɔɔnë, wek läŋ, wek mïthëkɔckuɔ, në rin ke Bɛ̈nydan Yecu Kërtho, an, Yak jam tök lueel wedhie, ku ë cïn tëŋ tɛk wek weyiic, ke we bï weyiic mat ëtök ë piɔ̈n tök ku në löŋ tök, löŋ luɛlkï.

¹¹ Ku ade jam cï lɛ̈k ɛn ë dhiën ë Kuole ë këdun, wek mïthëkɔckuɔ an, nu teer ë weyiic.

¹² Ku ënɔɔnë, we lɛ̈k kënë an, Raan ëbɛ̈n në weyiic, aye ŋɛk lueel an, “Yɛn ee raan ë Paulo,” ku lueel ŋɛk an, “Yɛn ee raan ë Apolo,” ku lueel ŋɛk an, “Yen ee raan ë Kepath,” ku në ŋɛk an, “Yɛn ee raan ë Kërtho.”

¹³ Cï Kërtho ëyic tek? Cï Paulo piäät ë tim cï rïïu nɔm kɔ̈u?

¹⁴ Yɛn lec Nhialic luɔi cïn en raan cä baptith ë weyiic, ee Kirithipo ku Gaayo kapäc.

¹⁵ Ke cïn raan bï e lueel an, cä kɔc baptith në rinkï.

¹⁶ Ayï dhiën ë Thepana aya acä ke baptith: ku akuöc nɔn de raan däŋ cä baptith.

¹⁷ Kërtho akën a tooc, bä kɔc bɛ̈n baptith, ee guiëër bän wëlpiɛth aa guiir, en aa tooc en ɛn: ku acie pɛl pɛl ɛn nɔm en duɛ̈ɛ̈r ɛn wëlpiɛth aa guiir, ke tim cï rïïu nɔm cïï bï aa ɣɔ̈ric tim de Kërtho.

Kërtho ee Riɛl ku Pɛlënɔm de Nhialic

¹⁸ Ku guiëër ë wël ke tim cï rïïu nɔm ee këɣɔ̈ric tëde kɔc bï määr, ku ye riɛldït ë Nhialic tëde wook wok kɔc kony wëi.

¹⁹ Në gäär cï e gɔ̈ɔ̈r an, “Yɛn bï pɛlënɔm ë kɔc pelnïïm riɔ̈ɔ̈k, Ku ŋïnydekäŋ de kɔc ŋic käŋ abä nyaai.”

²⁰ Raan pelnɔm akou? Raan ee löŋ gɔ̈ɔ̈r akou? Raan ŋic wël teet nu nou, raan ë pinyë nɔm? Pɛlënɔm ë kɔc ke pinyë nɔm kënë Nhialic tɔ ye këɣɔ̈ric?

²¹ Ku të cï kɔc ke piny nɔm Nhialic guɔ kuc në pɛl ë kek nïïm, cït man cï Nhialic e lueel në pɛlënɔmde, ke Nhialic jɔ piɔ̈u miɛt luɔi bï en kɔc gäm kony wëi në këɣɔ̈ric cɔl guiëër ë wëlpiɛth.

²² Judai akɔɔrkï gök bï nyuöth keek, ku kɔɔr Girikii pɛlënɔm:

²³ ku wook, wok guiir Kërtho, raan cï piäät ë tim cï rïïu nɔm kɔ̈u, tëde Judai, ee kë ye kɔc tɔ kɔ̈th, ku tëde Girikii ee këɣɔ̈ric,

²⁴ ku tëde kɔc cï cɔɔl, Judai ayï Girikii, yen aye Kërtho, riɛldïït ë Nhialic, ku ye pɛlënɔm ë Nhialic.

²⁵ Acakaa pial ë Nhialic piɔ̈u awär kɔc në pɛlënɔm, ku kɔ̈c kɔ̈ɔ̈cë Nhialic awär kɔc në riɛl.

²⁶ Ku we ye cɔ̈t cɔɔlë we tïŋ, wek mïthëkɔckuɔ, an: Acïn kɔc juëc cï cɔɔl, kɔc cï kɔc ke piny nɔm tɔ ye kɔc pel nïïm ayï kɔc ril, ayï kɔc cï dhiëëth ë dhiën ë bɛ̈ny:

²⁷ ee dhän ke piny nɔm kek ë lɔc Nhialic, bïk kɔc pelnïïm tɔ yäär: ku lɔc Nhialic kɔc kɔ̈c, bïk kɔc ril tɔ yäär,

²⁸ ayï ka youyou ka ke piny nɔm, ayï ka cï biɔɔn, acï Nhialic ke lɔc, acakaa ka liu aya, bï en ka nu tɔ cïn naamden,

²⁹ ke bï ciën raan töŋ bï rɔt leec ë yenɔm.

³⁰ Ku yen aye week tɔ tɔ̈u ë Kërtho Yecu yic, raan cïï Nhialic tɔ ye pɛlënɔm në baŋda, ku piathëpiɔ̈u, ku ɣɛɛrëpiɔ̈u, ku wëër wëërë wo bei,

³¹ abï ciët man cï e gɔ̈ɔ̈r an, “Raan ee rɔt leec, ke lec rɔt ë Bɛ̈nydïtic.”