Yõaannẽ 20 - ꞌBuuk cĩ Thõõth cĩ Nyekuci

Ũrũga Yeesu daahĩtha

¹ Ma baa lomidikaawa ngerrenita, baa õbõhĩ aal lõõcĩ, ikia ũũk Maria Madalẽẽna ĩĩcĩ ꞌloohu. Ma baa õdõlan nẽẽ ꞌlook ko, ammũdõõthĩk hinnia eꞌnyeehoothĩk bẽẽ ꞌcĩ baa aꞌnyũũgẽnĩ ꞌlook ko ngadiiha.

² Nĩngĩtĩ avviri nẽẽ ammũdõõthĩkĩ ꞌThimõõnẽ Pẽẽtũrũ hĩ nuyyioohit umwa baa ammĩnan Yeesu nẽ uduhaak ĩhõõggõ ĩĩnnĩk, “Ammanyattõõĩ eeta ẽlẽ cĩ Makayyiookto ꞌloohatõõ nẽ hõllõngaa haga nĩngĩtĩ õõ aarĩkĩ ẽlẽ cĩnnĩ!”

³ Ma nĩngaata, ĩtĩngaacõ Pẽẽtũrũ hĩ nuyyioohit ꞌcĩ ammĩnan Yeesu ho, õõt ĩĩcĩ ꞌloohu.

⁴ Baa avvir nẽẽg ꞌrammaattĩg, nẽẽthĩ hinnia, baa avvir nuyyioohiti ꞌcĩ umwa ho, hĩjjaar Pẽẽtũrũ hũũk hitiman ꞌlook ĩĩcĩ oou.

⁵ Nĩngĩtĩ õkõ iiõnõõꞌthĩ nẽẽ ꞌlook nẽ ẽdẽẽnyõthĩ cẽrẽm ngaatĩ aayyi nĩngaata, nẽẽthĩ, baa hõllõngaa aduhun nẽẽ ĩĩttõõ.

⁶ Ma baa õdõlan ꞌThimõõnẽ Pẽẽtũrũ baa anũa ĩnõõnnõ uruta ho, ikia ũũk edeceek nẽẽ ꞌloohatõõ. Nĩngĩtĩ adtuuhanĩ cẽrẽm baa amũmmũũraniini ẽlẽ cĩ Yeesu

⁷ hĩ cẽrẽm baa amũmmũũraniini muum cĩ Yeesu buúk, ngaatĩ atũllũngẽẽnĩ ẽmmẽn nĩngaata.

⁸ Ma urutaa cĩnnĩ, ikia uduhun nuyyioohiti baa õdõlan ꞌlook ĩĩcĩ oou buúk ĩĩttõõ. Nĩngĩtĩ acĩnĩ nẽ ẽlẽma.

⁹ Baa nga hagaacõ nẽẽg thõõth cĩ ꞌBuuk cĩ Nyekuci baa aĩ, arũgna hatĩ Yeesu daahĩtha.

¹⁰ Nĩngĩtĩ õbõdõõꞌthĩ nuyyiooha olooyyiohĩĩ cĩggĩĩng.

Uppwaannak Yeesu nuyyiook hĩ Maria Madalẽẽna

¹¹ Baa abĩlĩ Maria Madalẽẽna battaalaa cĩ ꞌloohu nẽ utulu. Ma baa nga alu nẽẽnĩ, ikia iiõnõõthĩ ꞌlook,

¹² nẽ udtuuha aajĩlẽẽt ꞌramma ꞌcĩg ahimit ceremwa ꞌcĩg õõrĩg, aattĩg loota nga baa aarĩhõõthĩkĩ ẽlẽ cĩ Yeesu. Baa aaĩ aajĩlõ umwa ĩĩcĩ oou nẽ aau umwaa ĩĩcĩ ꞌthoonu.

¹³ Nĩngĩtĩ ajini aajĩlẽẽta Maria annẽẽkĩ, “Alu inni?” Ẽdẽcĩ nẽẽ anneek, “Halu hĩnĩngĩtĩ ootti eeta ẽlẽ cĩ Makayyioohit caannĩ nẽ hõllõngaa haga õõ aarĩk ĩĩna?”

¹⁴ Ma nĩngaata noho, ubbuudi nẽ udtuuha Yeesu ngaatĩ abĩllĩ nĩngaata, nẽẽthĩ hinnia, baa hõllõngaa aga nẽẽ ngaatĩ ĩĩnnĩ Yeesu ꞌcĩ abĩlĩ ho.

¹⁵ Ma ho, ijin Yeesu ĩnõõnnõ ĩĩnnĩk, “Alu inni? Nganĩ ꞌcĩ adiimi nii ho?” Baa hinnia ammuk Maria aĩ, baattĩ manu ꞌcĩ ajin ĩnõõnnõ ho, nĩngĩtĩ annẽẽkĩ, “Ẽẽtĩ ciee, má ĩĩn nganiit ꞌcĩ õkõõĩ ẽlẽ cĩ Makayyiookto ho, duhaahaa baaĩ nuun, hátĩ hũũk haꞌnyaha.”

¹⁶ Nĩngĩtĩ aũyyĩ Yeesu ĩnõõnnõ annẽẽkĩ, “Maria.” Ma ho, ubbuudi nẽẽ nẽ ĩĩnnĩk Yeesu Aramaayyi, “Rabboni!” nĩngĩtĩ aĩ, ꞌLimmannioohit.

¹⁷ Ma nĩngaata, uduhaak Yeesu ĩnõõnnõ ĩĩnnĩk, “Ma nõõ harabũũttaanĩ, nga hobodooth naa hĩ Baaba. Bĩĩt nõõ hĩ ꞌgotoonoga nẽ uduhaahu ĩhõõggõ ĩĩnnĩhuu, ‘Hobodootha naa hĩ Baaba caannĩ ꞌcĩ ĩĩn Maaꞌnyu cunuung buúk, hĩ Nyekuc caannĩ nẽ ĩĩ Nyekuc cunuung buúk.’ ”

¹⁸ Ma ho, ũũk ũmmũdoothĩk Maria Madalẽẽna nuyyiook nẽ uduhaak ĩhõõggõ nyeemuut ꞌcĩ aĩ, “Hĩcĩna naa Makayyioohit!” Nĩngĩtĩ aduhaakĩ nẽẽ ĩhõõggõ thõõth ꞌcĩ baa aduhaak Yeesu ĩnõõnnõ ho.

Uppwaannak Yeesu nuyyiook cĩgĩnnĩg

¹⁹ Ma baa lomidikaawa nĩĩca ꞌjiaat, baa alũtĩ nuyyiooha ngaatĩ hõdẽẽthõng, aꞌnyũũg hattũũgẽt, hĩnĩngĩtĩ baa iꞌngolli nẽẽg eet cĩg ꞌJudeei. Ma ho, uppwaanna Yeesu hikia hĩbĩl hõrggẽẽnaa cĩnĩĩng nẽ ĩĩ, “Aꞌnyĩĩk ganõn haau hĩ ngagiita!”

²⁰ Ma baa uduha nẽẽ thõõth icci ẽlẽk, ikia eteretheek ĩhõõggõ ngatũbĩ athĩnĩĩ cĩgĩnnĩg hĩ habanyta. Baa accamanoothĩk nuyyiooha gẽrrẽẽt ngaatĩ acĩnĩ Makayyioohit!

²¹ Nẽ õbõdẽẽhĩ Yeesu õthõõth tarĩ ĩĩ, “Aꞌnyĩĩk ganõn haau hĩ ngagiita! Hĩ baa ĩꞌthõõannaa nganĩĩt Baaba, hĩꞌthooyyuung naa ngagiit buúk.”

²² Ma nĩngaata, ũtũbbeek ĩhõõggõ ꞌlaũk nẽ ĩĩnnĩk, “Erito Lori ꞌcĩ Ẽllẽẽmĩthĩ.

²³ Má ammaanniku niig ꞌthẽccanẽẽt cĩg eet umwa, ammaannĩk hatĩ Nyekuci buúk, má hõllõngaa ammaanniku niig ꞌthẽccanẽẽt cĩg eet umwa, aitiõõ hatĩ Nyekuci hõllõngaa ammaannĩk ꞌthẽccanẽẽt cĩg eet tĩho buúk.”

Uppwaannak Yeesu Tomaaꞌthio

²⁴ Baa aitiõõ Tomaaꞌthio ꞌcĩ haĩ ꞌthaar ũgĩ Diidimo tõõ, nuyyiõõhĩĩ ꞌcĩg ĩĩn õmmõtõ hĩ ꞌramma ho, kõr baa uppwaannanĩ Yeesu.

²⁵ Nĩngĩtĩ aduhaakĩ nuyyiooha ĩnõõnnõ annẽẽkĩ, “Iyyia hĩcĩtta naag Makayyioohit!” Ẽdẽcĩ hinnia Tomaaꞌthio aĩ, “Occa hõllõngaa helemi naa thõõth icci, hatĩ nga hĩcĩn ngatũbĩ athĩnĩĩ cĩgĩnnĩg ĩbaag õdõõddĩ ꞌgũthũmaarĩtĩ nẽ huhuma ngatubeenit cĩ habanyit cĩnnĩ nga baa acuhanni dĩlaawa.”

²⁶ Ma urutaa cĩ lomidika hõdẽĩ, baa iita aauto nuyyiooha ꞌcieetõõ hõdẽĩ tarĩ, baa aattĩ aaĩ Tomaaꞌthio buúk kõr niccia. Tananga baa aꞌnyũũgĩ hattũũgẽta, ikia ĩbĩl Yeesu hõrggẽẽnaa cĩnĩĩng nẽ ĩĩ, “Aꞌnyĩĩk ganõn haau hĩ ngagiita!”

²⁷ Ma nĩngaata, ĩĩnnĩk nẽẽ Tomaaꞌthio, “Arĩĩk aꞌthiit cunni ngaati nẽ icinu athĩn cĩgannĩg. Arĩĩk aꞌthiit cunni ngatubeettaa caannĩ. Ma nga hĩccaadi tarĩ, lẽmõ!”

²⁸ Ma ho, ĩĩnnĩk Tomaaꞌthio ĩnõõnnõ, “Makayyioohit caannĩ hĩ Nyekuc caannĩ!”

²⁹ Nĩngĩtĩ aduhaakĩ Yeesu ĩnõõnnõ annẽẽkĩ, “Ẽlẽmmaa nii nganĩĩt, hĩnĩngĩtĩ ĩcĩnaa thõng. Aꞌnyĩĩk haggatan Nyekuci eet ꞌcĩg ẽlẽmma nganĩĩt nga hĩcĩttaanĩ.”

Thõõth ꞌcĩ ẽhẽẽdĩ Yõaannẽ ꞌBuuk cĩnnĩ

³⁰ Baa adtican Yeesu thooꞌthiok ũgĩ ꞌcĩg mẽẽlĩg ꞌcĩg ĩnaat eeta hẽbẽrẽẽnnĩĩ cĩg nuyyiook cĩgĩnnĩg ꞌcĩg nga heteheeddi ꞌBuuhaa cĩ.

³¹ Nẽẽthĩ, baa eheeddi thooꞌthioha cieeg, hátĩ elemit niig ngaatĩ ĩĩnnĩ Yeesu Krĩstõ Ngeertĩ Nyekuci. Nẽ má elemtu, aꞌnyaku hatĩ rũgẽt ꞌcĩ aalla ũdũt ꞌthaarĩĩ cĩgĩnnĩg.