Yõaannẽ 19 - ꞌBuuk cĩ Thõõth cĩ Nyekuci

Etteedothoothĩk Yeesu daahĩthĩ cĩ hurucceeo

¹ Ma nĩngaata, aaꞌnyĩk Pĩlaatõ Yeesu huuki nyanĩnna.

² Nẽ ẽtẽhẽnyta ũrũtana tẽẽ ꞌcĩ ĩĩn bĩlla nẽ aarrik õõaa cĩ Yeesu. Nẽ itihimtẽẽhĩ ĩnõõnnõ cẽrẽm ꞌcĩ ꞌrẽggẽẽ.

³ Ma ho, iita õõt hĩ ĩnõõnnõ nẽ ĩĩttĩk, “Hĩꞌthaaõ habu cĩ ꞌJudeei!” Nẽ tarĩ ĩddaacõ ĩnõõnnõ thõng buúk.

⁴ Ma nĩngaata, uduhuna Pĩlaatõ battaala tarĩ nẽ uduhaak eet cĩg ꞌJudeei ĩĩnnĩk, “Ĩcĩnĩt nõõ, haꞌnyahaakuung naa ngagiit ĩnõõnnõ battaala, hátĩ agaac ĩĩtõ, nga hũmmũda naa thõõth ꞌcĩ ẽꞌthẽcan ẽẽtĩ cieeni.”

⁵ Ma baa adukna Yeesu battaala ahimta tẽẽ cĩ bĩllanu hĩ cẽrẽm ꞌcĩ ꞌrẽggẽẽ ho, ikia ĩĩnnĩk Pĩlaatõ ĩhõõggõ, “Eet tĩho cieeni!”

⁶ Ma baa acĩn makayyiooha cĩg paadĩrꞌnyaannu hĩ boliith ꞌcĩg ẽbẽk ꞌCieeth cĩ Nyekuci Yeesu ho, iita awacahit nẽẽg ĩĩtõ, “Toddoeek ĩnõõnnõ hurucceea, Toddoeek ĩnõõnnõ hurucceea!” Ẽdẽcĩ Pĩlaatõ ĩhõõggõ anneek, “Õõt õtõddõõc niiga! Nga hũmmũda naa ꞌthẽccan cĩ eet icci!”

⁷ Baa ara eeta cĩg ꞌJudeei aĩ, “Haꞌnyaka naag nyattal nẽ nyattaalaa tĩho, adiim aruhi nẽẽ, hĩnĩngĩtĩ aĩ hĩĩnĩ Ngeertĩ Nyekuci.”

⁸ Ma baa athĩhĩ Pĩlaatõ thõõth icci ho, ikia itingolli nẽẽ gẽrrẽẽt.

⁹ Nĩngĩtĩ õbõdõõꞌthĩ halangatõõ nẽ ũũk ijin Yeesu ĩĩnnĩk, “Akuu nii ngaana?” Baa hõllõngaa ẽdẽcĩ Yeesu ĩnõõnnõ buúk.

¹⁰ Nẽ ijin Pĩlaatõ ĩnõõnnõ tarĩ ĩĩnnĩk, “Hõllõngaa edeci thõõth ꞌcĩ hajinnii naa ho inni? Hõllõngaa aga nii ngaatĩ haꞌnyahĩ naa ꞌtirrian ꞌcĩ occa hõõganni nganiit hode ꞌcĩ occa hodooddiki hurucceea?”

¹¹ Ẽdẽcĩ Yeesu Pĩlaatõ anneek, “Má nga haaꞌnyi Nyekuci ꞌtirrian, aitiõõ ꞌgii ꞌcĩ occa adĩmaneekaa nii nganĩĩt tõõ. Nẽẽthĩ, ẽꞌthẽcan ẽẽtĩ ꞌcĩ aꞌnyahaanna nganĩĩt hĩ nganiit ko gẽrrẽẽt ũdũt.”

¹² Ma ho, ĩttĩman Pĩlaatõ ꞌgõõl ꞌcĩ õõganĩ Yeesu. Ẽggẽrẽny hinnia eeta cĩg ꞌJudeei tarĩ aĩ, “Má oogu eet icci, iittiõõ thĩ hõllõngaa ĩĩnĩ ꞌgõõnĩ habu cobbi cĩ ꞌRooma! Hĩnĩngĩtĩ ẽẽtĩ ꞌcĩ aĩ hĩĩnĩ habu, ĩĩn eet ꞌcĩ abũrĩ thõõth cĩ habu cobbi cĩ ꞌRooma.”

¹³ Ma baa athĩhĩ Pĩlaatõ thõõth icci ho, ikia aꞌnyaha nẽẽ Yeesu battaala nẽ iccioloongan dtaabawaa cĩ ꞌgaadĩõõ, ngaatĩ haĩ nĩngĩtĩ Arrũũbĩ Biyyiẽẽnĩ, ꞌcĩ haĩ Aramaayyi, ꞌGaabatha.

¹⁴ Ma baa aau kõrra lokora õõa cĩ Kõr cĩ Haangittõõ, ikia ĩĩnnĩk Pĩlaatõ eet cĩg ꞌJudeei, “Ĩcĩnĩt habu cunuung cieeni!”

¹⁵ Nẽẽthĩ, baa ẽggẽrẽny nẽẽg aĩ, “Ruuk ĩnõõnnõ! Ruuk ĩnõõnnõ! Toddoeek ĩnõõnnõ hurucceea!” Ma ho, ijin Pĩlaatõ ĩhõõggõ ĩĩnnĩk, “Hotoddoeek habu cunuung ko hurucceea?” Ẽdẽcĩ makayyiooha cĩg paadĩrꞌnyaannu anneek, “Habu cobbi cĩ ꞌRooma dioo ꞌcĩ ĩĩn habu cĩnaang!”

¹⁶ Ma nĩngaata, aaꞌnyĩk Pĩlaatõ ĩhõõggõ Yeesu hõõt hotoddoyyieek hurucceea. Nĩngĩtĩ au õõĩ ũrũtana Yeesu.

Otoddoothĩk Yeesu hurucceea

¹⁷ Baa irriongan Yeesu hurucce cĩnnĩ ẽmmẽn, ĩꞌthõng nĩngĩtĩ haĩ, Ẽmmẽẽn cĩ õõ cĩ eeto, ꞌcĩ haĩ Aramaayyi ꞌGologooꞌtha.

¹⁸ Ma nĩngaata, õõt otoddoyyieek eeta Yeesu hurucceea hĩ eet ũgĩ ꞌramma, odooddĩk umwa ĩĩcĩ aꞌthiit cobbi nẽ otoddoyyieek umwa ĩĩcĩ aꞌthiit ꞌcĩ hidici.

¹⁹ Nĩngĩtĩ aduhaakĩ Pĩlaatõ eet heteheeddik thõõth ꞌcĩ õhõppõõcaniini Yeesu ho hurucceea lokora ꞌcĩ agiili aĩ, Yeesu cĩ Naaꞌtharẽtĩ habu cĩ ꞌJudeei.

²⁰ Baa mẽẽlĩg eeta cĩg ꞌJudeei ꞌcĩg agiil terethiinit icci, hĩnĩngĩtĩ baa õbõhõõ nĩngĩtĩ odooddini Yeesu ho, hĩ ꞌtaaũn nẽ baa eheeddi terethiiniti ciee Aramaayyi hĩ Laatineeyyi hĩ ꞌGiriheeyyi.

²¹ Ma ho, iita ĩĩttĩk makayyiooha cĩg paadĩrꞌnya Pĩlaatõ, “Inni baa tẽhẽẽd ĩĩ, ĩĩn ẽẽtĩ ciee habu cĩ ꞌJudeei ho? Occa baa eteheedĩhuu ĩĩnnĩhuu, ‘Baa aĩ ẽẽtĩ ciee hĩĩnĩ habu cĩ ꞌJudeei.’ ”

²² Ẽdẽcĩ Pĩlaatõ ĩhõõggõ anneek, “ꞌGii ꞌcĩ hẽtẽhẽẽda naana, aꞌnyĩĩk ꞌthẽk haau hĩcĩ hẽtẽhẽẽda naa ho.”

²³ Ma baa õtõddõõcõ ũrũtana Yeesu ẽlẽk, iita ootti nẽẽg ceremwa cĩgĩnnĩg nẽ eꞌngerit hĩĩtõ ꞌgoolliok ꞌwec, nĩngĩtĩ ẽꞌngẽrẽẽkĩ eleeti hõdẽĩ hõdẽĩ nẽ ũtũngteek cẽrẽm cĩ tõõ diooni. Baa hõllõngaa aꞌnyak cẽrẽm cĩ tõõ ho ꞌgõõl ꞌcĩ occa eꞌngeriini.

²⁴ Nĩngĩtĩ õthõõthĩ nẽẽg ẽmmẽn aĩnnĩ, “Occa hõllõngaa hẽrrẽẽc cẽrẽm icci nẽ heꞌngerrieek eleeti. Huruhit tooto, hátĩ hummuddiaaĩ eet ꞌcĩ occa õkõõĩ.” Baa adticanni thõõth ciee hoti, hátĩ hikia thõõth baa eheeddi ꞌBuuhaa cĩ Nyekuci hĩĩ dĩdĩ, baa aĩ, “Baa eꞌngereek nẽẽg ceremwa cĩgannĩg eleeti cĩggĩĩng nẽ uruhit tooto, hĩnĩngĩtĩ cẽrẽm caannĩ.” Nẽ thõõth ꞌcĩ baa adĩman ũrũtana cieeni.

²⁵ Ngaatĩ õbõhõõ hĩ hurucce cĩ Yeesu ho, baa abĩlĩ ngaannia hĩ iinni Yeesu hĩ Maria ngaa cĩ Koloopathĩ hĩ Maria Madalẽẽna.

²⁶ Ma baa adtuuha Yeesu aattĩnnĩ hĩ nuyyioohit baa ammĩnan nẽẽ abĩlĩ obokii nĩngaata ho, ĩĩnnĩk nẽẽ aattĩnnĩ, “Morwahit, ĩĩ ẽẽtĩ ciee ꞌyioko ngeeruni”

²⁷ nẽ uduhaak nuyyioohit nicci ĩĩnnĩk, “Ĩĩ morwahit nicciaa ꞌyioko morwahit cunni.” Nganĩngĩtĩ kõr niccia, ikia ũũhĩ nuyyioohiti nicciee aattĩ Yeesu ĩĩcĩ õlõ cĩnnĩ.

Daahĩth cĩ Yeesu

²⁸ Ma baa urutaa ꞌcĩ agaĩ Yeesu ngaatĩ ẽdẽcaahĩ dtiic vẽlẽk, hátĩ hikia thõõth baa eheeddi ꞌBuuhaa cĩ Nyekuci hĩĩ dĩdĩ, ikia õthõõth nẽẽ ĩĩ, “Aamma kõrra.”

²⁹ Baa aaĩ mẽrta cĩ viino ꞌcĩ ammũccarĩĩ umwaa deeraa loota nĩngaata, ma ho, itikta eeta niccieeg hapuppud umwa nẽ okollieek viinoa nĩĩcĩ nẽ iriirrik hẽẽta, nĩngĩtĩ aaꞌnyĩkĩ Yeesu ũtũũga.

³⁰ Ma baa ũcũũcũ Yeesu viino nicci, ikia õthõõth nẽẽ ĩĩ, “Edeccia dtiici vẽlẽk!” Nĩngĩtĩ aggiingi õõ cĩnnĩ nẽ adaaha.

Ucuuhanĩ ꞌthĩnĩt cĩ Yeesu dĩlaawa

³¹ Ma baa loohoth cĩnnĩ, ikia ĩĩ kõr ꞌcĩ akũmanẽẽkĩ eeta Kõr cĩ ꞌYiommaanõ. Baa ĩĩn kõrra ciee ꞌcĩ tiiri gẽrrẽẽt hĩ eet cĩg ꞌJudeei. Ma ho, iita ijinit nẽẽg Pĩlaatõ huduul ꞌthoo cĩg eet ꞌcĩg õdõõddĩ hurucceea nẽ aara eleeti cĩggĩĩng hiita loota, hĩnĩngĩtĩ baa abũrĩ eeta cĩg ꞌJudeei eleeti cĩg daakiahu ngaatĩ aallanĩ hurucciẽẽtĩ Kõrraa cĩ ꞌYiommaanõ.

³² Ma ho, iita ũrũtana uduulito nyeppithihiiꞌnya cĩg eet ꞌcĩ oou baa õdõõddĩ hĩ Yeesu hĩ cĩg ꞌgõõnĩ baa umwa buúk.

³³ Ma baa iita ummuddieek nẽẽg Yeesu adaak ẽlẽk, iita ũtũngteek ĩnõõnnõ iittiõõ hõllõngaa aduul nyeppithihiiꞌnya cĩgĩnnĩg.

³⁴ Baa hinnia acuhan ũũrũtaacĩ umwaa Yeesu dĩlaawa habanyit hetterria biyyieeta nẽ irikta maama nĩĩcĩ noho.

³⁵ Aduha nyeemuut icci ẽẽtĩ ꞌcĩ baa acĩn thõõth icci nẽ ĩĩn thõõth ꞌcĩ aduha nẽẽ ho dĩdĩ. Aga nẽẽ ngaatĩ aduhaanĩ thõõth ꞌcĩ ĩĩn dĩdĩ, hátĩ iita elemit niig buúk.

³⁶ Baa au edeeꞌnyia thooꞌthioha cieeg hoti, hátĩ hikia thõõth baa eheeddi ꞌBuuhaa cĩ Nyekuci hĩĩ dĩdĩ baa aĩ, “Hiꞌthihi hatĩ ẽmmẽẽn cĩnnĩ hõdẽẽthõng ꞌcĩ aduuli.”

³⁷ Nẽ hĩcĩ aduha ꞌBuuhi umwaa cĩ Nyekuci aĩ, “Acĩn hatĩ nẽẽg eet baa acuhan nẽẽgĩ.”

Adaĩ Yeesu

³⁸ Ma urutaa cĩnnĩ, ikia ijina Yothebo cĩ ꞌtaaũn cĩ Arimathea Pĩlaatõ ẽlẽ cĩ Yeesu. Baa ĩĩn Yothebo nuyyioohit cĩ Yeesu burkiitina, hĩnĩngĩtĩ baa iꞌngolli nẽẽ eet cĩg ꞌJudeei. Ma ho, ikia ẽlẽmaahĩ Pĩlaatõ ĩnõõnnõ hũũhĩ ẽlẽ cĩ Yeesu.

³⁹ Baa õõkõr Yothebo hĩ Nikodemo, eet baa aku kõr umwa ĩĩcĩ oou, hikia hĩcĩn Yeesu baal. Baa aꞌnyaha Nikodemo ngõõrrõ ꞌcĩ õꞌngõõtanoothĩk mĩĩra hĩ ẽgẽrnaac. Baa adĩddĩngĩĩ ngõõrra ciee aꞌnyak kiiloꞌnya hẽẽn iyyio.

⁴⁰ Nĩngĩtĩ auuni eeta cieeg ĩĩn ꞌramma ho, aaranĩ ẽlẽ cĩ Yeesu nẽ uudito ngõõrraa nĩĩcĩ nẽ ũmũmmũũranit cẽrẽmaa ꞌcĩ uuni hĩ nyattalĩ ꞌcĩ adaĩ eeta cĩg ꞌJudeei daakiak.

⁴¹ Ngaatĩ baa odooddini Yeesu hurucceea ho, baa aaĩ mana umwaa ꞌcĩ aꞌnyak waany ꞌcĩ ĩĩn ngeju ꞌcĩ baa nga hadaõõĩ eet umwaanĩ.

⁴² Baa ĩĩn kõr ꞌcĩ akũmanõõthĩkĩ eeta cĩg ꞌJudeei, hĩnĩngĩtĩ baa Kõr cĩ ꞌYiommaanõ niccia nẽ tarĩ baa obokii waany ngaatĩho, nĩngĩtĩ õõ ammũtĩ nẽẽg Yeesu nĩngaata.