Zaburi 142 - Digo Bible

Kuvoya kuterywa

Zaburi ya Daudi, wakati ariphokala pangani. Voyo.

¹ Namririra Mwenyezi Mlungu kpwa sauti ya dzulu, ninamvoya Mwenyezi Mlungu kpwa sauti.

² Ninammwagira malalamishi gangu na kumuambira tabu zangu.

³ Nivundzikapho moyo, uwe ndiwe umanyaye njira yangu. Himo njirani nitsupiramo, akanihegera mihambo.

⁴ Lola mkpwono wangu wa kulume uone, takuna mutu adzishuulishaye nami. Sina phatu pha kuchimbirira, taphana mutu anayenijali.

⁵ Nakuririra uwe Mwenyezi Mlungu, ninaamba, “Uwe ndiwe chimbiriro rangu, uwe ndiwe urisi wangu kpwenye tsi ya atu ario moyo.”

⁶ Phundza chiriro changu, mana pho niripho sidziweza tse! Ntivya na anigayisao mana ana mkpwotse kuriko mimi.

⁷ Nituluza chifungoni ili nami niweze kukutogola. Atu a haki andanizangira mana ukanihendera mambo manono.